फ्रान्समध्ये आंदोलनाचा भडका, सरकारी कार्यालयांची जाळपोळ, 'या' मागण्यांसाठी 5 लाख नागरिक रस्त्यावर उतरले

भारतात गेल्या काही महिन्यांपासून विद्यार्थी रस्त्यावर उतरून आंदोलनांचा हुंकार भरला. दिल्ली ते गल्लीपर्यंत जेन-झींचा एल्गार पाहायला मिळतो. भारताप्रमाणेच आता आणखी एका देशाच्या राजधानीत विद्यार्थी रस्त्यावर उतरले असून मोठ्या प्रमाणात आंदोलन सुरू आहे. आत्तापर्यंत साधारण 1200 जणांना अटक करण्यात आली आहे. तर, 150 पोलीस कर्मचारी जखमी झाले आहेत.

फ्रान्समध्ये वाढती महागाई, वाईट सार्वजनिक सेवा आणि शाळांची बिकट अवस्था याविरोधात शनिवारी 17 ऑक्टोबर रोजी मोठ्या प्रमाणात आंदोलने करण्यात आली. पॅरिससह अनेक शहरात मोर्चे काढण्यात आले. त्यामुळं देशात तणावाचं वातावरण आहे. तसंच, या दरम्यान आंदोलनकर्ते आणि पोलिसांत झटापटीदेखील झाल्याचे समोर आले आहे. काही ठिकाणी दुकानात तोडफोड आणि लूटमार करण्यात आली. तर, काही इमारतींना आग लावण्यात आली. फ्रान्सचे पंतप्रधान सेबेस्टियन लेकोर्नू यांनी दिलेल्या माहितीनुसार, हिंसाचारानंतर 1200 जणांना अटक करण्यात आले आहे तर 150 पोलिस जखमी झाले आहेत.

फ्रान्सचे गृहमंत्री लॉरेंट नुनेज यांनी दिलेल्या माहितीनुसार, देशभरात जवळपास 5.5 लाख लोक आंदोलनात सहभागी झाले होते. यातील 1.1 लाख लोक पॅरिसमध्ये रस्त्यावर उतरले होते. तर, आंदोलनाची धुरा सांभाळणाऱ्या पक्षांनी व संघटनांनी दावा केला होता की, आंदोलनात साधारण 8 लाख लोक सहभागी झाले होते.

पॅरिसमधील मुख्य मोर्चा दिवसभर मोठ्या प्रमाणात शांततेत पार पडला, परंतु संध्याकाळपर्यंत अनेक ठिकाणी परिस्थिती बिघडली. काही आंदोलकांनी रस्त्यांवर आग लावली आणि वाहनांचे नुकसान केले. प्लास दे ला रिपब्लिकच्या (Place de la République) परिसरात जाळपोळ आणि पोलिसांसोबत बाचाबाची झाल्याचेही समोर आले आहे.

गर्दी पांगवण्यासाठी पोलिसांनी अश्रुधूर आणि पाण्याचा मारा केला. काही ठिकाणी पोलिसांनी आंदोलकांवर लाठीचार्जही केला. अनेक दुकाने आणि मोठ्या शोरुममध्ये तोडफोड व लूटमार करण्यात आल्याचा दावादेखील केला जातोय.

फ्रान्सचे राष्ट्राध्यक्ष इमॅन्युएल मॅक्रॉन यांनी जाळपोळ, लूटमार आणि सरकारी इमारतींवरील झालेल्या हल्ल्याचा निषेध केला. हिंसाचार आणि तोडफोडीत सहभागी असलेल्यांवर कायदेशीर कारवाई केली जाईल, असेही त्यांनी सांगितले. कोणालाही हिंसेच्या माध्यमातून आपला राजकीय अजेंडा पुढे नेण्याची परवानगी दिली जाऊ नये, अशी प्रतिक्रिया पंतप्रधान सेबॅस्टियन लेकोर्नू यांनी दिली.

फ्रान्समध्ये आंदोलन का?

शाळांची दयनीय अवस्था आणि शिक्षकांची कमतरता यावरून या आंदोलनाची सुरुवात झाली. हळूहळू त्यात महागाई, इंधनाच्या किमती, आर्थिक अडचणी आणि सार्वजनिक सेवांची दुरावस्था यांसारख्या मुद्द्यांचा समावेश झाला. कामगार संघटनांनी सुधारित वेतन आणि निवृत्तीवेतन तसेच अत्यावश्यक सेवांच्या तरतुदीच्या मागण्यांना पाठिंबा दिला. या मुद्द्यांवरुन फ्रान्समध्ये आंदोलन पेटले आहे.

सर्वच आंदोलकांनी हिंसाचार केला नाही. अनेक शहरांमध्ये, मोठ्या संख्येने लोकांनी शांततेने मोर्चे काढले. काही भागांमध्ये हिंसाचार झाला, ज्यात पोलीस आणि आंदोलकांमध्ये चकमकी झाल्या, ज्यामुळे दुकाने आणि सरकारी इमारतींचे नुकसान झाले.