वडील नाहीत, भाऊ दहावीत तर कापूस हातचा गेला पण...; अभिनेता प्रवीण तरडेंनी घेतली पोलीस भरतीचं स्वप्न पाहणाऱ्या तरुणीच्या शिक्षणाची जबाबदारी
झी २४ ताससोबत प्रवीण तरडे सोलापूरमधील पाथरीमध्ये दिवाळी साजरा करण्यासाठी पोहोचले. तिथे त्यांनी एका तरुणाच्या शिक्षणाची पू्र्ण जबाबदारी उचलली.
दिवाळी म्हटलं की, आनंद, प्रकाश आणि उत्साह...पण यंदा महाराष्ट्रातील विदर्भ, मराठवाडा, पश्चिम महाराष्ट्रातील अनेक घरांमध्ये दिवाळी आनंद काय दारात पणती लावण्यासाठीही तेल नाही. हो, दुष्काळ, पाणीटंचाई आणि आर्थिक अडचणीत बळीराजा सापडला आहे. महाराष्ट्रातील सण हे शेतीशी जोडलेले आहेत. दिवाळी हा सणदेखील शेती आणि शेतकऱ्यांप्रती कृतज्ञता व्यक्त करण्याचा सण...पण हा सण साजरा करण्यासाठी काय घरातील दैनंदिन जीवनातील गरजा असो किंवा भविष्यातील गोष्टींची चिंता या लोकांना त्रस्त करत आहे. अशातच यंदा झी २४ तासने उत्सव बांधिलकीचा या उपक्रमातून शेतकरी कुटुंबांच्या आयुष्यात आनंदाचे काही क्षण आणण्यासाठी आम्ही थेट बळीराजाच्या दारी गेलो.
झी २४ तासच्या टीमसोबत मराठी कलाकराही सहभागी झाले होते. जेव्हा झी २४ तासच्या टीम एक एक पाडाव पोहोचत होती, तिथल्या लोकांच्या समस्या ऐकून डोळे पाणावले. अशाच सोलापुरातील पाथरीमध्ये २४ तासच्या टीमसोबत अभिनेते प्रवीण तरडे पोहोचले. तिथल्या एका घरी झी २४ तासाचे संपादक कमलेश सुतार आणि अभिनेते प्रवीण तरडे गेले. घरात डोकवलं तर साध पत्र्याचं घर आणि घरात तरुण मुलगी, आई आणि दहावीत शिकणारा मुलगा...
मुलीशीशी जेव्हा प्रवीण तरडे यांनी संवाद साधला, तेव्हा मनाच्या कोपऱ्यात वेदना झाल्यात. ती तरुणी आज पोलीस भरतीसाठी तयारी करत आहे. वडील गेल्यानंतर तिने निर्धार केला की आई - भावाची जबाबदारी घेण्यासाठी आपण पोलिसात भरती होऊ या. लहानपणापासून शेतात राबल्यामुळे अंगाने मजबूत असल्याने तिने पोलिसात जाण्याचा निर्णय घेतला. वडील नसल्यामुळे तीन एकर शेतीची जबाबदारी आईवर आली. पण दुष्काळ, पाणीसंकट, पावसाचा लपंडाव यामुळे शेतातील कापूसही हिरावून गेला.
लेकीला शिक्षण आणि पोलीस भरतीसाठी लाख सव्वा लाख लागणार आहे, पण ते आणणार तरी कुठून...या विवंचनेत असताना अभिनेता प्रवीण तरडे यांनी त्या तरुणीच्या पुढील पूर्ण शिक्षणाची जबाबदारी उचलली. झी 24 तासच्या या उपक्रमातून प्रवीण तरडेंसह उत्सव बांधिलकीचा जपत त्यांच्या दारात आणि तरुणीच्या आयुष्यात प्रकाश केला. या शेतकरी कुटुंबाची दिवाळी थोडी का होईना आनंदी, प्रकाशमय करण्याचा प्रयत्न झी 24 तासने केला.