मुंबई-पुणे प्रवास आता आणखी वेगवान होणार, मिसिंग लिंकनंतर 'या' महामार्गाचा विस्तार होणार
मुंबई-पुणे महामार्गाबाबत एक मोठी बातमी समोर येतेय. आता जुन्या महामार्गाचा विस्तार करण्यात येणार आहे. कसा असेल हा प्रकल्प, जाणून घेऊयात
मुंबई ते पुणे प्रवासासाठी लागणारा वेळ आता आणखी कमी होणार आहे. काही दिवसांपूर्वी नवीन मुंबई-पुणे द्रुतगती महामार्गाचे सहापदरीकरण करण्याचा निर्णय घेण्यात आला होता. त्याचबरोबर आता जुन्या मुंबई-पुणे महामार्गाचेही सहापदरीकरण करण्याचा निर्णय घेण्यात आला आहे. या प्रकल्पाची जबाबदारी महाराष्ट्र राज्य रस्ते विकास महामंडळाने घेतली असून याबाबत लवकरच सविस्तर प्रकल्प आराखडा तयार करण्यात येणार आहे.
जुन्या-मुंबई महामार्गाचे सहापदरीकरण प्रकल्पासाठी सल्लागाराची नियुक्ती करण्यासाठी निविदा प्रसिद्ध करण्यात आली आहे. या प्रकल्पामुळं जुन्या मुंबई-पुणे महामार्गाची क्षमता वाढणार असून या महामार्गावरील सहापदरीकरणासाठी नेमका किती खर्च येणार हे आराखडा तयार झाल्यानंतरच स्पष्ट होईल. मात्र एमएसआरडीसीच्या अंदाजानुसार यासाठी 5 ते 6 हजार कोटी रुपयांचा खर्च अपेक्षित असून हा खर्च वसूल करण्यासाठी 'एमएसआरडीसी'ने महामार्गावरील पथकर वसुलीच्या कालावधीत वाढ करण्याचा निर्णय घेतला आहे.
मुंबई-पुणे द्रुतगती महामार्गाआधी जुन्या मुंबई-पुणे महामार्गावरुन वाहतूक सुरू होती. हा महामार्ग सुमारे 150 ते 156 किमी लांबीचा होता. तसंच, दुपदरी होता. मात्र वाहतूक वाढल्यानंतर या मार्गाचे चौपदरीकरण करण्यात आले. सध्या या महामार्गावर क्षमतेपेक्षा जास्त वाहने धावतात. प्रतिदिन केवळ 40 हजार वाहनांची क्षमता असताना अंदाजे 70 हजार वाहने धावतात. त्यामुळं या माहमामार्गाचा विस्तार करण्यात येणार आहे.
या महामार्गावरील निगडी ते शिळफाटा अशा 110.8 किमीच्या महामार्गाच्या सहापदरीकरण आणि सुधारीकरणाचा सविस्तर आराखडा तयार करण्यासाठी सल्लागाराच्या नियुक्तीसाठी शुक्रवारी निविदा प्रसिद्ध केल्याची माहिती एमएसआरडीसीचे अधीक्षक अभियंता राहुल वसईकर यांनी दिली. निविदा प्रक्रिया पूर्ण करून 2027 च्या सुरुवातीला आराखड्याच्या कामाला सुरुवात करून आराखडा अंतिम करून पुढील प्रक्रिया पूर्ण करण्याचे आणि त्यानंतर प्रत्यक्ष कामास सुरुवात करण्याचे नियोजन असल्याचेही त्यांनी सांगितले.