मुंबई-पुणे मार्गावर कनेक्टिंग लिंकवरुन प्रवास करणाऱ्यांसाठी नवा नियम लागू; 'या' प्रकारच्या वाहनांना पूर्णपणे प्रवेश बंदी

Mumbai Pune Expressway New Rule: मुंबई-पुणे एक्सप्रेसवेवरील कनेक्टिंग लिंकवरुन प्रवास करणाऱ्यांसाठी अत्यंत महत्वाची बातमी आहे. मुंबई-पुणे एक्सप्रेसवेवरील कनेक्टिंग लिंकवरुन प्रवास करणाऱ्यांसाठी नवा नियम लागू करण्यात आला आहे. यामुळे कनेक्टिंग लिंकवरुन प्रवास करणाऱ्या नियमीत वाहनचालकांना मोठा धक्का बसणार आहे. मुंबई-पुणे द्रुतगती मार्गावरील कनेक्टिंग लिंकवर मालवाहतूक वाहनांना बंदी घालण्यात आली आहे. 

मुंबई-पुणे द्रुतगती मार्गावरील कनेक्टिंग लिंकवर 1 नोव्हेंबरपासून सर्व प्रकारच्या मालवाहतूक वाहनांना बंदी घालण्यात येणार आहे. आतापर्यंत हलक्या वाहनांच्या श्रेणीत येणाऱ्या पिकअप व्हॅनना या मार्गावरून जाण्याची परवानगी होती. मात्र, प्रवाशांच्या सुरक्षेच्या दृष्टीने आता त्यांनाही प्रवेश नाकारण्यात येणार आहे. याबाबत राज्याच्या अपर पोलिस महासंचालक कार्यालयाने अधिसूचना जारी केली आहे.
राज्याच्या अपर पोलिस महासंचालक कार्यालयाने जारी केलेल्या अधिसूचनेनुसार मालवाहतूक करणाऱ्या सर्व वाहनांना नियमित द्रुतगती मार्गाचा वापर करावा लागणार आहे.. वाहतूक विभागाने मिसिंग लिंकवरील वाहतुकीसंदर्भात नवे नियम जाहीर केले आहेत.

महाराष्ट्र महामार्ग पोलिसांनी या मार्गावर मालवाहू वाहनांच्या वाहतुकीवर कायमस्वरूपी बंदी घालण्याचा निर्णय घेतला आहे. हा नियम 1 नोव्हेंबरपासून लागू करण्यात येणार आहे. बोगद्याची रचना आणि तांत्रिक बाबी लक्षात घेऊन प्रशासनाने प्रवाशांच्या सुरक्षेसाठी हा निर्णय घेतल्याचे सांगितले जात आहे.

विशेष म्हणजे लहान व्यावसायिक वाहने, पिकअप व्हॅन आणि टाटा एस सारख्या वाहनांना देखील या मार्गावर प्रवेश दिला जाणार नाही. मात्र, खाजगी कार आणि प्रवासी बसेसना या मार्गावर धावण्यास परवानगी असणार आहे.  याव्यतिरिक्त, ज्वलनशील पदार्थ, स्फोटके किंवा इतर धोकादायक पदार्थ वाहून नेणाऱ्या अवजड वाहनांना या मार्गावरुन जाण्याची परवानगी दिली जाणार नाही. अशा वाहनांना मुंबई-पुणे द्रुतगती मार्गाच्या जुन्या मार्गाचा वापर करावा लागेल.

वेगमर्यादा निश्चित 

कनेक्टिंग लिंकवरुन प्रवास करणाऱ्यांसाठी वाहनांसाठी कमाल वेगमर्यादाही निश्चित करण्यात आली आहे. खाजगी कार आणि इतर हलक्या मोटार वाहनांना ताशी कमाल 100 किलोमीटर वेगाने प्रवास करण्याची परवानगी असेल. तर, प्रवासी बस आणि इतर प्रवासी वाहनांना ताशी कमाल 80 किलोमीटर स्पीडने वाहने चालवण्याची परवानगी देण्यात आली आहे.
कनेक्टिंग लिंकवरील बोगद्याची रचना आणि तांत्रिक वैशिष्ट्यांमुळे हे निर्बंध लादण्यात आले आहेत. या मार्गावरून प्रवास करणाऱ्यांची सुरक्षितता सुनिश्चित करण्यासाठी हे बदल करण्यात आले आहेत. 1नोव्हेंबर 2026 पासून मुंबई-पुणे द्रुतगती मार्गावरील कनेक्टिंग लिंक प्रवाशांसाठी खुला झाला.  कनेक्टिंग लिंकची लांबी 13.3 किलोमीटर एवढी आहे. या लिंकमुळे मुंबई-पुणे अंतर 6 किमीने कमी झाले आहे. प्रवास वेळेत 25 मिनिटांची बचत झाली आहे.