अमेरिका इराणवर टाकणार सर्वात शक्तिशाली बॉम्ब? जगाला हादवणारा रिपोर्ट; किती धोकादायक आहे Mother of All Bomb?

अमेरिका आणि इराणमधील युद्ध सध्या थांबलं असलं तरी त्याला पूर्णविराम मिळालेला नाही. अमेरिकेचे अध्यक्ष डोनाल्ड ट्रम्प युद्धात लष्करी कारवाई पुन्हा सुरू करायची की नाही याबाबत विचार करत आहेत. दरम्यान जर युद्ध झालं तर अमेरिका इराणविरुद्ध आपल्या सर्वात मोठ्या अण्वस्त्रविरहित बॉम्बच्या वापराचा विचार करत आहे, असे वृत्त सीएनएनने गुरुवारी दिले.

या वृत्ताशी जोडलेल्या काही अधिकाऱ्यांच्या मते, पेंटागॉन इराणच्या ऊर्जा पायाभूत सुविधा आणि अणुसुविधांविरुद्ध 'मदर ऑफ ऑल बॉम्ब्स' म्हणून ओळखल्या जाणाऱ्या GBU-43/B मॅसिव्ह ऑर्डनन्स एअर ब्लास्ट (MOAB) च्या संभाव्य तैनातीची चाचपणी करत आहे. हे शस्त्र इराणविरुद्ध कधीही वापरले गेलेले नाही. याची तैनाती म्हणजे संघर्षात एक मोठी वाढ ठरेल, तथापि, वॉशिंग्टनला अपेक्षित असलेले धोरणात्मक फायदे यातून मिळू शकतील की नाही, यावर प्रश्नचिन्ह कायम आहे.

'मदर ऑफ ऑल बॉम्ब्स' (MOAB) इराणच्या अणु प्रकल्पांचे नुकसान करू शकेल का?

प्रचंड विध्वंसक क्षमता असूनही, इराणच्या संशयित भूमिगत अणु सुविधांवर हल्ला करण्यासाठी 'मदर ऑफ ऑल बॉम्ब्स' (MOAB) कदाचित योग्य ठरणार नाही. यासंदर्भाती माहिती असलेल्या एका सूत्राने सीएनएनला सांगितले की, अत्यंत खोलवर असलेल्या ठिकाणांचा नाश करण्यासाठी आवश्यक असलेली क्षमता या शस्त्रात नसू शकते.

त्या सूत्राच्या मते, "MOAB हे प्रामुख्याने मोठ्या क्षेत्रातील अडथळे दूर करण्यासाठी उपयुक्त असे एक अवाढव्य शस्त्र आहे, परंतु इतर कामांसाठी ते फारसे प्रभावी नाही. हे शस्त्र मुळात खोलवर भेदून हल्ला करण्यासाठी डिझाइन केलेले नाही."

जर अमेरिकेला इराणला अणुशस्त्रे विकसित करण्यापासून रोखायचे असेल, तर या बॉम्बचा वापर केल्याने युद्धाच्या दिशेत काही लक्षणीय बदल होईल का? असा प्रश्न यानिमित्ताने उपस्थित होते.

अमेरिका आणि इस्रायल यांनी आपल्या लष्करी मोहिमेचा बचाव करताना असे म्हटले आहे की, इराणला अणुशस्त्रे मिळवण्यापासून रोखण्यासाठी ही मोहीम आवश्यक आहे. दुसरीकडे, इराणने अणुशस्त्रे विकसित करण्याचा प्रयत्न करत असल्याचा आरोप वारंवार फेटाळून लावला आहे.

सीएनएनने दिलेल्या वृत्तानुसार, लष्करी अधिकारी अशा पर्यायांचाही विचार करत आहेत ज्याच्या माध्यमातून ट्रम्प यांची मूळ युद्धाची उद्दिष्ट्ये साध्य न करताही शक्तीप्रदर्शन होऊ शकते. युद्धाच्या सुरुवातीला वॉशिंग्टनने जी उद्दिष्ट्ये साध्य करण्याचे ठरवले होते, ती जरी या हल्ल्यांमधून साध्य झाली नाहीत, तरीही ट्रम्प यांना संघर्षातून माघार घेण्याचा एक मार्ग मिळू शकतो.