नॅशनल पार्कच्या खालून जाणारा बोगदा, मुंबईच्या पूर्व-पश्चिम उपनगरांना जोडणारा महत्त्वकांक्षी प्रकल्प

मुंबईच्या पूर्व आणि पश्चिम उपनगरांना जोडणाऱ्या महत्त्वाच्या प्रकल्पाबाबत एक मोठी अपडेट समोर येत आहे. गोरेगाव-मुलुंड जोडरस्ता प्रकल्पांतर्गंत दादासाहेब फाळके चित्रनगरी येथे दोन बोगदे उभारण्यात येणार आहेत. या बोगद्यांच्या कामासाठी दोन टीबीएम मशीन वापरण्यात येणार आहेत. या दोन टीबीएम मशीनची नावं तुळशी आणि विहार अशी असून कामाला सुरुवातदेखील झाली आहे.

मुंबईच्या पूर्व आणि पश्चिम उपनगरांना जोडण्यासाठी 12.20 किमी लांबीचा गोरेगाव-मुलुंड जोडरस्ता उभारण्यात येणार आहेत. गोरेगाव-मुलुंड प्रकल्पाच्या टप्पा 3 (ब) अंतर्गत संजय गांधी राष्ट्रीय उद्यानाखालून बांधण्यात येणाऱ्या दुहेरी बोगद्याच्या जोडरस्ता कामाला वेग आला आहे.

बोगद्यासाठी वापरण्यात आलेल्या टीबीएम मशीनपैकी 'तुळशी' या पहिल्या बोगदा खनन संयंत्राद्वारे आतापर्यंत 183 मीटर लांबीचे खोदकाम पूर्ण करण्यात आले आहे.  तसेच, 'विहार' या दुसऱ्या बोगदा खनन संयंत्राची चाचणी पूर्ण झाली असून, दुसऱ्या बोगद्याच्या खोदकामाला लवकरच सुरुवात होणार आहे. पालिका आयुक्त अश्विनी भिडे यांनी सोमवारी प्रकल्पस्थळाला भेट देऊन सुरू असलेल्या बोगदा खनन कामाची प्रत्यक्ष पाहणी केली. तसंच, प्रकल्पाच्या बांधकामाचा दर्जा आणि सुरक्षिततेच्या उपाययोजनांचा सविस्तर आढावा घेतला.

कसे असतील हे जुळे बोगदे

गोरेगाव (पूर्व) येथील दादासाहेब फाळके चित्रनगरी ते मुलुंड (पश्चिम) येथील अमर नगर या दरम्यान संजय गांधी राष्ट्रीय उद्यानाखालून प्रत्येकी तीन मार्गिकांचे, सुमारे 5.30 किलोमीटर लांबीचे दोन समांतर बोगदे बांधण्यात येत आहेत. या महत्त्वपूर्ण कामासाठी अत्याधुनिक बोगदा खनन संयंत्रांचा वापर करण्यात येत आहे.

कसा असेल हा प्रकल्प?

गोरेगाव-मुलुंड प्रकल्पाच्या चौथ्या टप्प्यातील कामाने आता वेग आला आहे. 27 मार्च 2026 पासून या कामाचा प्रारंभ झाला आहे. तर हा लिंक 2028 अखेरपर्यंत पूर्ण करण्यात येणार आहे. सध्या दोन भागांमध्ये हे काम करण्यात येणार आहे. यात पूर्व द्रुतगती महामार्गावरील विद्यमान उड्डाणपूलावर दुसऱ्या स्तरावरील नाहूर एरोली टोलनाका दरम्यान केबल स्टेड उड्डाणपुलाचे बांधकाम करण्यात येणार आहे.