SOCIAL MEDIA

Newsletter

PARTNER SITES
Select Language Select State

'मी माझ्या बायकोला फसवलंय,' Nvidia च्या सीईओंच्या ई-मेलने जगभरात खळबळ! चिनी गुप्तहेरासोबत विवाहबाह्य संबंधांची कबुली

एनव्हिडियाचे (Nvidia) मुख्य कार्यकारी अधिकारी (CEO) जेन्सेन हुआंग यांनी एका संशयित चिनी गुप्तहेरासोबत प्रेमसंबंध असल्याची कबुली दिल्याने एकच खळबळ उडाली आहे.

Reported By Shivraj Yadav Written By Shivraj Yadav
Published: Nov 09, 2026, 11:17 IST | Updated: Nov 09, 2026, 11:23 IST
Image Credit: Nvidia च्या सीईओंची विवाहबाह्य संबंधांची जाहीर कबुली!
Join

कृत्रिम बुद्धिमत्ता (AI) चिप्सची निर्मिती करणारी जागतिक आघाडीची कंपनी 'एनव्हिडिया' (Nvidia) चे संस्थापक आणि मुख्य कार्यकारी अधिकारी (CEO) जेन्सेन हुआंग (Jensen Huang) यांच्या एका कबुलीने खळबळ उडाली आहे. जेन्सेन हुआंग यांनी आपल्या कर्मचाऱ्यांना एक ई-मेल पाठवला आहे. या ई-मेलमध्ये त्यांनी एका संशयित चिनी गुप्तहेरासोबत आपले प्रेमसंबंध असल्याची कबुली दिली आहे. एका परदेशी गुप्तचर संस्थेने आखलेल्या कटाचे जेन्सेन हुआंग हे लक्ष्य होते, अशा बातम्या समोर आल्यानंतर त्यांनी ही कबुली दिली आहे. त्यांच्या खुलाशानंतर एनव्हिडियाच्या संचालक मंडळाने या प्रकरणाची स्वतंत्र चौकशी सुरू केली आहे.

'द न्यूयॉर्क टाइम्स'ने 29 ऑक्टोबर रोजी दिलेल्या वृत्तानुसार, जेन्सेन हुआंग हे एका चिनी हेरगिरी कटाचे लक्ष्य होते, जो ॲलिस हुआंग (Alice Huang alias Huang Le) नावाच्या एका चिनी व्यावसायिक महिलेद्वारे आखण्यात आला होता. तिने जेन्सेन हुआंग यांच्याशी घनिष्ठ संबंध निर्माण केले होते. ही महिला प्रगत एनव्हिडिया एआय चिप्स व गुप्त माहिती बीजिंगला पुरवत होती. सिंगापूरस्थित डेटा सेंटर कंपनी 'मेगास्पीड'मधील एक उच्च अधिकारी आणि चिनी नागरिक असलेल्या ॲलिस हुआंग यांना अमेरिकेच्या गुप्तहेर संस्थांनी चीनसाठी एक गुप्त माहिती पुरवणारी व्यक्ती म्हणून ओळख पटवली होती.

कर्मचाऱ्यांची पत्र लिहून मागितली माफी

कंपनीच्या कर्मचाऱ्यांना उद्देशून लिहिलेल्या एका ईमेलमध्ये, जेन्सेन हुआंग यांनी आपल्या कुटुंबाची आणि कर्मचाऱ्यांची जाहीर माफी मागितली आहे. हुआंग यांनी लिहिले, "मी माझ्या कुटुंबाची आणि तुम्हा सर्वांची माफी मागतो. मी माझ्या पत्नीशी प्रतारणा केली आहे. माझ्या कृत्यामुळे माझ्या पत्नीला आणि मुलांना खूप दुःख झाले आहे."

"मी जे काही केले आहे, त्याला कोणतेही समर्थन नाही. मला मनापासून खेद वाटतो." त्यांनी स्पष्ट केले की, आपल्या कृतीची आणि त्यामुळे निर्माण होणाऱ्या समस्यांची पूर्ण जबाबदारी ते स्वीकारतात आणि होणारी सर्व टीकाही मान्य करतात.

याव्यतिरिक्त, हुआंग यांनी अमेरिकेच्या राष्ट्रीय सुरक्षेचे रक्षण करण्याच्या आणि 'एनव्हिडिया'च्या (Nvidia) हितांचे जतन करण्याच्या आपल्या दृढ वचनबद्धतेवर भर दिला. त्यांनी कंपनीच्या संचालक मंडळाने सुरू केलेल्या स्वतंत्र चौकशीत पूर्ण सहकार्य करण्याचे आश्वासन दिले. तसेच, आपल्या वैयक्तिक निर्णयांसाठी आपल्या कुटुंबाला त्रास देऊ नये आणि त्यांच्या गोपनीयतेचा आदर राखावा, अशी विनंतीही त्यांनी केली.

