24 तासांत चक्रीवादळ धडकणार? 3 राज्यांना इशारा, महाराष्ट्रातील या जिल्ह्यांत पावसाचा अलर्ट

बंगालच्या उपसागरावरील कमी दाबाचे क्षेत्र मंगळवारपर्यंत तीव्र चक्रीवादळात रुपांतरित होऊ शकते. त्याचाच परिणाम म्हणून देशातील काही राज्यांना मुसळधार पावसाचा इशारा देण्यात आला आहे. महाराष्ट्रात मात्र उन्हाचा चटका कायम असून उपसागरातील वादळी प्रणालीमुळं विदर्भासह राज्यात पावसाला पोषक हवामान निर्माण होत आहे. तर, उर्वरित राज्यात हवामान मुख्यतः कोरडे राहण्याचा अंदाज आहे.

राज्यात उन्हाचा चटका कायम असून गेल्या 24 तासांत अमरावती येथे उच्चांकी 37.2 अंश सेल्सिअस तापमानाची नोंद झाली आहे. तर, उर्वरित राज्यात किमान तापमानात चढ-उतार पाहायला मिळतेय. आज 26 ऑक्टोबर रोजी निरभ्र आकाशासह उन्हाचा चटका आणि उकाडा कायम राहण्याची शक्यता आहे. बंगालच्या उपसागरातील वादळी प्रणालीमुळं विदर्भात मात्र पावसाला पोषक हवामान होण्याची शक्यता आहे.

मुंबईसह कोकणात 26 ऑक्टोबर रोजी हवामान कोरडे असेल. येत्या 2-3 दिवसांत दक्षिण कोकणातील सिंधुदुर्ग, रत्नागिरी जिल्ह्यांत हलक्या पावसाची शक्यता आहे. उत्तर महाराष्ट्रातील धुळे, नंदुरबार, जळगाव, नाशिक, अहिल्यानगर या जिल्ह्यांत 26 ऑक्टोबर रोजी पावसाचा अंदाज नाही. नाशिकच्या घाटमाथा परिसरातही हवामान कोरडे राहण्याची शक्यता आहे.

26 ऑक्टोबर रोजी राज्यातील बहुतांश भागात कोरडे हवामान राहण्याची शक्यता असली तरी पुढील दोन दिवसांत काही जिल्ह्यांत पुन्हा पावसाची शक्यता वर्तवण्यात आली आहे. त्यानुसार, विदर्भात वादळी पावसाची शक्यता वर्तवण्यात आली आहे.

भारतीय हवामान विभागाने ओडिशा, आंध्र प्रदेश आणि पश्चिम बंगाल या राज्यातील लोकांना सतर्क राहण्याचे अवाहन केले आहे. हे वादळ किनारपट्टीवर धडकल्यानंतर आंध्रसह शेजारी राज्यांत वाऱ्याचा वेग ताशी 115 ते 140 राहू शकतो. रविवारी पहाटे हे कमी दाबाचे क्षेत्र ताशी पाच किमी वेगाने पुढे सरकत होते. मंगळवारी त्याचे रुपातंर चक्रीवादळात होण्याची शक्यता आहे.

चक्रीवादळ आंध्र किनारपट्टीवर धडकले तर त्याचे नाव अर्णब असेल. या काळात वाऱ्याचा वेग ताशी 115-125 किमी असू शकतो. हा वेग ताशी 140 किमीपर्यंत वाढण्याची शक्यता आहे. या चक्रीवादळाचा परिणाम म्हणजे ओडिशा, पश्चिम बंगाल, आंध्र प्रदेश, तामिळनाडू, छत्तीसगड, केरळ आणि लगतच्या परिसरात मुसळधार पाऊस होऊ शकतो.