राज ठाकरेंच्या पोलीस सुरक्षेवरून मनसे अन् भाजपाची जुंपली! फडणवीसांचाही उल्लेख, मनसेचं ओपन चॅलेंज; 'हिंमत असेल तर...'

भारतीय जनता पार्टीचे नेते परिणय फुके यांनी महाराष्ट्र नवनिर्माण सेनेचे अध्यक्ष राज ठाकरेंना देण्यात आलेली सुरक्षा काढून टाकण्यासंदर्भात केलेल्या विधानानंतर राज ठाकरेंच्या पक्षाचे नेते आक्रमक झाले आहेत. त्यांनी परिणय फुकेंना थेट राज यांची सुरक्षा काढून दाखवावीच असं आव्हान दिलं आहे. मात्र परिणय फुके नेमकं काय बोलले होते आणि त्यावर मनसे नेत्यांनी काय म्हटलंय, जाणून घेऊयात...

राज काय म्हणाले?

राज ठाकरेंनी बुधवारी मुंबईमध्ये प्रसारमाध्यमांशी बोलताना केंद्र सरकारवर निशाणा साधला.  राज यांनी पुढच्या दोन-चार महिन्यात देशात काहीतरी मोठी गडबड होईल असं सूचक विधान करताना, पुढील काही महिन्यात अख्खा देश रस्त्यावर आला तरी आश्चर्य वाटणार नाही असं म्हटलं. दसऱ्यानिमित्त नागपुरमधील मेळाव्यात सरसंघचालक मोहन भागवत यांनी रेजीम चेंजसंदर्भात केलेल्या विधानावरुन राज यांनी संघाचा समाचार घेतल्याचं दिसून आलं. "बदल हा गरजेचा असतो हाफ यांची फुल पँट नाही का झाली? त्यांना हवा असलेला निकाल त्यांना मिळतो. सुप्रीम कोर्टाने विचार केला पाहिजे आपण काय प्रकारचे निर्णय देत आहोत. कुठल्या स्वायत्त संस्था राहिल्या आहेत का? पत्रकारिता तरी राहिली आहे का? रेजीम चेंज हे मोहन भागवंताच्या हातात थोडी आहे? ते लोकांच्या जनतेच्या हातात आहे. 2014 मध्ये आलेली सत्ता ही नरेंद्र मोदींमुळे आलेली आहे. आरएसएसमुळे आलेली नाही. रेजीम चेंज करायचा असेल तर जनता आणि मोदी पाहतील," असा खोचक टोला राज यांनी भारतीय जनता पार्टीची मातृक संस्था असलेल्या राष्ट्रीय स्वयंसेवक संघाला लगावला.

परिणय फुके काय म्हणाले?

यावरुनच फुकेंनी राज ठाकरेंना टोला लगावताना, "राहुल गांधींनी सध्या ॲडिशनल चार्ज त्यांच्याकडे दिल्या त्यामुळे ते असे वक्तव्य करत आहेत. राज ठाकरे इतक्या मोठ्या रेझीम चेंजबाबत ज्या बाता करत आहेत ते स्वतः गृहमंत्री देवेंद्र फडणवीस यांनी दिलेल्या सिक्युरिटीच्या आधारावर बोलत आहेत.  त्यांच्याकडे संविधानिक पद नाही. त्यामुळे त्यांना ही सिक्युरिटी देण्याची गरज नाही. म्हणूनच ज्या दिवशी ही सिक्युरिटी काढण्यात येईल त्यावेळी ते घराबाहेर निघणार नाहीत," असं विधान केलं आहे.

हिंमत असेल, तर राज ठाकरेंचे पोलीस संरक्षण काढून दाखवा

ठाणे, पालघरमधील मनसेचे नेते अविनाश जाधव यांनी या टीकेवरुन परिणय फुकेंबद्दलचा एक किस्सा सांगितला आहे. अविनाश यांनी आपल्या सोशल मीडियावर केलेल्या पोस्टमध्ये हा किस्सा सांगितलाय. "काही महिन्यांपूर्वी परिणय फुके यांचा कौटुंबिक वाद साहेबांकडे आला होता. साहेबांनी मला त्यांना भेटायला सांगितले होते;  कौटुंबिक वादात पडायचे नाही, ही साहेबांची भूमिका होती. त्या वेळी आम्ही हस्तक्षेप केला असता, तर परिणय फुके यांना महाराष्ट्रात तोंड दाखवायला जागा उरली नसती," असं अविनाश जाधव यांनी म्हटलं आहे. इतकचं नाही तर, "सन्माननीय राजसाहेब ठाकरे हे मैत्रीच्या दुनियेतील राजामाणूस आहेत! आणि तुझ्यात जर हिंमत असेल, तर साहेबांचे पोलीस संरक्षण काढून दाखव. मग तुम्हीही महाराष्ट्रात कसे फिरता, ते बघू!" असं थेट चॅलेंज अविनाश जाधव यांनी दिलं आहे.

मोदींमध्ये हिंमत असेल तर...; संदीप देशपांडेंचं थेट आव्हान

मनसेचे नेते संदीप देशपांडेंनीही यावरुन परिणय फुकेंना सुनावलं आहे.  "हजार विद्यार्थ्यांच्या आंदोलनाला 45 हजार पोलिस ठेवणाऱ्यांनी आमच्यासमोर बात मारू नये. कोणाला सुरक्षा द्यायची आणि नाही ते देवेंद्र फडणवीस म्हणून नाही तर गृहमंत्री म्हणून ठरवतात.  तुम्ही जंतर-मंतरवर पोलिस न लावता मुलांना आंदोलन करू द्या. आहे का हिंमत? मोदी आणि शहांची आहे का हिंमत? तुम्ही घाबरत आहात म्हणून मुलांना ताब्यात घेत आहात. त्यांना पॅलेट गन मारता. मोदींमध्ये हिंमत असेल तर एकटे फिरून दाखवा. गृहमंत्री आणि मुख्यमंत्री त्यांचा आहे. सांगा तुम्ही त्यांना, काढून दाखवा सिक्युरिटी," असं थेट आव्हान संदीप देशपांडेंनी परिणय फुकेंना दिलं आहे. 

आता मनसे नेत्यांनी दिलेल्या या आव्हानाला परिणय फुके किंवा भाजपा नेते काय उत्तर देतात हे पाहणं महत्त्वाचं ठरणार आहे.