'डायरेक्ट हिट', सौदी अरेबियाच्या मंत्रालयावर बॅलिस्टिक मिसाईलने हल्ला; हुथी बंडखोराचा दावा

सौदी अरेबियाच्या संरक्षण मंत्रालयाला बॅलिस्टिक क्षेपणास्त्राद्वारे लक्ष्य केल्याचा दावा येमेनमधील हुथी बंडखोरांनी केला आहे. राजधानी रियाधमध्ये करण्यात आलेल्या या बॅलिस्टिक मिसाईलने अचूक लक्ष्य गाठल्याचाही दावा त्यांनी केला आहे. हुथी गटाचे लष्करी प्रवक्ते याह्या सारी (Houthi military spokesman Yahya Saree) यांनी सांगितले की, "आमच्या सशस्त्र दलांनी शत्रू देश सौदी अरेबियाची राजधानी रियाध येथील संरक्षण मंत्रालयाला बॅलिस्टिक क्षेपणास्त्राद्वारे लक्ष्य केले आणि हा हल्ला थेट होता."

याआधी, हुथी बंडखोरांनी डागलेली दोन क्षेपणास्त्रे आपण रोखल्याचे सौदी अरेबियाने जाहीर केले होते. वृत्तसंस्था एएफपी (AFP) ने दिलेल्या माहितीनुसार, सौदी अरेबियाच्या राजधानीत काही वेळापूर्वी स्फोटांचे आवाज ऐकू आले होते.

 हुथी बंडखोरांनी सौदी अरेबियातील सर्वात मोठ्या तेल शुद्धीकरण प्रकल्पावरही (Ras Tanura) हल्ला केल्याचा दावा केला आहे. हा प्रकल्प होर्मुझ सामुद्रधुनीच्या पश्चिमेला, आखाती किनारपट्टीवर स्थित आहे. हुथी प्रवक्ते सारी यांनी सांगितले की, त्यांनी या शुद्धीकरण प्रकल्पावर बॅलिस्टिक क्षेपणास्त्र डागले, ज्यामुळे तिथे आगीचा भडका उडाला. मात्र, सौदी प्रशासनाने या हल्ल्याला दुजोरा दिलेला नाही.

तेल शुद्धीकरण प्रकल्पाच्या दक्षिणेस असलेल्या 'अल खोबार' शहरातील एका रहिवाशाने एएफपी (AFP) वृत्तसंस्थेला सांगितले की, त्यांना एका मोठ्या स्फोटाचा आवाज ऐकू आला आणि त्यांच्या फोनवर एक सतर्कतेचा अलर्ट आला. समुद्री सुरक्षा संस्था 'व्हॅनगार्ड'नेही मंगळवारी Ras Tanura मध्ये आग लागल्याची माहिती दिली. त्यांच्या म्हणण्यानुसार, आगीवर नियंत्रण मिळवण्यात आले आहे, परंतु "नुकसानीची व्याप्ती आणि तेल भरण्याच्या प्रक्रियेवर झालेला परिणाम" अद्याप स्पष्ट झालेला नाही. सौदी अरेबिया आणि येमेनमधील इराण-समर्थित हुथी बंडखोर यांच्यातील संघर्ष सप्टेंबर महिन्यापासून अधिक तीव्र झाला आहे.