जगभर कोरोना पसरवण्यासाठी 'हा'च माणूस जबाबदार; 7 वर्षानंतर दिली कबुली! ₹75 कोटींसाठी त्याने वुहानमध्ये...

कोरोनाचा प्रादुर्भाव ज्या ठिकाणाहून जगभरामध्ये झाला ते वुहान शहर पुन्हा चर्चेत आलं आहे. हे शहर चर्चेत येण्यामागे कारण ठरत आहे याच शहराचे माजी महापौर झोऊ शियानवांग! चीनमध्ये सध्या सरकारने भ्रष्टाचाराविरोधात मोहीम हाती घेतली असून या मोहिमेमध्ये कोरोना काळातील एक मोठा भ्रष्टाचार समोर आलाय. या प्रकरणामध्ये माजी महापौर झोऊ शियानवांग यांना दोषी ठरवण्यात आलं असून त्यांना 14 वर्षांच्या तुरुंगवासाची शिक्षा सुनावण्यात आली आहे.

झोऊ शियानवांग यांनी काय केलं?

झोऊ शियानवांग हे 2018 ते 2021 या तीन वर्षांच्या कालावधीमध्ये वुहानचे महापौर होते. 2019 साली वुहानमध्ये डिसेंबर महिन्यात पहिल्यांदा कोरोनाचा प्रादुर्भाव होण्यास सुरुवात झाली तेव्हा झोऊ शियानवांग यांनी महत्त्वाची माहिती जाणूनबुजून लपवल्याचं समोर आलं आहे. कोरोना किती घातक आहे, त्याचा प्रादुर्भाव कसा पसरू शकतो याबद्दल माहिती देणाऱ्या ली वेनलियांग यांच्यासारख्या डॉक्टरांची मुस्कटदाबी करण्याचं काम झोऊ शियानवांग यांनी केलं. एकीकडे कोरोनाचा प्रादुर्भाव होत असतानाच दुसरीकडे झोऊ शियानवांग हे मोठ्या कार्यक्रमांना परवानग्या देत असल्याचे आरोपही करण्यात आले. झोऊ शियानवांग यांनी आणलेल्या दबावामुळे स्थानिक अधिकाऱ्यांनी केंद्र सरकारला कोरोना प्रादुर्भावासंदर्भात सुरुवातीच्या टप्प्यातील पुरेशी माहिती दिली नव्हती, असंही सांगितलं जात आहे.

कोर्टाने काय म्हटलं?

झोऊ शियानवांग प्रमुख आरोपी असलेल्या भ्रष्टाचाराच्या या प्रकरणामध्ये 10 ऑक्टोबर 2026 रोजी हेनान प्रांतातील शांगक्यू इंटरमीडिएट पीपल्स कोर्टने अंतिम सुनावणी करताना आरोपीला दोषी ठरवलं. त्याला 14 वर्षांची शिक्षा सुनावताना,2003 ते 2025 या काळात झोऊ शियानवांग यांनी वुहानचे महापौर, हुबेई प्रांताचे उपराज्यपाल यासारख्या विविध पदांवर असताना कंपन्या व व्यक्तींना ठेकेदारी देण्यासाठी, व्यवसायिक परवाने आणि प्रशासकीय मंजुरी मिळवून देण्यासाठी नियमाबाहेर जाऊन मदत केली. या बदल्यात त्यांनी 60.5 दशलक्ष युआनपेक्षा (सुमारे 75 कोटी रुपयांहून अधिक) जास्त रक्कम लाच म्हणून स्वीकारल्याचा आरोपी सिद्ध होत असल्याचं सांगितलं.

...म्हणून शिक्षा कमी केली

या प्रकरणामध्ये झोऊ शियानवांग यांना 14 वर्षे तुरुंगवास आणि 50 लाख युआन दंड ठोठावण्यात आला. झोऊ शियानवांग यांनी गुन्हा कबूल केला आणि तपासात सहकार्य केले म्हणून शिक्षा काही प्रमाणात कमी करण्यात आल्याचंही कोर्टाने शिक्षा सुनावताना नमूद केलं.

कोरोनाच्या उत्पत्तीबाबतचं रहस्य आजही कायम

करोनाच्या सुरुवातीच्या काळात स्थानिक प्रशासनाने बरीच अत्यावश्यक माहिती दडवल्याचं समोर आलं आहे. तपासणीदरम्यान स्थानिक प्रशासनाने पूर्ण पारदर्शकता दाखवली नाही. तसेच वुहान इन्स्टिट्यूट ऑफ व्हायरॉलॉजीमधील संशोधन व सुरक्षेबाबतही अनेक प्रश्न जगभरातून उपस्थित करण्यात आले. कोरोना विषाणूच्या उत्पत्तीबाबत अजूनही ठोस आणि निश्चित निष्कर्ष काढता आलेला नाही. या अपयशामागील मुख्य कारण हे चीनने पूर्ण डेटा न पुरवल्याचं आहे. कोरोना विषाणू मांस बाजारातून, प्राण्यांपासून की प्रयोगशाळेतून निर्माण झाला हे आजही पुराव्यानिशी स्पष्ट झालेलं नाही. असा डेटा लपवण्यात झोऊ शियानवांग सारखे अधिकारी कारणीभूत होते असं या प्रकरणातून तरी समोर आलं आहे.

जगाला मृत्यूच्या दाढेत ढकललं

कोरोनामुळे जगभरात 71 लाखांहून अधिक लोकांनी प्राण गमावले. जागतिक आरोग्य संघटना (डब्ल्यूएचओ) आणि अधिकृत आकडेवारीनुसार ही माहिती समोर आली आहे. झोऊ शियानवांगसारख्या अधिकाऱ्यांनी भ्रष्टाचार केला नसता योग्य वेळी माहिती दिली असती तर कदाचित कोरोनाचा एवढा प्रादुर्भाव सुरुवातीच्या टप्प्यातच रोखता आला असता. झोऊ शियानवांगसारख्या व्यक्तींच्या स्वार्थामुळे त्यांनी संपूर्ण जगाला कोरोनासारख्या महामारीच्या माध्यमातून मृत्यूच्या दाढेत ढकललं. आता झोऊ शियानवांग यांच्यासारखे इतरही अधिकारी या भ्रष्टाचारविरोधी मोहिमेमध्ये समोर येतात का हे पाहणं महत्त्वाचं ठरणार आहे.