तुळजाभवानी मंदिरात नवरात्रोत्सवाच्या उंबरठ्यावरच मोठा वाद! भोपे आणि पाळीकर पुजारी मंडळ आमनेसामने

ज्ञानेश्वर पतंगे, धाराशिव

धाराशिवच्या प्रसिद्ध तुळजाभवानी मंदिरात नवरात्रोत्सवाच्या उंबरठ्यावरच मोठा वाद पेटला आहे. पुजाऱ्यांना बायोमेट्रिक ओळखपत्र देण्याच्या मुद्यावरून भोपे आणि पाळीकर पुजारी मंडळ आमनेसामने आले असून, दोन्ही बाजूंकडून एकमेकांवर अत्यंत गंभीर आरोप करण्यात आले आहेत. बायोमेट्रिक कार्डमुळे बोगस पुजारी तयार होत असल्याचा दावा भोपे पुजाऱ्यांनी केलाय, तर भोपे पुजारीच मंदिरात दलाली करत असल्याचा पलटवार पाळीकर पुजाऱ्यांनी केलाय. नवरात्र जवळ आले असताना हा वाद चव्हाट्यावर आल्याने खळबळ उडाली आहे.

जगदंबा माता तुळजाभवानीच्या शारदीय नवरात्रोत्सवाला अवघे काही दिवस शिल्लक आहेत. देशभरातून लाखो भाविक आईच्या दर्शनासाठी धाराशिवमध्ये दाखल होणार आहेत. मात्र, या पवित्रोत्सवाच्या तोंडावरच मंदिरातील पुजाऱ्यांमधील अंतर्गत वाद चव्हाट्यावर आला आहे. पुजाऱ्यांच्या अधिकृत ओळखपत्र (बायोमेट्रिक कार्ड) देण्याच्या प्रक्रियेवरून दोन मोठे गट — भोपे पुजारी मंडळ आणि पाळीकर पुजारी मंडळात जोरदार जुंपली आहे.

बायोमेट्रिक ओळखपत्राच्या माध्यमातून मंदिरात बोगस पुजारी घुसडवण्याचा आणि बोगस चेहरे तयार करण्याचा डाव असल्याचा गंभीर आरोप भोपे पुजारी मंडळाने केला आहे. प्रशासनाच्या या निर्णयामुळे मूळ परंपरेला धक्का लागत असल्याचा दावा भोपे पुजाऱ्यांनी केलाय.

पाळीकर पुजारी मंडळाचे माजी अध्यक्ष किशोर गंगणे यांनी सांगितलं आहे की, "बायोमेट्रिक ओळखपत्राच्या नावाखाली याठिकाणी बोगस पुजारी तयार केले जात आहेत. मंदिराच्या परंपरेशी तडजोड करून हे सुरू आहे, जे आम्ही खपवून घेणार नाही," असे भोपे पुजारी मंडळाचे अध्यक्ष अमरराजे कदम यांनी सांगितले आहे.

भोपे पुजारी मंडळाच्या या आक्रमक भूमिकेनंतर पाळीकर पुजारी मंडळानेही तितकेच तिखट प्रत्युत्तर दिले आहे. भोपे पुजारी स्वतःला प्रशासनापेक्षा मोठे समजतात आणि मंदिराच्या कारभारात विनाकारण लुडबुड करून दलाली करत असल्याचा पलटवार पाळीकर पुजाऱ्यांनी केलाय.
"भोपे पुजारींचं काम नियम पाळण्याचं आहे, पण ते उलट मंदिरात दलाली करत आहेत. प्रशासनाच्या प्रत्येक कामात लुडबुड करणे हा त्यांचा उद्योग झाला आहे," पाळीकर पुजारी मंडळाचे माजी अध्यक्ष किशोर गंगणे यांनी म्हटले आहे.

एकीकडे बोगस पुजारी तयार केल्याचा संशय, तर दुसरीकडे मंदिरात दलाली चालल्याचे गंभीर आरोप; या सगळ्या प्रकारामुळे बायोमेट्रिक ओळखपत्राचा हा मुद्दा आता पुजारी मंडळांमधील राजकीय आणि सामाजिक वर्चस्वाची लढाई बनत चालला आहे. नवरात्रोत्सवाच्या ऐन तोंडावर हा वाद आणखी चिघळण्याची दाट शक्यता निर्माण झाली आहे. एकीकडे भाविकांची जय्यत तयारी सुरू असताना, दुसरीकडे पुजारी मात्र आपापसात भिडले आहेत. विशेष म्हणजे, एवढा मोठा वाद पेटलेला असतानाही मंदिर संस्थानच्या प्रशासनाकडून मात्र अद्याप कोणतीही अधिकृत प्रतिक्रिया देण्यात आलेली नाही.