बारावीला असलेल्या विद्यार्थी आणि पालकांना सर्वात मोठा दिलासा! आता 2027 मध्ये...; राज्य सरकारचा निर्णय
महाराष्ट्र सरकारने बारावीच्या विद्यार्थ्यांना दिलासा देणारा एक मोठा निर्णय घेतला असून याचा फायदा विद्यार्थी आणि शिक्षकांनाही होणार आहे. नेमका हा निर्णय काय आणि त्याचा कसा फयदा होणार जाणून घेऊयात सविस्तरपणे...
बारावीच्या विद्यार्थ्यांचं टेन्शन कमी करणारा एक महत्त्वाचा निर्णय राज्य सरकारकडून घेण्यात आला आहे. सामायिक प्रवेश परीक्षेची (सीईटी) दोनदा संधी देण्याच्या निर्णयात महत्त्वाचा बदल करण्यात आला आहे. बारावीच्या विद्यार्थ्यांना दिल्या जाणाऱ्या दोन संधींसंदर्भातील नव्या निर्णयानुसार, डिसेंबरमध्ये होणारी प्रस्तावित सीईटी रद्द करण्यात आली आहे. आता दोन्ही सीईटी परीक्षा बारावीच्या बोर्ड परीक्षेनंतर घेतल्या जाणार आहेत. त्यामुळे विद्यार्थ्यांचा अभ्यासाचा ताण कमी होणार असून बारावीचा अभ्यासक्रम पूर्ण करण्यासाठी शिक्षकांना अधिक वेळ मिळणार असल्याने हा शिक्षकांसाठीही दिलासा देणारा निर्णय आहे.
विद्यार्थ्यांना नेमका कोणता फायदा होणार?
विद्यार्थ्यांना सीईटीमध्ये चांगले गुण मिळविण्यासाठी दोन स्वतंत्र संधी उपलब्ध होणार आहेत. डिसेंबरमध्ये प्रस्तावित असलेली पहिली सीईटी उच्च व तंत्रशिक्षण विभागाने रद्द केली आहे. आता दोन्ही सीईटी परीक्षा बारावीच्या बोर्ड परीक्षेनंतर आयोजित केल्या जाणार आहेत. विद्यार्थ्यांना पहिल्या परीक्षेनंतर दुसऱ्या परीक्षेची तयारी करता यावी, यासाठी दोन्ही परीक्षामध्ये चार आठवड्यांचे अंतर ठेवण्यात येणार आहे. पूर्वी डिसेंबर 2026 आणि एप्रिल 2027 अशा दोन वेळा परीक्षा घेण्याची योजना होती. विशेषतः ग्रामीण भागातून पालक, शिक्षक आणि विद्यार्थ्यांच्या तक्रारींमुळे डिसेंबरचा अटेम्प्ट रद्द करण्यात आला आहे.
या निर्णयामुळे बारावीचा अभ्यास आणि सीईटीची तयारी एकाच वेळी करण्याचा ताण विद्यार्थ्यांवर राहणार नाही. ग्रामीण भागातील विद्यार्थ्यांना याचा विशेष फायदा होणार आहे. गावाकडील विद्यार्थ्यांनी अभ्यासाचे नियोजन करण्यासाठी आणि परीक्षेची तयारी करण्यासाठी अधिक वेळ मिळणार आहे. दोन्ही सीईटी परीक्षांपैकी विद्यार्ध्यांना मिळालेल्या सर्वाधिक गुणांचा प्रवेशासाठी विचार केला जाणार आहे.
विरुद्ध बाजूचेही मत
बारावीचा संपूर्ण अभ्यासक्रम वेळेत पूर्ण करण्यासाठी शिक्षकांना अधिक वेळ उपलब्ध होईल. मात्र त्याचवेळी या निर्णयाबद्दल विरुद्ध बाजूनेही शंका व्यक्त केली जात आहे. सीईटी परीक्षेत पारदर्शक कारभार अधिक असायला हवा, असं अभ्यासकांचं मत आहे. कारभारामध्ये पारदर्शकता नसेल तर शंका घेण्यास वाव कायम राहील, असेही शिक्षण तज्ज्ञांचं या निर्णयाबद्दलचं मत आहे.
परीक्षा केंद्राच्या नियमात बदल
एकीकडे विद्यार्थ्यांचं अभ्यासाचं टेन्शन कमी करताना बारावीच्या मुख्य परीक्षेनंतर दोन्ही सीईटी घेण्याचा निर्णय घेण्यात आला असला तरी परीक्षा केंद्राचे काही नियमही बदलले आहेत. विद्यार्थ्यांना आता आवडीचा जिल्हा निवडता येणार नाही. केंद्र बारावी पूर्ण केलेल्या कॉलेजच्या पिन कोडनुसार त्याच जिल्ह्यात किंवा जवळच्या परिसरात दिले जाईल.
