ललिता तारख मराठा आंदोलकांच्या रडारवर; ट्रोलिंगमुळे हतबल! फडणवीसांची भेट घेत करणार मागणी

नितेश महाजन, जालना

मराठा आंदोलक मनोज जरांगे पाटील यांच्या अंतरवालीतील आंदोलनात काम केलेल्या पण आता जरांगे पाटलांवर केलेल्या टिकेमुळे ललिता तारख मराठा आंदोलकांच्या रडारवर आल्या आहेत. पोलिसांत तक्रार देऊनही ठोस कारवाई होत नसल्याने हतबल झालेल्या ललिता तारख यांनी थेट गृहमंत्री देवेंद्र फडणवीस यांची भेट घेऊन कारवाईची मागणी करणार असल्याचा इशारा जरांगे समर्थकांना दिला आहे.

मनोज जरांगे पाटलांनी तब्बल तीन वर्षे अंतरवाली सराटीत मराठा आरक्षणासाठी अनेक आंदोलनं केली. या आंदोलनात सुरुवातीच्या काळात अंतर वाली गावातीलच ललिता तारख यांनी महत्वाचं योगदान राहिलं. पण मनोज जरांगे पाटलांनी यापुढे अंतरवालीत आंदोलनं करणार नसल्याची घोषणा केली. त्याचबरोबर अंतरवालीतील उपोषण स्थळावरील मंडप आणि स्टेज हटवण्याच्या सूचना गावातील मराठा आंदोलकांना दिल्या. जरांगे पाटलांची सूचना पाळत गावकऱ्यांनी उपोषण स्थळावरून मंडप आणि स्टेज हटवलं. यानंतर ललिता तारख यांनी आंदोलनातून काहीही साध्य झालं नसल्याचा आरोप करत ललिता तारख यांनी हैद्राबाद गॅझेटीयर लागू होऊनही गावात एकही कुणबी जात प्रमाणपत्र निघालं नसल्याच सांगत जरांगे पाटलांवर आगपाखड केली. तसेच अंतरवालीत मनोज जरांगे पाटलांनी उपोषणं कशी केली हे वेळ आल्यावर सांगणार असल्याचा गौप्यस्फोट करत खळबळ उडवून दिली

ललिता तारख यांनी जरांगे पाटलांवर आगपाखड करतानाचा हा व्हिडीओ सोशल मीडियावर प्रचंड व्हायरल झाला आणि मराठा आंदोलकांना टीका करायला आयतं कोलीत मिळालं. त्यांच्या व्हिडीओवर अश्लील टिका टिप्पणी करण्यात येऊ लागली. शिवीगाळ झाली, धमक्यांचे फोनही आले. तसेच सोशल मीडियावर त्यांचे AI निर्मित फोटो व्हिडिओ तयार करून टाकण्यात आले. त्यामुळे ललिता तारख यांनी अंबड पोलीस ठाणे गाठत ट्रोलिंग करणाऱ्यांविरोधात तक्रार करत कारवाईची मागणी केली. त्यासाठी त्यांनी पोलिसांत रितसर लेखी तक्रारही केली. पण कारवाई होत नसल्यानं ललिता तारख हतबल झाल्या आहेत. या बदनामीमागे जरांगे पाटलांची सोशल मीडिया टीम असल्याचा आरोप ललिता तारखांनी केला आहे. जर या प्रकरणात कारवाई झाली नाही तर थेट गृहमंत्री आणि मुख्यमंत्री असलेले देवेंद्र फडणवीस यांची भेट घेऊन आरोपींवर कारवाईची मागणी करणार असल्याचा इशारा ललिता तारख यांनी दिलाय

दरम्यान मनोज जरांगे पाटील यांना दोन दिवसांपूर्वी छत्रपती संभाजीनगरच्या खाजगी रुग्णालयातून डिस्चार्ज देण्यात आल्यानंतर मनोज जरांगे पाटलांनी सर्वात आधी अंतरवाली सराटी गावात जाऊन ललिता तारख यांच्या टिकेवरून गरम झालेलं वातावरण शांत करण्याचा प्रयत्न केला.अंतरवालीत आजपर्यंत झालेल्या आंदोलनात सर्वांचंच योगदान असल्याचं जरांगे पाटील म्हणाले. त्यामुळे सगळे आपलेच असून कुणालाही काहीही बोलू नका.कुणी बोललं तरीही एका मिनिटांत डोक्यातील राग काढून टाका असं आवाहन मनोज जरांगे पाटलांनी केलं.

मनोज जरांगे पाटलांनी मराठा आंदोलकांना ललिता तारख यांच्या टिकेवरून शांत राहण्याचं आवाहन करून देखील मराठा आंदोलकांकडून आजही ललिता तारख टिकेच्या धनी ठरतायत. व्हिडीओवर येणाऱ्या अश्लील कमेंटमुळे ललिता तारख हतबल झाल्या आहेत. ललिता तारख यांनी भलेही जरांगे पाटलांवर टिकेची तोफ डागली असली तरी आजही त्यांच्या मनात मनोज जरांगें पाटलांबाबत असलेली सहानुभूती कायम आहे आणि त्यामुळेच ललिता तारख यांच्या घरातील भिंतीवर मनोज जरांगे पाटलांचा हा फोटो मोठ्या दिमाखात लावलेला पाहायला मिळतो. आपण भलेही जरांगे पाटलांवर टिका केली असली तरीही मरेपर्यंत जरांगेंचा फोटो आपल्या घरात असेल असा विश्वास ललिता तारख यांनी व्यक्त केला आहे.

मनोज जरांगे पाटलांनी अंतरवालीतील उपोषण स्थळावरचा मंडप आणि स्टेज हटवण्याच्या सूचना केल्यानंतर ललिता तारखांनी जरांगे पाटलांना लक्ष केलं.आणि तेव्हापासून सुरू झालेलं ललिता तारख यांच्यावरील ट्रोलिंग थांबायचं नाव घेत नाही आहे. मनोज जरांगे पाटलांच्या आवाहनानंतर तरी हे ट्रोलिंग थांबेल अशी अपेक्षा होती. मात्र यातही दोषींवर पोलीस कारवाई होत नसल्यानं ललिता तारख यांनी गृहमंत्र्यांकडे जाऊन कारवाईची मागणी करणार असल्याचा इशारा दिला.त्यामुळे आता ललिता तारख यापुढे काय पाऊल उचलतात हे पाहावं लागेल