पश्चिम रेल्वेवर होतेय नवीन मार्गिका, 17 स्थानके अन् 12 हजार कोटींचा खर्च; दादरला उतरून ट्रेन बदलण्याची गरज नाही
मुंबई लोकल आता थेट पनवेल-वसई दरम्यान धावणार आहे. कुर्ला-दादरला उतरून नागरिकांना प्रवास करावा लागणार नाही.
मुंबई लोकलचा विस्तार होतोय. लोकल ही मुंबईकरांची लाइफलाइन म्हटली जाते. जररोज लाखो नागरिक लोकलचा प्रवास करतात. लोकलचा प्रवास आणखी सुकर व्हावा यासाठी रेल्वे प्रशासनाकडून विविध उपाययोजना राबवण्यात येत आहेत. आता लवकरच पनवेल-वसई लोकल धावण्याचा मार्ग मोकळा झाला आहे. त्यामुळं आता कुर्ला-दादरला उतरून नागरिकांना प्रवास करावा लागणार नाही.
पनवेलहून वसई-विरार ही मेमू सध्या उपलब्ध आहे. मात्र ठराविक वेळेतच मेमू असल्याने नागरिकांची गैरसोय होते. त्यामुळं वसई-विरार गाठण्यासाठी कुर्ला, दादर स्थानकांत उतरून मग पुढचा प्रवास करावा लागतो. मात्र या उपनगरीय रेल्वे प्रकल्पामुळं नवी मुंबई, भिवंडी आणि वसईदरम्यान थेट लोकल उपलब्ध होणार आहे. यामुळं नागरिकांचा प्रवासाचा वेळ वाचणार आहे.
वसई-पनवेल उपनगरीय रेल्वे मार्गिका हा एमयूटीपी - बी अंतर्गंत प्रस्तावित प्रकल्प आहे. एकूण 69.23 किमी लांबीच्या मार्गावर 17 स्थानके असणार आहेत. या मार्गावरील सुमारे 28 किमीचा भाग उन्नत स्वरुपात असून त्यासाठी सुमारे 12,710.82 कोटी रुपयांचा खर्च अपेक्षित आहे.
प्रस्तावित तिसरी आणि चौथी मुंबई या नव्या विकासकेंद्रांच्या दृष्टीनेही हा रेल्वे प्रकल्प महत्त्वाचा आहे. पालघर जिल्ह्यात प्रस्तावित असलेल्या वाढवण बंदरामुळेही या मार्गाचे महत्त्व वाढले आहे. बंदर कार्यान्वित झाल्यानंतर परिसरात रोजगारनिर्मिती आणि औद्योगिक विकासाला चालना मिळण्याची अपेक्षा आहे.
सध्या या मार्गावर पनवेल ते वसई रोड दरम्यान मेमू (MEMU) आणि पॅसेंजर ट्रेन सुरू आहेत (उदा. ट्रेन क्रमांक 69165) परंतु पूर्ण क्षमतेने थेट उपनगरीय लोकल सेवा सुरू करण्यासाठी केंद्राच्या मंजुरीची प्रतीक्षा आहे.
खर्डी-कसारादरम्यान दोन दिवस लोकल बंद
आसनगाव ते कसारादरम्यान तिसरी मार्गिका उभारणे आणि कसारा पार्डमधील विस्तारीकरणाच्या कामासाठी मध्य रेल्वेच्या मुंबई विभागाने 13 आणि 14 नोव्हेंबरला विशेष ट्रैफिक आणि पॉवर ब्लॉक घोषित केला आहे. यामुळे खर्डी ते कसारादरम्यान लोकल बंद राहणार आहेत. या कालावधीत रात्री उशिरा धावणाऱ्या लोकल फेऱ्या रद्द राहणार असून, काही लोकल फेऱ्या आणि लांब पल्ल्याच्या गाड्या विलंबाने धावणार आहेत.