लोकलमधील मयांक लोहार हत्या प्रकरणात ट्विस्ट? आरोपी रोशनच्या दाव्याने प्रकरणाला भलतंच वळण, कोर्टात म्हणाला 'मी तर त्याला...'
मुंबईतील लोकलमध्ये 22 वर्षीय मयांक लोहराची हत्या केल्याप्रकरणी 30 वर्षीय रोशन सुवर्णा याला अटक करण्यात आली आहे. दरम्यान कोर्टात सुनावणीदरम्यान त्याने वेगळाच दावा केला आहे.
मुंबईत धावत्या लोकलमध्ये 22 वर्षीय मयांक लोहराची हत्या झाल्यानंतर शहरासह संपूर्ण राज्यात खळबळ उडाली होती. हत्येनंतर पोलिसांनी वेगाने तपासाची चक्रं फिरवत 30 वर्षीय रोशन सुवर्णा याला अटक केली होती. याच रोशन सुवर्णाने जामिनासाठी अर्ज केला असून, यादम्यान त्याने आपण हत्या केलीच नसल्याचा दावा केला आहे. आपण फक्त तिथे उभे होतो आणि भांडण झालं तेव्हा मध्यस्थी करत ते थांबवण्याचा प्रयत्न करत होतो असाही दावा केला आहे. मयांकचं भांडण आपल्याशी नाही तर दुसऱ्या एका अज्ञात व्यक्तीशी झालं होतं असं त्यांचं म्हणणं आहे. सुवर्णने त्याच्या अर्जात म्हटलं आहे की, त्याने भांडणात मध्यस्थी केली होती, ज्यादरम्यान त्याला दुखापत झाली. कथित हल्लेखोर पळून गेल्यानंतर त्यालाच खोट्या प्रकरणात गोवण्यात आलं. दरम्यान मयांकच्या कुटुंबाने जामिनाला विरोध केला असून, त्यांना स्वतःच्या आणि साक्षीदारांच्या सुरक्षेची भीती वाटत असल्याचे म्हटले आहे. या अर्जावर 20 नोव्हेंबर रोजी सुनावणी होणार आहे.
कुटुंबाच्या म्हणण्यानुसार, तांत्रिक पुराव्यांच्या आधारे सुवर्णचा शोध घेण्यात आला. तसंच डॉक्टरांनी हत्या झालेल्या शस्त्राची ओळख पटवली असून, ज्याच्याकडून सुरी विकत घेतली होती, त्यानेही सुवर्णला ओळखले आहे. मयांकडे वडील रमेश लोहार यांनी वकील प्रिन्स कुमार उपाध्याय यांच्यामार्फत न्यायालयात एक हस्तक्षेप याचिका दाखल केली आहे. त्यांनी हा हल्ला अत्यंत क्रूर आणि विनाकारण होता असं म्हटलं आहे.
मयांकच्या वडिलांचा विरोध
याचिकेत म्हटलं आहे की, "22 वर्षांच्या एका तरुणाची सार्वजनिक ठिकाणी लोकलमध्येकिरकोळ वादातून हत्या करण्यात आली. त्याच्या पालकांनी आपला मुलगा गमावला आहे." यात पुढे असेही नमूद केलं आहे की, सुवर्णला जामीन मिळाल्यास खटल्याच्या कामकाजावर परिणाम होऊ शकतो आणि प्रवाशांच्या सुरक्षिततेबाबत लोकांचा विश्वास कमी होऊ शकतो. ही घटना 23 जून 2026 रोजी रात्रीच्या सुमारास, अंधेरीहून नालासोपाऱ्याच्या दिशेने जाणाऱ्या एका जलद लोकल ट्रेनमध्ये घडली होती.
नेमका वाद कशावरुन झाला होता?
पोलिसांनी दिलेल्या माहितीनुसार, मयांक लोहार कामावरुन परतत असताना पाऊस सुरु असतानाही दरवाजा उघडा ठेवला असल्याने त्याचा सुवर्णशी वाद झाला. यावेळी काही प्रवाशांनी त्यांना दूर केलं. गोरेगाव-मालाडदरम्यान अलार्म चेन ओढली असता, आरोपीने मयांकच्या छाती आणि पोटात चाकूने वार केले.
यानंतर मयांकला शताब्दी रुग्णालयात नेण्यात आलं होतं. मात्र तिथे पोहोचण्यापूर्वीच त्याचा मृत्यू झाला होता. कुटुंबाच्या म्हणण्यानुसार, मयांकच्या हातात कोणतंही हत्यार किंवा शस्त्र नव्हतं आणि त्याने कोणावरही हल्ला केला नव्हता. कुटुंबीयांच्या म्हणण्यानुसार, प्रवाशांनी हस्तक्षेप केल्यानंतर आठ मिनिटांनी सुवर्ण पुन्हा मयांकजवळ आला आणि आपल्या बॅगेतून सुरी काढून त्याच्यावर वार केले. त्याने एकामागोमाग अनेकदा मयांकवर वार केले आणि पळून जाण्याआधी प्रवाशांना धमकी दिली.
बचाव पक्षाचा दावा काय?
बचाव पक्षाचे म्हणणे आहे की सुवर्ण आणि लोहार हे एकमेकांना ओळखत नव्हते, यात कोणताही हेतू किंवा पूर्वनियोजित कट नव्हता. सुवर्णकडून कोणतेही शस्त्र जप्त करण्यात आले नाही आणि सीसीटीव्हीमध्ये चाकूने हल्ला झाल्याचे दिसले नाही. त्यांनी ओळख परेडवरही प्रश्नचिन्ह उपस्थित केले आहेत.
दुसरीकडे मयांकच्या कुटुंबीयांचे म्हणणे आहे की तांत्रिक पुराव्यांच्या आधारे सुवर्णचा शोध घेण्यात आला, तसंच एका डॉक्टरने जखमांचा संबंध शस्त्राशी जोडला असून चाकू विक्रेत्यानेही त्याची ओळख पटवली आहे.