दादर रेल्वे स्थानकाचे नाव बदलून ‘चैत्यभूमी’ करण्यात येणार आहे. दादर रेल्वे स्थानकाला ‘चैत्यभूमी’ हे नाव देण्यास राज्य सरकारने यापूर्वीच तत्त्वतः मान्यता दिली असून, केंद्र शासनाकडून आवश्यक प्रक्रियेची पूर्तता विधिमंडळ अधिवेशनात करून नामकरणाची कार्यवाही करण्यात येईल, अशी घोषणा मुख्यमंत्री देवेंद्र फडणवीस यांनी केली आहे. मात्र या घोषणेनंतर नवा वाद उफाळला आहे. अनेक राजकीय पक्षांनी चैत्यभूमी नावाला विरोध केला आहे. पण सध्या एक प्रश्न चर्चेत आहे तो म्हणजे, दादर हे नाव कसं मिळालं? वाचा ही रंजक कथा.
मुंबई ही सात बेटांची आहे. सात बेटं जोडून हे शहर वसवण्यात आलं. तर, 1968 साली दादर रेल्वे स्थानक तयार झालं. पण या स्थानकाला दादर हेच नाव का दिलं गेलं? यामागे प्राचीन मुंबईचा एक रंजक इतिहास आहे. दादर हे मुंबई शहराला जोडणारं आणि सर्वात गर्दीचं स्थानक आहे. पश्चिम आणि मध्य रेल्वेचा मध्यबिंदू म्हणून दादर स्थानकाकडे पाहता येतं. तर अशा या दादरला मुंबईकरांच्या हृदयात एक वेगळंच स्थान आहे.
मराठी भाषेत दादर या शब्दाचा अर्थ जिना किंवा शिडी (पायऱ्यांचा मार्ग) असा होतो. यावरुन या रेल्वे स्थानकाला दादर हे नाव मिळालं. उत्तर मुंबईतून (सालसेट आणि माहीम बेटाकडून) दक्षिण मुंबईतील मुख्य बेट-शहराकडे जाण्यासाठी हा मधला भाग एखाद्या 'शिडी'सारखा किंवा प्रवेशद्वारासारखा काम करायचा. या बंधाऱ्यावरुन दादर नाव ठेवलं असे म्हटले जाते.
माहिम बेट आणि परळ बेटाला जोडणाऱ्या बंधाऱ्याला दादर असे म्हटले जात होते. दादरमधून जाणाऱ्या दोन रेल्वे ट्रॅकमुळे तेथे दोन भाग निर्माण झाले होते. दोन्ही भाग जोडण्यासाठी आणि लोकांना ये जा करण्यासाठी एक ब्रीज निर्माण करण्यात आला. ब्रीजला मराठीत दादर म्हटले जाते. त्यामुळे त्यास दादर असेही म्हटले गेले.
आणखी एका संदर्भानुसार, मुंबईचे मूळ रहिवासी असलेल्या कोळी मच्छीमारांनी आपल्या होड्या किनाऱ्यावर आणण्यासाठी आणि खाडीच्या दलदलीतून वर चढण्यासाठी येथे दगडाच्या पायऱ्या बांधल्या होत्या. कोळी समाज या दगडी पायऱ्यांना स्थानिक भाषेत 'दादर' म्हणायचा. पुढे ब्रिटिशांनी जेव्हा या पायऱ्यांजवळ रेल्वे स्थानक उभारले, तेव्हा त्यांनी या स्थानकाला 'दादर' हेच नाव दिले.