एनव्हिडियाच्या संचालक मंडळाकडून स्वतंत्र चौकशी

सीईओंनी दिलेल्या कबुलीनंतर एनव्हिडियाच्या संचालक मंडळाने स्वतंत्र चौकशी सुरू केली आहे. रविवारी यासंदर्भात अधिकृत निवेदन काढत त्याची पुष्टी करण्यात आली. संचालक मंडळाने स्पष्ट केले की, सध्या राष्ट्रीय सुरक्षेला किंवा कंपनीच्या गोपनीय तांत्रिक माहितीशी तडजोड केल्याचा कोणताही पुरावा उपलब्ध नाही; तरीही, सर्व उपलब्ध तथ्यांची सखोल तपासणी केली जाईल.

स्वतंत्र संचालकांची एक समिती या चौकशीवर देखरेख ठेवणार आहे. बोर्डाने हुआंग आणि त्यांच्या नेतृत्वावर आपला विश्वास कायम ठेवला आहे. दरम्यान, या विषयाबाबत विचारले असता, अमेरिकेचे परराष्ट्र मंत्री मार्को रुबिओ यांनी भाष्य करण्यास नकार दिला आणि याला कंपनीची "अंतर्गत कॉर्पोरेट बाब" असे संबोधले.

मेगास्पीडसोबत सामान्य व्यावसायिक संबंध असल्याचा दावा

सध्या वादाच्या भोवऱ्यात सापडलेली 'मेगास्पीड' (Megaspeed) नावाची कंपनी अमेरिकेच्या वाणिज्य विभागाच्या (U.S. Department of Commerce) चौकशीच्या कक्षेत आहे. अमेरिकेच्या निर्बंधांना बगल देऊन, चीनला 'एनव्हिडिया' (Nvidia) चिप्स मिळवून देण्यात ही कंपनी मदत करत होती का, याचा तपास या चौकशीद्वारे केला जात आहे.

या विषयावर भाष्य करताना जेन्सेन हुआंग यांनी सांगितले की, एनव्हिडियाचे मेगास्पीड आणि त्यांच्या कार्यकारी अधिकाऱ्यांसोबतचे संबंध पूर्णपणे सामान्य आणि व्यावसायिक होते. त्यांनी असेही नमूद केले की, त्यांच्या 'जीपीयू' (GPU) चिप्सचा पुरवठा आणि वापर याबद्दलचा संपूर्ण रेकॉर्ड त्यांनी जपून ठेवला आहे.

 

Add Zee News as a Preferred Source
TAGS:

About the Author

शिवराज यादव झी 24 तास डिजिटलमध्ये सीनिअर सब एडिटर म्हणून कार्यरत आहेत. राज्यासह देश, विदेशातील चालू घडामोडींसह राजकीय, गुन्हेगारी विषयांवरील लिखाण ते करतात. हे लिखाण करताना ते सखोल पद्धतीने करण्याकडे कल असतो. वाचकाला बातमी अत्यंत सहजपणे समजावी यासाठी ती समजेल अशा पद्धतीने लिहितात. याशिवाय क्रीडा, मनोरंजन यांचीही आवड असल्याने त्या क्षेत्राशी संबंधित घडामोडींवरही लिखाण करतात.करिअरशिवराज यांनी 2009 मध्ये आपल्या पत्रकारितेतील करिअरला सुरुवात केली. सर्वात आधी Fotocorp संस्थेत कॅप्शन रायटर म्हणून काम केल्यानंतर पुढील 7 वर्ष त्यांनी टीव्हीमध्ये प्रदीर्घ अनुभव घेतला. लोकमतमधून ऑनलाइन पत्रकारितेला त्यांनी सुरुवात केली. त्यानंतर लोकसत्ता आणि सध्या झी 24 तास अशाप्रकारे त्यांच्याकडे 9 वर्षांचा अनुभव आहे.शैक्षणिक पार्श्वभूमीशिवराज यादव यांनी मुंबईतच आपलं शिक्षण पूर्ण केलं. मुंबई विद्यापीठ मान्यताप्राप्त एमडी कॉलेजमध्ये त्यांनी आर्टसमधून 12 वी उत्तीर्ण केली. यानंतर पुढील 3 वर्षं BMM मधून शिक्षण घेत पत्रकारितेत पदवी घेतली. यादरम्यान बातम्यांचं जग, त्याची समाजाला असणारी गरज आणि त्याचं महत्व याबद्दल चांगली समज निर्माण झाली.लेखन शैली आणि दृष्टीकोणशिवराज यांचं म्हणणं आहे की, प्रत्येक व्यक्तीला आपल्या आजुबाजूला तसंच देश, विदेशात नेमक्या कोणत्या घडामोडी घडत आहेत हे माहिती असलं पाहिजे. ही जबाबदारी माध्यमांवर जास्त असून, त्यांनी ती अवितरपणे पार पडली पाहिजे. प्रत्येक माहिती जशीच्या तशी वाचकांपर्यंत पोहोचवताना माध्यमांच्या खांद्यावर मोठी जबाबदारी असते.कोणत्या विषयांची सखोल जाणराजकीय घडामोडीचालू घडामोडीमनोरंजनक्रीडा
Read More

ZEENEWS TRENDING STORIES