पोलिसांच्या गस्तीच्या वाहनातच गुन्हेगारांनी बनवली; पोलिसांच्या कार्यपद्धतीवर सवाल

छत्रपती संभाजीनगर : गुन्हेगारीवर नियंत्रण ठेवण्यासाठी रात्रीची गस्त घालणाऱ्या मुकुंदवाडी पोलिसांच्या कार्यपद्धतीवरच आता सवाल उपस्थित झाले आहेत. रामनगर, विठ्ठलनगर आणि संघर्षनगर परिसरात दहशत निर्माण करणारा प्रफुल्ल उर्फ लादेन याने चक्क पोलिसांच्या गस्तीवरील शासकीय वाहनात बसून रील तयार केल्याचा प्रकार समोर आला आहे. 

गणेशोत्सवादरम्यान रात्री विठ्ठलनगर चौकात तयार केलेला हा व्हिडिओ पोलिसांच्या वाहनासह सोशल मीडियावर टाकण्यात आल्याची माहिती समोर आली आहे. त्यामुळे एका गुन्हेगाराला पोलिसांच्या शासकीय वाहनात रील बनवण्याची संधी मिळतेच कशी, असा संतप्त सवाल नागरिकांकडून उपस्थित केला जात आहे.
दरम्यान, राजनगर, रेल्वेस्थानक परिसर, रामनगर, विठ्ठलनगर आणि जयभवानीनगर परिसरात मारहाण, वाहनांची तोडफोड आणि लुटमारीच्या घटना सातत्याने घडत असल्याचे स्थानिकांचे म्हणणे आहे. 

प्रफुल्ल उर्फ लादेन याच्यावर चोरी, लुटमार, मारहाण आणि दहशत निर्माण करण्यासह विविध गुन्हे दाखल असल्याचे सांगितले जाते. प्रकाशनगर मैदान परिसरात तो साथीदारांसह नशा करून व्यापारी आणि भाजी विक्रेत्यांना त्रास देत असल्याची तक्रारही स्थानिकांनी केली आहे. त्यामुळे मुकुंदवाडी पोलिसांच्या रात्रीच्या गस्तीवर आणि गुन्हेगारी नियंत्रणाच्या कार्यक्षमतेवर आता प्रश्नचिन्ह निर्माण झाले आहे.

व्हॉट्सॲप ग्रुपमधून काढल्याच्या रागातून मित्रावर कटरने हल्ला

छत्रपती संभाजीनगरमध्ये व्हॉट्सॲप ग्रुपमधून काढल्याच्या रागातून एका तरुणाने आपल्या मित्रावरच कटरने हल्ला केल्याची धक्कादायक घटना समोर आली आहे. एमआयटी कॉलेजच्या मोकळ्या मैदानावर 30 सप्टेंबर रोजी दुपारी साडेतीनच्या सुमारास हा प्रकार घडला. या हल्ल्यात बी.टेक प्रथम वर्षात शिकणारा जिशांक जगदीश पाटील हा गंभीर जखमी झाला आहे. 

कॉलेजमधील मुला-मुलींच्या व्हॉट्सॲप ग्रुपमध्ये आरोपी शिवम स्वामी याने मुलीचा फोटो टाकून अयोग्य वक्तव्य केल्याने त्याला ग्रुपमधून काढण्यात आलं होतं. याचाच राग मनात धरून शिवमने जिशांकला फोन करून ग्रुपमधून का काढलं, असा जाब विचारला. त्यानंतर आरोपीने जिशांकला एमआयटी कॉलेजच्या गेट क्रमांक पाचजवळ भेटायला बोलावलं. यावेळी शिवमने जिशांकला शिवीगाळ करत मारहाण केली आणि खिशातील कटर काढून त्याच्या मानेवर, डाव्या पायाच्या मांडीत आणि उजव्या गुडघ्यावर वार केले. या घटनेनंतर जिशांक गंभीर जखमी झाला असून, प्रकरणाचा पुढील तपास पोलिसांकडून सुरू आहे.