दोघांच्या पायाला लोखंडी साखळी अन् कुलूप, लव्ह मॅरेज केलेल्या जोडप्याचा अंत, नेमकं घडलं काय?

धुळे जिल्ह्यातून एक धक्कादायक घटना समोर आली आहे. जळगावातील दाम्पत्याने तापी नदीत उडी घेत आत्महत्या केली आहे. धक्कादायक म्हणजे एकमेकांच्या पायाला लोखंडी साखळी बांधून त्यांनी हे पाऊल उचलले. त्या मुळं या दाम्पत्याने आत्महत्या केली की काही घातपात आहे, असा संशय व्यक्त करण्यात येत आहे.

मुंबई आग्रा राष्ट्रीय महामार्गावरील सावळदे तापी पुलावरुन प्रेमविवाह केलेल्या दाम्पत्याने तापीत आत्महत्या केल्याची धक्कादायक घटना घडली आहे. विशेष म्हणजे तापीत मृतदेह आढळून आला तेव्हा पती आणि पत्नी दोघांच्या पायाला लोखंडी साखळी बांधल्याचे आढळून आले आहे. इतकेच नाही तर ही साखळी कुलूप लावून घट्ट करण्यात आली होती.

शाम हरी पाटील वय 35 आणि नासीमा मुल्ला ऊर्फ सपना शाम पाटील असे मृत दाम्पत्याचे नाव असून ते जळगाव जिल्ह्याच्या अमळनेर तालुक्यातील पाडळसे येथील आहेत. काही महिन्यांपूर्वी दोघांनी प्रेमविवाह केल्याचे सांगण्यात येत आहे. घटनेनंतर दोघांचे मृतदेह नरडाणा ग्रामीण रुग्णालयात दाखल करण्यात आले आहे. नरडाणा पोलीसांकडून या प्रकरणी पुढील तपास करण्यात येत आहे. आत्महत्येच नेमकं कारण मात्र अद्याप समजू शकलेले नाही

समोर आलेल्या माहितीनुसार, श्याम पाटील काही वर्षांपूर्वी पाडळसरे गाव सोडून कामानिमित्त उतराण येथे गेले होते. तेथे शेती आणि ट्रॅक्टर चालवण्याचे काम करत असताना त्यांची सपना यांच्याशी ओळख झाली. पुढे या ओळखीचे प्रेमात रूपांतर झाले आणि दोघांनी प्रेमविवाह केला होता.

घटनेच्या काही दिवसांपूर्वी हे दाम्पत्य बाहेरगावी गेले असल्याची माहिती समोर आली आहे. त्यानंतर अचानक दोघांचे मृतदेह तापी नदीत आढळल्याने कुटुंबीय आणि परिसरातील नागरिकांमध्ये हळहळ व्यक्त होत आहे.

चारित्र्याच्या संशयातून पत्नीची हत्या

आधी पत्नीचा व्हिडिओ बनवला नंतर पत्नीची दगडाने ठेचून हत्या केली. धाराशिव जिल्ह्यातील हासेगाव परिसरात ही भयंकर घटना घडली आहे. मिळालेल्या माहितीनुसार, चारित्र्याच्या संशयातून पतीकडून पत्नीची हत्या केल्याचे समोर आले आहे. धक्कादायक म्हणजे, चार वर्षांच्या चिमुकल्यासमोर त्याच्या आईची हत्या करण्यात आली. तर, घटनास्थळावरुन आरोपी गणेश टेकाळे फरार असून कळंब पोलिसांकडून शोध सुरू आहे. धाराशिव जिल्ह्यातून एक धक्कादायक घटना समोर आली आहे. चारित्र्याच्या संशयातून पतीने पत्नीची दगडाने ठेचून हत्या केल्याचा आरोप आहे. कळंब-येरमाळा मार्गावरील हासेगाव परिसरात ही घटना घडली. विशेष म्हणजे, हत्येपूर्वी आरोपीने पत्नीचा व्हिडिओ चित्रीत करून तो नातेवाईकांना पाठवल्याची माहिती समोर आली आहे.