‘राज ठाकरेंना रात्रभर...’, दादर स्टेशन नमाकरणावरुन 'मनसे जातीवादी पक्ष' म्हणत हल्लाबोल! 'हिंमत कशी..', 'हा देश बाबासाहेबांनी...'
राज्याचे मुख्यमंत्री देवेंद्र फडणवीस यांनी दादरचं नाव बदलण्यासंदर्भातील भूमिका मांडल्यानंतर संताप व्यक्त करत मनसे नेत्याने या मागणीला विरोध केल्यानंतर या प्रकरणावरुन थेट राज यांच्यावर निशाणा साधण्यात आला आहे.
दादर रेल्वे स्थानकाला 'चैत्यभूमी' हे नाव देण्याच्या मागणीला विरोध करणारे महाराष्ट्र नवनिर्माण सेनेचे नगरसेवक यशवंत किल्लेदार यांनी उघडपणे विरोध केल्याने डॉ. बाबासाहेब आंबेडकर समर्थकांनी संताप व्यक्त केला आहे. रिपब्लिकन पार्टी ऑफ इंडिया (सचिन खरात गट) पक्षाचे अध्यक्ष सचिन खरात यांनी किल्लेदार यांची राज ठाकरेंनी पक्षातून हकालपट्टी करावी अशी मागणी केली आहे. सचिन खरात यांनी एख व्हिडीओ जारी करत किल्लेदार यांच्यावर निशाणा साधला आहे.
किल्लेदार यांच्या पाठीमागे कोण
"फडणवीस यांनी काल दादर रेल्वे स्थानकाचं नाव 'चैत्यभूमी' असं करणार असल्याची ऐतिहासिक घोषणा केली. मात्र या घोषणेमुळे मनसेचे नेते तसेच दादर येथील नगरसेवक यशवंत किल्लेदार यांचं पित्त उसळलं. आम्हाला माहितीये यशवंत किल्लेदार यांच्या पाठीमागे कोण आहे," असं म्हणत सचिन खरात यांनी पुढे राज यांच्यावरच निशाणा साधला आहे.
पोस्टला तुमचं समर्थन आहे की नाही?
"15 वर्षांपूर्वी आंबेडकरी समाज यासाठी तीव्र आंदोलन करत होता त्यावेळी राज ठाकरे यांनी या मागणीला जाहीरपणे विरोध केला होता. आम्हाला सांगितलं आहे बाबासाहेबांनी, जो समाज आपला इतिहास विसरतो तो इतिहास निर्माण करू शकत नाही. आम्हाला वाटलच की राज ठाकरेंना रात्रभर झोप लागणार नाही. तसेच झाले आहे. बाहेरच्या लोकांनी जी मागणी केली ती दादरकरांवर थोपवत हे नाव बदलण्याचं सुरु आहे. तीव्र निषेध असं लिहिलं आहे यशवंत किल्लेदार यांनी आपल्या पोस्टमध्ये. त्यांनी फेसबुक पोस्टमधून बाबासाहेबांच्या नावाला विरोध केला आहे. मनसे हा पक्ष जातीवादी आहे आम्हाला माहिती आहे. पण राज ठाकरेंना यांना मी मागणी करत आहे की किल्लेदारांच्या पोस्टला तुमचं समर्थन आहे की नाही हे जाहीरपणे सांगावं," अशी मागणी सचिन खरात यांनी केली आहे.
यशवंत किल्लेदारला पाकिस्तानला पाठवा
"याने (किल्लेदार यांनी) जो बाहेरचे लोक असा उल्लेख केला आहे त्याला सांगतो, संविधानिर्मातने महामानव बाबासाहेब आंबेडकरांचा इतिहास वाचला. आम्ही या देशाचे मूळ निवासी आहेत. त्यामुळे बाहेरून कोण आले हे सर्वश्रूत आहे. दादारमध्ये, या भागामध्ये कोण किती लोक राहतात, सर्व जातीधर्माचे लोक राहतात. बाहेरचे लोक कोणाला म्हणता? अरे लाज वाटली पाहिजे. हिंमत कशी केली? हा देश बाबासाहेबांनी लिहिलेल्या संविधानानुसार चालतो. या देशात राहायचं असले तर बाबासाहेबांना मानाव लागेल. संविधानानुसार रहावं लागेल. तुम्ही हिंमत कशी करता बाबासाहेबांच्या नावाला विरोध करण्याची? मी मागणी करत आहे, राज ठाकरेजी यशवंत किल्लेदारांना पक्षातून तातडीने हटवा. राज्य सरकारकडे मागणी करतो की या यशवंत किल्लेदारला पाकिस्तानला पाठवा," असं सचिन खरात म्हणाले आहेत.