34 हजार फूट उंचीवर विमानात रक्तरंजित थरार! वैमानिक एकमेकांना भिडले, चाकूने भोसकलं, अखेर विमान अर्ध्यावर आलं अन्....

रशिया आणि युक्रेन यांच्यात साडेचार वर्षांहून अधिक काळापासून युद्ध आणि संघर्ष सुरू आहे. या संघर्षात हजारो लोकांचा मृत्यू झाला आहे. तथापि, बुधवारी जमिनीपासून 34 हजार फूट उंचीवर, दुबईहून इस्रायलमधील तेल अवीवला जाणाऱ्या फ्लायदुबईच्या FZ1073 विमानात रशियन आणि युक्रेनियन वैमानिकांमध्ये संघर्ष झाला. दोघांमध्ये चाकू हल्ला आणि झटापटीचेही दावे केले जात आहेत. या संपूर्ण घटनेमुळे विमानातील प्रवाशांच्या जीवाला धोका निर्माण झाला होता. तथापि, इस्रायली प्रवाशांनी हस्तक्षेप करून दोन्ही वैमानिकांमधील रक्तरंजित संघर्ष थांबवला आणि विमानात सुरू असलेला संघर्ष रोखला.

विमान 34,000 फूट उंचीवरून 17,400 फूट उंचीपर्यंत खाली

मिळालेल्या माहितीनुसार, फ्लायदुबईच्या FZ1073 विमानाचा मुख्य पायलट रशियन नागरिक होता आणि सह-पायलट युक्रेनचा होता. विमानात असलेल्या प्रवाशांनी दावा केला की, दोन्ही पायलटांमध्ये झटापट झाली आणि चाकूने मारामारीसुद्धा झाली, ज्यामुळे विमानात गोंधळ निर्माण झाला. यामध्ये कॉकपिटमध्ये रक्तरंजित हाणामारी झाली आणि विमान अचानक 34,000 फूट उंचीवरून अंदाजे 17,4000 फूट उंचीपर्यंत खाली आले.

या रक्तरंजित संघर्षादरम्यान, विमानात असलेल्या इस्रायली प्रवाशांनी हल्ला करणाऱ्या वैमानिकांवर नियंत्रण मिळवण्यासाठी विमान कर्मचाऱ्यांना मदत केली. त्यानंतर विमान इस्रायलमधील तेल अवीवऐवजी सौदी अरेबियातील तबूक विमानतळावर सुरक्षितपणे उतरले.

इस्रायलने विमानाचे संरक्षण करण्यासाठी केल्या उपाययोजना

फ्लायदुबईच्या बोईंग 737 मॅक्स 8 विमानाने सुरुवातीला जमिनीवरून 7700 स्क्वॉक कोड पाठवला, जो एक मानक आंतरराष्ट्रीय आपत्कालीन संकेत आहे. तथापि, काही सेकंदांनंतर, त्याने 7500 कोड पाठवला. हा कोड विमान हायजॅक किंवा अनधिकृत हस्तक्षेपाचे चिन्ह मानला जातो. हा धोक्याचा संदेश मिळाल्यानंतर, इस्रायलला फ्लायदुबईच्या विमानाजवळ जाण्यासाठी आपली लढाऊ विमाने तयार ठेवावी लागली.

या घटनेनंतर, इस्रायलच्या पंतप्रधानांच्या कार्यालयाने एक अधिकृत निवेदन जारी करून सांगितले की, परिस्थिती नियंत्रणात असून विमानातील प्रवाशांना परत आणण्यासाठी आवश्यक कारवाई केली जात आहे.