'तिथे माझ्यासोबत कोणीतरी...', सलमानने सांगितला बेडरुममधील हादरवणारा भूताचा अनुभव; 'ती अतिशय सुंदर स्त्री...'
हा सारा प्रकार ऐकून थक्क झालेल्या करणने सलमानला पुढचा प्रश्न विचारला असता सलमानने याबद्दल सविस्तरपणे सांगितलं. त्याने त्याच्या बेडरुममध्ये नेमकं काय काय व्हायचं याचा संपूर्ण तपशील दिला. नेमकं काय म्हणाला सलमान जाणून घ्या...
नवाजलेल्या दिग्दर्शक करण जोहरचा चॅट शो, 'कॉफी विथ करण'चा 9 वा सीझन सुरू झाला आहे. जिओ हॉटस्टारवर प्रदर्शित होत असलेल्या या सीझनच्या पहिल्याच भागात सुपरस्टार सलमान खान पाहुणा म्हणून सहभागी झाल्याचं दिसून आलं. यापूर्वीच्या पर्वामध्येही सलमान सहभागी झालेला. मात्र यावेळेस करणने सलमानसोबत चर्चा करताना एक जुना किस्सा सांगितला. 'कुछ कुछ होता है' चित्रपटाची कथा ऐकवण्यासाठी करण सलमानच्या घरी गेला होता, तेव्हाचा किस्सा करणने सांगितला. सलमानच्या घरी एक अतिशय लहान बेडरूम होती, जिथे तो आपल्या कुटुंबासोबत राहत होता, असं करण म्हणाला. या घराचा उल्लेख निघताच, सलमानने लगेच त्या बेडरूममध्ये त्याला काही पॅरानॉर्मल अनुभव आल्याचं सांगितलं.
त्या बेडरुममध्ये माझ्यासोबत सतत कोणीतरी असायचं
सलमानने करणला या बेडरुमसंदर्भातील आठवण सांगताना, "त्या खोलीत मी कधीही एकटा राहिलो नाही. तिथे माझ्यासोबत कोणीतरी असायचे. ज्याला मी कधी पाहिले नाही, फक्त ऐकले आहे आणि माझ्या मागे कोणाच्या तरी उपस्थितीची जाणवी मला इथं असताना कायम व्हायची," असं म्हटलं. हा सारा प्रकार ऐकून थक्क झालेल्या करणने सलमानला कोणी तरी असायचे म्हणजे, "कोण?" असा सवाल केला. त्यावर सलमानने, "जेव्हा जेव्हा मी त्या बेडरुममधून बाहेर पडायचो, तेव्हा दिवे आपोआप चालू-बंद व्हायचे. कपाटे उघडायची, म्युझिक सुरू व्हायचे. बाथरूममध्ये असताना मला जाणवायचे की बाहेर कोणीतरी कपाटांशी खेळत आहे. तेव्हा मला खात्री पटली की तिथे नक्कीच कोणीतरी आहे," असं उत्तर दिलं.
भूत-प्रेतांचा वावर होता का?
हे ऐकून करणने थेट, "म्हणजे तिथे भूत-प्रेतांचा वावर होता का?" असा थेट प्रश्न विचारला. सलमानने यावर, "भूत-प्रेत असे म्हणण्यापेक्षा, माझ्या मागे कोणाची तरी उपस्थिती मला जाणवायची. जेव्हा मी तिथे म्युझिक लावायचो तेव्हा मला माझ्या मागे कोणाची तरी उपस्थिती जाणवायची. तेव्हा मी गंमतीने विचारायचो, 'तुम्हाला कोणते संगीत ऐकायला आवडेल?' मग मी फक्त बटण दाबायचो आणि बाहेर निघून जायचो," असं सांगितलं.
विचित्र घटनाही सांगितल्या
सलमान खानने आणखी काही विचित्र घटनाही सांगितल्या. "आधी तिथे बिलियर्ड्स टेबल होते. आम्ही जेव्हा बिलियर्ड्स खेळायचो, तेव्हा आतून आवाज यायचे—कधी कपाट उघडल्याचा, तर कधी म्युझिक सुरू झाल्याचा," अशी आठवणही सलमानने येथील गूढ घटनांबद्दल माहिती देताना सांगितली.
तू घाबरलेलास? प्रश्नावर सलमान काय म्हणाला?
यामुळे तू घाबरला होता का? या करणच्या प्रश्नावर सलमानने, "नाही! त्याने मला काहीही त्रास दिला नाही. माझी फक्त एकच विनंती होती की, जर तिथे कोणी असेल आणि ती एखादी अतिशय सुंदर स्त्री असेल—तर तिने मला स्वतःचे रूप दाखवावे!" असं मजेदार उत्तर दिलं. करणने या भागात करिश्मा कपूरला विशेष पाहुणी म्हणून आमंत्रित केले होते.
