'आदित्य ठाकरेंनी संजय राऊतांची कॉलर पकडली असं...', 'राऊत काँग्रेसमध्ये जाणार का?' कोणी केला हा सवाल?
दोन्ही राष्ट्रवादींच्या विलीनीकरणासंदर्भातील चर्चांना उधाण आलेलं असतानाच यावरुन आता उद्धव ठाकरेंच्या शिवसेनेचे प्रवक्ते संजय राऊत आणि भारतीय जनता पार्टीमध्ये जुंपल्याचं दिसत आहे.
दोन्ही राष्ट्रवादी काँग्रेसच्या विलीनीकरणासंदर्भातील चर्चांना उधाण आलेलं असतानाच यावरुन आता सत्ताधारी भारतीय जनता पार्टी आणि विरोधात असलेल्या उद्धव ठाकरेंच्या शिवसेनेमध्ये जुंपल्याचं दिसत आहे. ठाकरेंच्या शिवसेनेचे प्रवक्ते संजय राऊत यांनी शरद पवार इंडिया आघाडीसोबतच राहतील. दोन्ही पक्षांचं विलीनीकरण होणार नाही. झालं तरी इतर नेते पवारांसोबत म्हणजेच इंडिया आघाडीकडे येतील असं राऊत यांनी पत्रकारांशी चर्चा करताना म्हटलं. यावरुन निशाणा साधताना भाजपाचे प्रवक्ते नवनाथ बन यांनी थेट राऊत आणि आदित्य ठाकरेंमध्ये शिवसेनेत अंतर्गत संघर्ष सुरु असल्याचं ऐकिवात आल्याचं म्हटलं आहे.
शरद पवार संजय राऊतांच्या माध्यमातून निर्णय सांगणार नाहीत
"उद्धव बाळासाहेब ठाकरे गटाचे प्रति पक्षप्रमुख संजय राऊत आहेत. तुमचा पक्ष काँग्रेसमध्ये कधी विलीन करणार? शरद पवार आपला निर्णय संजय राऊत यांच्या माध्यमातून सांगणार नाहीत. विलीनीकरणाचा निर्णय घ्यायचा की नाही हे ठरवायला सुनेत्रा पवार या सक्षम आहेत. त्या जो निर्णय घेतील त्याला भाजपचा पाठिंबा असेल," असं नवनाथ बन यांनी संजय राऊतांवर निशाणा साधताना म्हटलं आहे. दोन्ही राष्ट्रवादी काँग्रेसचं विलीनीकरण होणार नाही असं राऊत यांनी म्हटलं होतं. त्यावरुनच बन यांनी हा टोला लगावला आहे. एवढ्यावरच न थांबताना राऊत काँग्रेसमध्ये जाणार असा सवाल बन यांनी केला आहे.
आदित्य ठाकरे आणि राऊत असा सामना
"आदित्य ठाकरे विरुद्ध संजय राऊत असा सामना मागील काही दिवसांपासून पाहायला मिळतोय. आदित्य ठाकरे यांनी संजय राऊतांची कॉलर पकडली असं बातम्यांमध्ये आलं होतं. त्यांना कंटाळून संजय राऊत काँग्रेसमध्ये जाणार का?" अशा खोचक सवाल बन यांनी विचारला. तसेच राऊत यांना सल्ला देताना, "संजय राऊत यांनी विनाकारण विषय भरकटवू नये. त्यांचा बचत गट काँग्रेसमध्ये कधी विलीन करणार? याचा मुहूर्त कधी असणार," असा टोला लगावला.
गाढव नाक्यावर आंदोलन करण्याचा सल्ला
हसन मुश्रीफ यांच्या विरूद्धच्या खटल्यामध्ये ईडीने क्लोजर रिपोर्ट सादर केल्यानंतर हा खटला बंद करण्यात आल्यावरुन राऊतांनी केलेल्या टीकेवरही बन यांनी भाष्य केलं आहे. "संजय राऊत यांना हसन मुश्रीफ यांच्या विरोधात खटला सुरु ठेवायचा असेल तर त्यांनी पुरावे द्यावे कोर्टात. पुरावे सादर करून खटला सुरु ठेवावा. भांडुपच्या गाढव नाक्यावर तुम्ही या विरोधात आंदोलनाला बसा," असा टोमणा बन यांनी मारला.
अफजलखान, औरंगजेब हा तुमचा अजेंडा
"योगी आदित्यनाथ हिंदुत्व पुढे घेऊन जाताय त्याला संजय राऊत विरोध करत आहेत. तुमचा अजेंडा औरंगजेब फॅन क्लब चालवयाचा आहे. अफजलखान, औरंगजेब हा तुमचा अजेंडा आहे," अशी टीका बन यांनी केली.
