उड्डाणपुलाचे बांधकाम सुरू केले, नंतर काहीच दिवसांत तीन खांब पाडण्याची नामुष्की, काय घडलं नेमकं?

घाटकोपरसाठी नव्या रेल्वे उड्डाणपुलाचे बांधकाम सुरू झाले. पण बांधकाम सुरू केल्यानंतर अवघ्या काही दिवसांतच तीन खांब पाडण्याची नामुश्की प्रशासनावर आली आहे. उड्डाणपुलाच्या आराखड्यात त्रुटी निर्माण झाल्या कारणाने सुमारे 30 टक्के काम पूर्ण झाल्यानंतर आधीच उभारण्यात आलेले तीन खांब अंशतः पाडण्यात येत आहेत. वाहतुकीची भविष्यातील गरज लक्षात घेऊन हा बदल करण्यात येत असून महाराष्ट्र रेल्वे इन्फ्रास्ट्रक्चर डेव्हलपमेंट कॉर्पोरेशनकडून (महारेल) अधिक उंचीवर पुन्हा बांधकाम होणार आहे.

घाटकोपर-विक्रोळी स्थानकांदरम्यान अंधेरी-घाटकोपर लिंक रोडवरील जुना पादचारी पूल धोकादायक झाल्याने तो पाडून नव्याने उभारण्यात येत आहे. मूळ आराखड्यानुसार या ठिकाणी मुख्य पूर्व-पश्चिम वाहतुकीसाठी केबल आधारित पूल प्रस्तावित होता. नव्या आराखड्यानुसार नवीन दुहेरी पूल उभारण्यात येणार आहे.

एलबीएस जंक्शन ते पंतनगर जंक्शनदरम्यान सध्याच्या रस्त्याच्या पातळीवर स्थानिक वाहतुकीसाठी स्वतंत्र रेल्वे उड्डाणपूल उभारला जाणार आहे. या पुलावरून पूर्व-पश्चिमदरम्यानची घाटकोपर स्थानिक वाहतूक थेट करता येणार आहे.

प्रकल्पाचे काम अद्याप सुमारे 30 टक्केच पूर्ण झाले असल्याने आराखड्यातील बदल  करण्याची ही योग्य वेळ आहे. पूल पुढील ८० ते १०० वर्षे वापरला जाणार आहे. काम पूर्ण झाल्यानंतर बदल करण्यापेक्षा आताच आवश्यक सुधारणा करणे अधिक योग्य आहे, अशी माहिती अधिकाऱ्यांनी दिली आहे.

दरम्यान, त्याआधीही एमएमआरडीवर एक पूल पाडण्याची नामुष्की ओढावली होती. मुंबई महानगर प्रदेश विकास प्राधिकरणाच्या (MMRDA) एका मोठ्या चुकीमुळे मेट्रो-7ए (Metro 7A) मार्गिकेचा सुमारे 260 कोटी रुपये खर्चून बांधलेला पूल (व्हायाडक्ट) पाडण्याची नामुश्की ओढवली आहे. नियोजन आणि डिझाइनमधील गंभीर त्रुटींमुळे ही परिस्थिती निर्माण झाली आहे.

मेट्रो-7ए ही मार्गिका अंधेरी पूर्व ते मुंबई आंतरराष्ट्रीय विमानतळाला जोडणारी आहे. विलेपार्ले पूर्व येथील 'एअरपोर्ट कॉलनी' स्थानकाजवळ बांधण्यात आलेल्या उन्नत पुलाची (Elevated Viaduct) उंची विमानतळ प्राधिकरणाच्या नियमां पेक्षा (Funnel Zone Restrictions) तब्बल 2.5 मीटरने जास्त झाली होती.