छठपुजेचा जनसागर पाहून राज ठाकरेंची 2-5 लोकं पळून जातील,गुणरत्न सदावर्तेंचे ठाकरेंना आव्हान!
छठपूजेच्या वादावरून गुणरत्न सदावर्ते आक्रमक झाले आहेत. राज आणि उद्धव ठाकरेंना थेट आव्हान देत त्यांनी पोलिसांत तक्रार केल्याचा दावा केला. नेमकं काय म्हणाले सदावर्ते? जाणून घेऊया.
मुंबईतील छठपूजा आणि भोजपुरी गाण्यांवरून सुरू असलेल्या राजकीय वादात अॅड. गुणरत्न सदावर्ते यांनी आक्रमक भूमिका घेतली आहे. राज ठाकरे आणि उद्धव ठाकरे यांच्यावर टीका करताना त्यांनी दोघांच्या राजकारणाला ‘रसातळाला गेलेले राजकारण’ म्हटले. कधी कुंभमेळा तर कधी छठपूजेच्या मुद्द्यावरून विरोध केला जात असल्याचा आरोप त्यांनी केला. “यांना देशाची व्याख्या माहिती आहे का?” असा सवालही सदावर्ते यांनी उपस्थित केला. ठाकरे बंधूंची भूमिका ही वैचारिक दिवाळखोरी असल्याची टीका त्यांनी केली. काय म्हणाले सदावर्ते? सविस्तर जाणून घेऊया.
‘छठपूजा सुरू असेल तिथे येऊन दाखवा’
सदावर्ते यांनी राज ठाकरे, उद्धव ठाकरे यांना थेट आव्हान दिले. “तुम्ही पूजा सुरू असेल त्या ठिकाणी येऊन दाखवा,” असे ते म्हणाले. छठपूजा मुंबईत तसेच उल्हास नदीच्या परिसरातही होणार आहे. पूजा रोखण्याचा प्रयत्न करणाऱ्यांना कायदेशीर मार्गाने उत्तर दिले जाईल, असा इशाराही त्यांनी दिला. छठपूजा हा हिंदूंचा धार्मिक सण असून श्रद्धेने पूजा करण्याचा अधिकार प्रत्येकाला असल्याचे त्यांनी स्पष्ट केले. छठपुजेला जनसागर येईल, तो पाहून राज ठाकरेंची 2-5 लोकं पळून जातील, असे ते म्हणाले.
भोजपुरी गाण्यांना ‘डान्स बार गीत’ म्हणण्यावर आक्षेप
मुंबईतील काही रेल्वे स्थानकांवर छठपूजेनिमित्त भोजपुरी गाणी वाजवण्यात आली होती. या प्रकारावर मनसेने आक्षेप घेतला होता. राज ठाकरे यांनीही या मुद्द्यावरून भाजपवर निशाणा साधत मराठी आणि उत्तर भारतीयांमध्ये संघर्ष निर्माण करण्याचा प्रयत्न होत असल्याचा आरोप केला. यावर सदावर्तेंनी प्रत्युत्तर दिले. उत्सवी गीतांना डान्स बारमधील गाणी म्हणणे ही सांस्कृतिक दिवाळखोरी आहे. ‘बिहारी’ म्हणून कोणाचा अपमान करणे हे संविधानाच्या भावनेविरोधात असल्याचेही त्यांनी म्हटले.
कारवाईची मागणी
छठपूजेच्या विरोधात आणि संबंधित वक्तव्यांबाबत आपण पोलिसांत तक्रार दाखल केली असल्याचे सदावर्ते यांनी सांगितले. राज ठाकरे आणि त्यांच्या कार्यकर्त्यांवर तातडीने कारवाई करण्याची मागणी केल्याचे त्यांनी सांगितले. छठपूजेच्या आयोजनात अडथळे निर्माण झाल्यास कायदेशीर लढा देण्याची तयारी असल्याचे ते म्हणाले. मुंबई उच्च न्यायालयाच्या आदेशाचा उल्लेख करत सदावर्ते यांनी संबंधित अधिकाऱ्यांकडे आवश्यक परवानगीसाठी अर्ज करण्याचे आवाहन केले.
छठपूजेच्या मुद्द्यावर राजकारण पेटले
सदावर्ते यांनी महाराष्ट्र सरकारला छठपूजेसाठी परवानगी देण्याची विनंती केली. राज ठाकरे यांनी मात्र या संपूर्ण वादामागे भाजपचे राजकीय हित असल्याचा आरोप केला आहे. दुसरीकडे सोनू सूद यांनी आपण छठपुजेला उपस्थित राहणार असल्याचे म्हणत वादात उडी घेतली आहे. त्यामुळे हा वाद केवळ एका धार्मिक उत्सवापुरता मर्यादित न राहता भाषिक अस्मिता आणि राजकीय भूमिकांशी जोडला गेला आहे. आता राज्य सरकार, रेल्वे प्रशासन आणि पोलीस यांची भूमिका काय राहते, याकडे लक्ष लागले आहे.