'भोजपुरी गाणं वाजलं तर वाईट काय?', मुंबईत वातावरण तापलं असताना भाजप नेत्याची प्रतिक्रिया
मुंबईच्या रेल्वे स्टेशनवर छटपूजेची गाणी वाजली आणि राजकीय वातावरण चांगलंच तापलं. आधीच गिरगाव चौपटी सारख्या ठिकाणांवर छटपुजेला विरोध होत असताना आता भोजपुरी गाणी वाजल्याने विरोधी पक्षांकडून टीका होतेय.
मुंबईच्या रेल्वे स्टेशनवर थेट छटपूजेची गाणी वाजण्यात आल्याचा प्रकार उघडकीस आलाय. मुंबईत हार्बर मार्गावरील वडाळा, सानपाडा यासह मध्य रेल्वेच्या आंबिवली स्टेशनवर उद्घोषणा थांबवून छटपूजेची गाणी मोठ्या आवाजात वाजवण्यात आल्याचा प्रकार समोर आला. यावरुन आता मुंबईतील राजकीय वातावरण चांगलच तापलंय. ठाकरेंची शिवसेना, मराठी एकीकरण समितीने केलीय. काय घडलंय नेमकं? सविस्तर जाणून घेऊया.
काय घडलंय नेमकं?
रेल्वे स्टेशनवर गाड्यांचं आगमन आणि प्रस्थान तसंच वेळापत्रकातील बदल आणि आपत्कालीन सूचना देण्यासाठी उद्घोषणा केल्या जातात. त्यासाठी प्रत्येक प्लॅटफॉर्म तसंच रेल्वे ब्रिजवर स्पीकर लावण्यात आलेत. मात्र, बुधवारी रेल्वेच्या अनेक रेल्वे स्टेशनवर प्रवाशांसाठीच्या नियमित उद्घोषणा बंद करून त्याऐवजी चक्क मोठ्या आवाजात छटपूजेची गाणी वाजवण्यात आली. त्यामुळे प्रवाशांमध्ये संतापाचं वातावरण निर्माण झालंय. रेल्वेच्या या मनमानी कारभाराविरोधात मनसे, शिवसेना उद्धव बाळासाहेब ठाकरे पक्ष आणि स्वायत्त महाराष्ट्र संघर्ष समितीने आक्षेप घेतलाय. दरम्यान भाजपकडून यावर प्रतिक्रिया देण्यात आली.
काय म्हणाले अतुल लोंढे?
भोजपुरी गाण वाजत असेल तर वाईट काय? असा प्रश्न अतुल लोंढे यांनी विचारलाय. एखाद्या प्लेटफॉर्म वर जर मराठी गान वाजले तर चांगली गोष्ट आहे, भोजपुरी गाण वाजत असेल तर त्यात वाईट काय? असे अतूल लोंढे म्हणाले आहेत. भोजपुरी ही चांगली भाषा आहे, यात राजकारण काय करायचे, असा प्रतिप्रश्न अतुल लोंढे यांनी विचारला.
संजय राऊतांची टीका
भोजपुरी गाण्यांवरुन खासदार संजय राऊतांनी राज्य सरकारवर टीका केलीये. प्लॅटफॉर्मवर जय महाराष्ट्र लावणार नाही मात्र ही भोजपुरी गाणी नियमात बसतात का असा सवाल त्यांनी सरकारला विचारलाय. सण साजरे करताना मराठी अस्मितेला धक्का लागू नये याची काळजी घ्यावी अशी मागणी त्यांनी केलीये.. 'महाराष्ट्राच्या संस्कृतीवर आक्रमण करण्याचा प्रयत्न करु नका असा इशाराही राऊतांनी दिलाय.
किशोरी पेडणेकरांनी सुनावलं
भोजपुरी गाण्यांवरुन किशोरी पेडणेकरांनीही सरकारला सुनावलंय. 'महाराष्ट्रात असले फाजील लाड कशाला?','यूपी, बिहारमध्ये महाराष्ट्र गीत लावलं जाईल का?' असा प्रश्न किशोरी पेडणेकरांनी विचारला. 'मराठीचा अभिजात दर्जा घालवण्याचा प्रयत्न असल्याची टीका किशोरी पेडणेकरांनी सरकारवर केलीय.
गोवर्धन देशमुखांची टीका
शहरातील सर्वच चौपाट्या, तलाव प्रदूषित होऊ नये म्हणून परवानग्या नको,सार्वजनिक पर्यटन ठिकाणी स्थानिक नागरिकांची गैरसोय थांबवा
बिहारचा हा उत्सव खाजगी ठिकाणी साजरा करावा पर्यावरण मंत्र्यांनी लक्ष घालावे. मुंबई रेल्वे स्थानकावर भोजपुरी गाणे लावणाऱ्या रेल्वेचे डोकं ठिकाणावर आहे का? तुम्ही मराठी राज्यात आहात भानावर या, आम्ही निषेध करतो. मुख्यमंत्री महोदय कुठे नेहून ठेवला महाराष्ट्र? महाराष्ट्राचे बिहार का करताय? मतांच्या भिकेसाठी अजून काय काय करणार? मुंबई महाराष्ट्र विकायला काढला आहे का? असा प्रश्न गोवर्धन देशमुखांनी विचारलाय. राज्यकर्त्यांनी काय करून ठेवले आहे महाराष्ट्राचे आता चक्क बिहारमध्ये आणून सोडले आहे आम्हाला.महाराष्ट्रात भाषिक दंगे भडकवू नका, मराठी माणसाचा संयम पाहू नका.रेल्वेने तात्काळ भोजपुरी गाणी बंद करावी अन्यथा तुमचे कार्यालयात घुसून आंदोलन करू, असा इशाराही त्यांनी दिलाय.