भोपे Vs पाळीकर... नवरात्रोत्सवाच्या तोंडावरच पुजाऱ्यांमध्ये राडा; तुळजाभवानी मंदिरात सुरु झालेला नेमका वाद काय?

धाराशिवच्या तुळजाभवानी मंदिरात पुजाऱ्यांना बायोमेट्रिक ओळखपत्र देण्यावरून वाद पेटला आहे. भोपे आणि पाळीकर पुजारी मंडळ आमनेसामने आले असून, दोन्ही मंडळांच्या पदाधिकाऱ्यांकडून एकमेकांवर गंभीर आरोप करण्यात आलेत. बायोमेट्रिक ओळखपत्राच्या माध्यमातून बोगस पुजारी तयार केले जात असल्याचा आरोप भोपे पुजारी मंडळाने केला आहे. तर दुसरीकडे भोपे पुजारीच मंदिराच्या कारभारात लुडबुड करून दलाली करत असल्याचा पलटवार पाळीकर पुजारी मंडळाने केलाय. नवरात्रोत्सव काही दिवसांवर येऊन ठेपलेला असतानाच पुजाऱ्यांमधील हा वाद चिघळलाय.

भोपे पुजारी मंडळाचे आरोप काय?

तुळजाभवानी मातेच्या शारदीय नवरात्रोत्सवाला अवघे काही दिवस शिल्लक आहेत. मात्र, त्यापूर्वीच मंदिरातील पुजाऱ्यांमधील वाद चव्हाट्यावर आला आहे. पुजाऱ्यांना बायोमेट्रिक ओळखपत्र देण्याच्या निर्णयावरून भोपे आणि पाळीकर पुजारी मंडळात जोरदार जुंपली आहे. भोपे पुजारी मंडळाचे अध्यक्ष अमरराजे कदम यांनी पाळीकर पुजाऱ्यांवर गंभीर आरोप केले आहेत. बायोमेट्रिक ओळखपत्राच्या माध्यमातून बोगस पुजारी तयार करण्याचा प्रयत्न सुरू आहेत, असं भोपे पुजारी मंडळाचे अध्यक्ष अमरराजे कदम म्हणालेत.

पाळीकर पुजारी मंडळाचं जोरदार प्रत्युत्तर

भोपे पुजारी मंडळाच्या या आरोपांना पाळीकर पुजारी मंडळानेही जोरदार प्रत्युत्तर दिलंय. भोपे पुजारी प्रशासनापेक्षा मोठे नाहीत. मंदिर संस्थानच्या कारभारात लुडबुड करून दलाली करण्याचं काम भोपे पुजारी करत असल्याचा आरोप पाळीकर पुजारी मंडळाचे माजी अध्यक्ष किशोर गंगणे यांनी केला आहे.

नवरात्रोत्सवाच्या तोंडावरच वाद

त्यामुळे बायोमेट्रिक ओळखपत्राचा मुद्दा आता पुजारी मंडळांमधील वादाचा केंद्रबिंदू ठरला आहे. एकीकडे बोगस पुजारी तयार करण्याचा आरोप तर दुसरीकडे मंदिरात दलाली केल्याचा पलटवार होताना दिसतोय.  नवरात्रोत्सवाच्या तोंडावरच तुळजाभवानी मंदिरातील पुजाऱ्यांचा हा वाद आणखी चिघळण्याची शक्यता आहे. दरम्यान, दोन्ही पुजारी मंडळांकडून एकमेकांवर गंभीर आरोप होत असताना मंदिर संस्थानकडून मात्र याबाबत अद्याप कोणतीही अधिकृत प्रतिक्रिया देण्यात आलेली नाही.

वादाची पार्श्वभूमी काय

तुळजाभवानी मंदिरात पारंपरिक पुजारी व्यवस्था आहे. मुख्य पूजेचे अधिकार मराठा पाळीकर भोपे कुळाकडे सुमारे 153 मुख्य पाळीकर भोपी आणि 16 आने भोपी आहेत. याशिवाय उपाध्ये पुजारी मंडळही कार्यरत आहे. मंदिर संस्थान सार्वजनिक विश्वस्त संस्था म्हणून नोंदणीकृत आहे. बोगस पुजाऱ्यांची समस्या तुळजाभवानी मंदिरात यापूर्वीही वारंवार समोर आली आहे. भाविकांना आमिष दाखवून अनधिकृतपणे पूजा-सेवा करणारे आणि बनावट ओळखपत्र वापरणारे पकडले गेले आहेत. त्यामुळे मंदिर प्रशासनाने अधिकृत ओळखपत्र बंधनकारक केले आहेत आणि बायोमेट्रिक डिजिटल ओळखपत्र देण्याची प्रक्रियाही सुरू झाली होती.

जून 2026 मध्ये रांगेबाहेर दर्शन देण्यासाठी पैसे मागणाऱ्या दोन पुजाऱ्यांना पाच वर्षे प्रवेशबंदी घालण्यात आली होती आणि पोलिसांकडे तक्रारही केली गेली. यापूर्वी सप्टेंबर 2025 मध्ये पुजारी मंडळाच्या आजी-माजी पदाधिकाऱ्यांमध्ये वाद झाला होता. माजी अध्यक्ष किशोर गंगणे यांनी विद्यमान विश्वस्त मंडळावर मालमत्ता दुर्लक्षाचा आणि भ्रष्टाचाराचा आरोप करत धर्मादाय आयुक्तांकडे तक्रार केली होती. जीर्णोद्धार, शिखर आणि गाभाऱ्याच्या दुरुस्तीवरूनही भोपे पुजारी मंडळ आणि प्रशासन यांच्यात मतभेद झाले होते.