52,000 कर्मचाऱ्यांना एकाचवेळी मेमो पाठवला; स्मार्टफोन चिप बनवणाऱ्या जगातील सर्वात मोठ्या कंपनीची कर्मचारी कपातीची घोषणा

Qualcomm layoffs:  सर्वच क्षेत्रांमध्ये कर्मचारी कपात होत आहे. अशातच आता  स्मार्टफोन चिप बनवणाऱ्या जगातील सर्वात मोठ्या कंपनी क्वालकॉमने कर्मचारी कपातीची घोषणा केली आहे. कंपनीने 52,000 कर्मचाऱ्यांना एकाचवेळी मेमो पाठवला आहे. लवकरच या कर्मचारी कपातीचे स्वरुप स्पष्ट होईल.  कंपनी किती कर्मचाऱ्यांना कामावरून कमी करणार आहे याची नेमकी आकडेवारी उघड झालेली नाही.

कर्मचाऱ्यांमध्ये खळबळ

क्वालकॉमने कंपनीने एकाचवेळी 52,000 कर्मचाऱ्यांना मेमो पाठवल्याने खळबळ माजली आहे. अचानक मेमो आल्याने कर्तचारी गोंधळून गेले आहेत. नोकरी राहील की नाही याची चिंता कर्मचाऱ्यांना सतावत आहे. क्वालकॉम ही स्मार्टफोन चिप्स बनवणारी एक प्रमुख कंपनी आहे.कंपनीने  जगभरात नोकरकपात करण्याची तयारी सुरू केली आहे. 

कंपनीचे सीईओ क्रिस्टियानो अमोन यांनी एक मेमो पाठवून कर्मचाऱ्यांना याबद्दल माहिती दिली आहे. कर्मचाऱ्यांना नोकरी कपातीबद्दलची माहिती मिळायला सुरुवात होईल. कर्मचाऱ्यांना कामावरून कमी करण्याचा निर्णय त्यांच्या कामाच्या स्वरूपानुसार आणि कंपनीच्या गरजेनुसार घेतला जाईल असे कंपनीच्या सीईओने सांगितले. मात्र, या कर्मचारी कपातीमुळे किती कर्मचाऱ्यांवर परिणाम होईल, याबाबत अद्याप कोणतीही माहिती जाहीर करण्यात आलेली नाही. 

क्वालकॉम कंपनीने कर्मचारी कपातीचा निर्णय का घेतला?

इलेक्ट्रॉनिक्स विक्रीतील घट आणि मेमरीच्या वाढत्या किमतींमुळे चिप्सच्या मागणीवरही परिणाम झाला आहे. यामुळेच कामकाजात सुधारणा करण्यासाठी कंपनीने कर्मचारी कपातीचा निर्णय घेतला असल्याचे प्राथमिक कारण सांगितले जात आहे. कंपनीत  ज्या क्षेत्रांमध्ये कामगिरी अपेक्षेनुसार होत नाही तिथे कंपनी बदल करण्याचा विचार करत असल्याचे सीईओंनी सांगितले.  

किती कर्मचाऱ्यांच्या नोकरीवर गदा येणार?

नोव्हेंबर महिन्यात कंपनी सर्व कर्मचाऱ्यांना कर्मचारी कपातीची माहिती देण्यास सुरुवात करणार आहे. सप्टेंबर 2025 पर्यंत, कंपनीमध्ये जगभरात 52,000 कर्मचारी होते. नेमकी किती कर्मचाऱ्यांची कपात करणार याबाबत कंपनीने कोणताही खुलासा केलेला नाही. 

सध्या स्मार्टफोनची मागणी घटली आहे. त्यातच मेमरी चिपच्या किंमती वाढल्याने कंपनीला मोठा फटका बसत आहे.  Qualcomm ही स्नॅपड्रॅगन प्रोसेसर आणि चिपसेट तयार करणारी ही कंपनी आहे. ही स्मार्टफोनसाठी महत्त्वपूर्ण तंत्रज्ञान प्रदान करते. या चीपचा वापर फोनचे प्रोसेसिंग, गेमिंग, कॅमेरा आणि एआयसाठी होतो. उत्पन्न वाढीसाठी कंपनीने मोठ्या बदलांचा निर्णय घेतला आहे. यासाठी अनेक बदल केले जाणार आहे. कर्मचारी कपात याचाच एक भाग असल्याचे समजते.  Qualcomm कंपनी एआय डेटा सेंटर मध्ये विस्तार करत आहेत. यामुळे कंपनी येथे देखील पैसा गुंतवत आहे.