थेट ढगातून कोसळतोय धबधबा? निसर्गाचा चमत्कार की आणखी काय? पाहा Video
धबधब्याचं अद्भूत दृश्य चित्रपट निर्मात्याने त्याच्या कॅमेऱ्यात कैद केलं आहे.
पावसाळ्यातील सर्वात सुंदर दृश्य म्हणजे पर्वतावरुन कोसळणारा धबधबा. वरती निरभ्र आकाश आणि खळखळत येणारे पाणी. हे धबधबे पाहून मन अगदी प्रसन्न होते. पण तुम्ही कधी आकाशातून धबधबा कोसळताना पाहिलाय का? निसर्गाच्या चमत्काराचा एक अद्भूत क्षण कॅमेऱ्यात कैद झाला आहे.
थेट ढगातून किंवा आकाशातून धबधबा कोसळत असल्याचा एक व्हिडिओ सध्या सोशल मीडियावर व्हायरल होत आहे. निसर्गाचा हा चमत्कार पाहून प्रत्येकजण थक्क होत आहे. हे अद्भूत दृश्य ब्राझीलमधील साओ पाउलो येथे असलेल्या कासा डे पेड्रा (Casa de Pedra Cave) या प्रसिद्ध गुहेच्या परिसरातील आहे. हा कोणताही चमत्कार नसून एक ऑप्टिकल इल्यूजन म्हणजेच दृष्टिभ्रम आहे.
नेमकं काय आहे प्रकरण?
चित्रपट निर्माते गिबा मोराईस (Giba Morais) यांनी हा व्हिडिओ कासा डे पेड्रा गुहेच्या आतून अगदी परफेक्ट अँगलने शूट केला आहे. त्यामुळं आकाशातूनच धबधबा कोसळतोय की काय असा भास होतो. पण खरं तर हा धबधबा आकाशातून कोसळत नाहीये तर हा फक्त एक भास होतोय. तसंच, कॅमेराची कमाल आहे.
कासा डे पेड्रा गुहेच्या महाकाय प्रवेशद्वाराच्या वरच्या भागात खडकाला एक मोठी भेग (crack) आहे. या भेगेतून पाण्याचा प्रवाह तीव्र गतीने खाली कोसळतो. पाण्याचा हा प्रवाह खाली येत असताना मागे असणारे ढग, सूर्यप्रकाश आणि पाण्याचे बारीक थेंब एकत्र आल्यामुळे तिथे आकाशात एक सुंदर रंगीबेरंगी वर्तुळ (Halo) आणि इंद्रधनुष्यासारखे वलय तयार झाले
गुहेच्या वर असलेल्या कपारीतून पाणी कोसळतेय. पण विशिष्ट पद्धतीने व्हिडिओ शूट केल्यामुळं धबधबा आकाशातून कोसळतोय, असा भास होत आहे. गुहेच्या तोंडाशी असणारा धबधबा, कॅमेऱ्याचा विशिष्ट कोन आणि सूर्यप्रकाश एकत्र आल्यामुळे हा सुंदर नजारा तयार झाला आहे.
सोशल मीडियावर हा व्हिडिओ प्रचंड व्हायरल झाला असून अल्तो रिबेरा टुरिस्ट पार्क'मधील हे दृश्य खरोखरच दुसऱ्याच जगातील असल्यासारखे वाटते. अनेकांनी गिबा मोराईस यांचे कौतुक केले आहे. तर परफेक्ट अँगलचा वापर करत छान दृष्य टिपलंस, असं कमेंटमध्ये म्हटलं आहे.
