'माधुरीला अमेरिकेत कोणीही ओळखत नव्हतं, तेव्हा मी...'; 'पत्नीच्या प्रसिद्धीवर जगताय' टोमण्यावर डॉ. श्रीराम नेने स्पष्टच बोलले

बॉलिवूडची धकधक गर्ल माधुरी दीक्षितचे स्टारडम आजही तसूभरही कमी झाले नाहीये. लग्नानंतर माधुरी दीक्षित अमेरिकेत स्थायिक झाली. मात्र काही काळाने ती पुन्हा एकदा भारतात परतली. माधुरी दीक्षित पुन्हा सिनेमांमध्ये सक्रीय झाली. पण त्याचबरोबर तिचे पती डॉ. श्रीराम नेने हे देखील लाइमलाइटमध्ये आले. अलीकडेच डॉ. नेने यांनी मुलाखतीत माधुरीच्या स्टारडमचा कधी त्रास झाला का? असा सवाल करण्यात आला त्यावर त्यांनी उत्तर दिलं आहे.

माधुरी दीक्षित आणि डॉ. श्रीराम नेने यांच्या जोडीचेही अनेक चाहते आहेत. जेव्हा माधुरी आणि डॉ. नेने पहिल्यांदा भेटले तेव्हा त्यांना माधुरी अभिनेत्री आहे हेच ठावूक नव्हतं. त्यामुळं दोघांनीही त्यांच्या नात्याला वेळ देऊन, समजून घेऊन लग्न केले. आज त्यांच्या संसाराला 27 वर्ष झाले. या दरम्यान, डॉ. नेने यांना बॉलिवूड स्टारचे पती म्हणून ओळखले जाते, याबाबत त्यांना प्रश्न विचारल्यावर त्यांनी थेट उत्तर दिलं आहे.

डॉ. श्रीराम नेने यांनी वृत्तसंस्थेला दिलेल्या मुलाखतीत त्यांना प्रश्न विचारण्यात आला की,  पत्नीच्या प्रसिद्धीवर जगतोय, अशा टोमण्यांना काय उत्तर देणार, तेव्हा ते म्हणाले की, मी तिच्या प्रसिद्धीवर जगतोय. कारण अमेरिकेत तिला कोणीही ओळखत नव्हतं. मी तिथ हार्ट सर्जन होतो. त्यामुळं मला माहिती आहे की, तिचं भारतातील स्थान एका वेगळ्या पातळीवर आहे आणि मला तिचा अभिमान आहे. कारण तिच्यासारखे लोक या जगात कमी आहेत, असं नेने यांनी म्हटलं आहे.

नेने यांनी पुढे म्हटलं की, माधुरीसारख्या बड्या कलाकारासोबत लग्न केल्यानंतरही मला कधी असुरक्षित वाटले नाही. मला तिच्यावर गर्व आहे. आम्ही दोघांनीही आमच्या मेहनतीवर ओळख बनवली आहे. आमच्या लग्नाचे बंधन हे स्टारडमवर नाही तर एकमेकांवर असलेला विश्वास यावर टिकून आहे.

डॉ. नेने यांनी स्पष्ट केले आहे की, इतक्या लोकप्रिय व्यक्तीसोबत आयुष्य व्यतित करणे कधीकधी आव्हानात्मक असते. पण कधी कधी परिस्थितीनुसार स्वतःला घडवावे लागते. यूसीएलएमध्ये मेडिकल ट्रेनिंगदरम्यान हॉलिवूडमधील अनेक प्रसिद्ध लोकांवर उपचार केले आहेत. त्यामुळं त्या कलाकारांसाठी प्रायव्हसी जपणे काय असते हे माहिती आहे. त्यामुळं या अनुभवाने मला प्रसिद्धीची ओळख नव्याने पटली.