शाळेच्या गणवेशावरून मोठा वाद! पॉर्नोग्राफीतील वापरावर बंदी घालण्याची विद्यार्थिनींची मागणी; याचिकेला हजारोंचा पाठिंबा

ब्रिटनमध्ये शाळेच्या गणवेशाचा अश्लील चित्रफितींमध्ये होणारा वापर रोखण्यासाठी दोन विद्यार्थिनींनी मोहीम सुरू केली आहे. शाळेचा गणवेश हा शिक्षण, शिस्त आणि विद्यार्थ्यांच्या ओळखीचा भाग असतो. मात्र, त्याच गणवेशाला अश्लील आशयातून लैंगिक स्वरूप दिले जात असल्याने मुलींच्या सुरक्षिततेबाबत आणि समाजाच्या दृष्टिकोनाबाबत गंभीर प्रश्न उपस्थित होत आहेत. या वापरावर कायदेशीर बंदी घालावी, अशी मागणी विद्यार्थिनींनी केली आहे.काय घडलंय नेमकं? सविस्तर जाणून घेऊया.

15 वर्षांच्या विद्यार्थिनींची पुढाकार घेऊन मोहीम

ब्रिटनमधील ऑक्सफर्डशायरच्या बिसेस्टर येथील 15 वर्षांच्या आयलिन आणि मे या दोघी ‘लिटल फेमिनिस्ट बुक क्लब’च्या सदस्य आहेत. शाळेतील चर्चेदरम्यान त्यांना शाळेच्या गणवेशाच्या विक्रीवर काही ठिकाणी निर्बंध घालण्याच्या मागणीबद्दल माहिती मिळाली. त्यानंतर त्यांनी हा विषय अधिक व्यापक पातळीवर मांडण्याचे ठरवले.अश्लील चित्रफितींमध्ये शाळेच्या गणवेशाचा वापर करण्यावर बंदी घालावी, यासाठी त्यांनी ऑनलाइन याचिका सुरू केली. त्यांच्या मते, अशा आशयामुळे शाळकरी मुलींकडे पाहण्याचा दृष्टिकोन बदलू शकतो. शाळेच्या गणवेशाशी जोडलेली निरागसता आणि विद्यार्थिनींची ओळख यांचा आदर राखला गेला पाहिजे, असे त्यांचे म्हणणे आहे.

गणवेश घालतानाही असुरक्षित वाटत असल्याची तक्रार

दोन्ही विद्यार्थिनींच्या म्हणण्यानुसार, त्यांच्या काही मैत्रिणींना शाळेचा गणवेश परिधान केल्यावर अवांछित लैंगिक टिप्पण्या किंवा त्रासाचा सामना करावा लागला आहे. काही मुलींनी वयाच्या ११ वर्षांपासून असे अनुभव आल्याचे याचिकेत नमूद केल्याचे वृत्त आहे.मे हिने शाळेबाहेर गणवेश घालणे अस्वस्थ करणारे वाटत असल्याचे सांगितले. गणवेशामुळे मुलींना त्रास सहन करावा लागणे किंवा स्वतःच्या कपड्यांबद्दल भीती वाटणे ही गंभीर बाब असल्याचे विद्यार्थिनींचे मत आहे. त्यांच्या मते, मुलींच्या कपड्यांमध्ये बदल करण्यापेक्षा त्यांना त्रास देणाऱ्यांच्या वर्तनावर प्रश्न उपस्थित केले पाहिजेत.

धक्कादायक आकडे

या याचिकेत ‘प्लॅन इंटरनॅशनल’ या संस्थेच्या 2018 मधील अहवालाचा संदर्भ देण्यात आला आहे. या अहवालासाठी १४ ते 21 वर्षे वयोगटातील 1004 जणांचे सर्वेक्षण करण्यात आले होते. त्यातील 35 टक्के सहभागी व्यक्तींनी शाळेचा गणवेश घातलेला असताना अवांछित लैंगिक लक्ष किंवा वर्तनाचा अनुभव आल्याचे सांगितले होते.तसेच, आठ टक्के सहभागी व्यक्तींनी त्यांच्या परवानगीशिवाय अनोळखी व्यक्तीने फोटो किंवा क्लिप बनवल्याचे सांगितले. यामध्ये स्कर्टखालून गुप्तपणे फोटो काढण्यासारख्या घटनांचाही समावेश होता.

चुकीच्या मानसिकतेवर प्रश्न उपस्थित करा

ब्रिटनमध्ये शाळेचा गणवेश विद्यार्थ्यांमध्ये समानतेची भावना निर्माण करण्यासाठी आणि कपड्यांवरून होणारा भेदभाव कमी करण्यासाठी महत्त्वाचा मानला जातो. मात्र, गणवेशाचा अश्लील आशयात वापर होत असल्याने त्याच कपड्यांबद्दल समाजात वेगळ्या प्रकारची प्रतिमा तयार होण्याची भीती विद्यार्थिनी व्यक्त करत आहेत.त्यांच्या मते, मुलींनी लांब स्कर्ट घालावा किंवा गणवेश बदलावा, हा या समस्येचा योग्य उपाय नाही. कोणत्याही व्यक्तीच्या कपड्यांमुळे तिचा छळ योग्य ठरत नाही. मुलांचे आणि मुलींचे संरक्षण, त्यांचा सन्मान आणि सुरक्षित वातावरण यांना प्राधान्य देणे आवश्यक आहे.