बोरीवलीत समुद्रकिनाऱ्यावर अडकलेल्या जहाजात सापडले 4 मृतदेह

मुंबई क्राईम :  मुंबईच्या बोरिवली पश्चिमेकडील गोराई-मनोरी समुद्रकिनाऱ्यावर गेल्या चार महिन्यांपासून अडकून पडलेल्या एका मोठ्या जहाजात चार जणांचा मृत्यू झाल्याने खळबळ उडाली आहे. मिळालेल्या प्राथमिक माहितीनुसार, हे जहाज चार महिन्यांपूर्वी मनोरीच्या समुद्रकिनाऱ्यावर येऊन अडकले होते. पोलिसांनी घटनास्थळावरुन चारही मृतदेह ताब्यात घेतले आहेत. 
 

जहाजाच्या मालकाविरोधात गुन्हा दाखल असून तो परदेशात फरार असल्याची माहिती समोर आली आहे.  या जहाजाचा वापर तेलाशी संबंधित बेकायदेशीर व्यवहारांसाठी केला जात असल्याचा प्राथमिक दावा करण्यात येत आहे. मात्र, या दाव्याची अधिकृत पुष्टी अद्याप झालेली नाही.

दरम्यान, जहाजावर चोरी करण्यासाठी काही चोरट्यांनी यापूर्वी दोन वेळा प्रवेश केल्याची माहिती पोलिसांच्या तपासातून समोर येत आहे. पहिल्यांदा सुमारे अडीच लाख रुपयांचा मुद्देमाल, तर दुसऱ्यांदा सुमारे पाच लाख रुपयांचा मुद्देमाल चोरी केल्याचा दावा आहे. 

तिसऱ्यांदा चोरी करण्यासाठी आठ जणांची टोळी स्पीडबोटच्या मदतीने जहाजावर गेल्याची प्राथमिक माहिती आहे. यातील एक जण बोटीवर थांबला, तर सात जण जहाजाच्या आत गेले.  त्यापैकी चार जण जहाजाच्या आतील भागात पाईप कटिंग करण्यासाठी गेल्याचे सांगण्यात येत आहे. मात्र, याचवेळी जहाजाच्या आतील भागात गॅस गळती झाल्याचा संशय आहे. गॅस गळतीमुळे चारही जणांचा गुदमरून मृत्यू झाल्याची प्राथमिक माहिती समोर आली आहे.

घटनेची माहिती मिळताच गोराई पोलिसांनी घटनास्थळी धाव घेतली. तसेच नौदल विभागाला माहिती देण्यात आली. घटनास्थळी असलेल्या इतर संशयितांपैकी तिघांना पोलिसांनी ताब्यात घेतल्याची माहिती आहे.

जहाजाच्या आत असलेले मृतदेह बाहेर नौदलाच्या मदतीने बाहेर काढण्यात आले . पोलिसांकडून घटनास्थळाचा पंचनामा करून पुढील तपास सुरू करण्यात आला आहे. या संपूर्ण प्रकरणात जहाजावर नेमके काय घडले, चार जणांचा मृत्यू नेमका कशामुळे झाला आणि यामागे चोरीचा प्रयत्न होता का, याचा तपास आता गोराई पोलिसांकडून केला जात आहे.

जालन्यात हॉटेलचालकाची निर्घृण हत्या 

जालन्यात हॉटेलचालकाची निर्घृण हत्या करण्यात आलीय. घनसावंगी तालुक्यातील रांजणी-कुंभार पिंपळगाव रस्त्यावरील जिरडगाव जवळच्या कंडारी फाट्याजवळ ही घटना घडलीये. 55 वर्षीय नामदेव पाईकराव असं खून करण्यात आलेल्या हॉटेल चालकाचं नाव आहे धारदार शस्त्राने वार करून ही हत्या करण्यात आली आहे. मात्र घटनेमागील कारण अद्याप समोर आलेलं नाही.या घटनेची माहिती मिळताच घनसावंगी पोलिसांनी घटनास्थळी धाव घेऊन मृतदेह उपजिल्हा रुग्णालयात शवविच्छेदनासाठी पाठवलाय.घनसावंगी पोलिसांनी या प्रकरणी गुन्हा दाखल केला असून पोलीस अधिक चौकशी करतायत.