रुपाली चाकणकर यांचा मोठा निर्णय! केली ट्रेडमार्क नोंदणी, म्हणाल्या 'जर माझे नाव, फोटो, ओळख किंवा माझ्या विशिष्ट शैलीचा वापर...'
राज्य महिला आयोगाच्या माजी अध्यक्षा रुपाली चाकणकर यांनी माझ्या पूर्वपरवानगीशिवाय नाव, फोटो,ओळख आणि त्यांच्या विशिष्ट शैलीचा वापर केल्यास कारवाईचा इशारा दिला आहे.
राज्य महिला आयोगाच्या माजी अध्यक्षा रुपाली चाकणकर यांनी आपलं नाव, फोटो,ओळख आणि त्यांच्या विशिष्ट शैलीची ट्रेडमार्क नोंदणी केली आहे. तसंच आपल्या पूर्वपरवानगीशिवाय यांचा वापर केल्यास कारवाई केली जाईल असा इशारा दिला आहे. रुपाली चाकणकर यांनी एक्सवर पोस्ट शेअर करत ही माहिती दिली आहे. स्वयंघोषित बाबा अशोक खरातवर आधारित 'महाराष्ट्र एपस्टिन फाइल्स' चित्रपट आला असतानाच रुपाली चाकणकर यांनी हा निर्णय घेतला आहे. आता या निर्णयामागे हाच चित्रपट आहे की नाही याबाबत स्पष्टता नाही.
रुपाली चाकणकरांची पोस्ट -
"माझे नाव, माझा फोटो, माझी ओळख, माझी वैयक्तिक शैली आणि स्वतःला सादर करण्याची माझी विशिष्ट पद्धत यासंदर्भात ट्रेडमार्क नोंदणी करण्यात आलेली आहे. माझ्या पूर्वपरवानगीशिवाय कोणीही माझे नाव, फोटो, ओळख किंवा माझ्या विशिष्ट शैलीचा स्वतःच्या फायद्यासाठी किंवा व्यावसायिक कारणासाठी कोणत्याही प्रकारचे फोटो, व्हिडिओ, फिल्म, रील, टीझर, प्रमोशन किंवा इतर कोणतेही साहित्य तयार करण्यासाठी, वापरण्यासाठी किंवा प्रसिद्ध करण्यासाठी वापर केल्यास, अशा व्यक्तीविरुद्ध कायद्यानुसार कठोर कारवाई करण्यात येईल," असा इशारा रुपाली चाकणकर यांनी दिला आहे.
"असे आक्षेपार्ह किंवा बेकायदेशीर साहित्य जप्त करण्याची मागणी केली जाईल आणि संबंधित व्यक्तीला फौजदारी तसेच दिवाणी कायदेशीर कारवाईला व शिक्षेला सामोरे जावे लागेल," असंही त्यांनी म्हटलं आहे.
अशोक खरात प्रकरणाची सुरुवात कशी झाली?
अशोक खरात हा स्वतःला कॅप्टन, अंकशास्त्राचा अभ्यासक आणि आध्यात्मिक मार्गदर्शक म्हणून ओळख करून देत होता. नाशिकच्या सिन्नर परिसरातील शिवनिका संस्थानशी त्याचा संबंध होता. रुपाली चाकणकर आणि त्यांच्या कुटुंबीयांची खरातशी ओळख साधारण 2019 च्या आसपास झाली, असे त्यांनी नोव्हेंबरमधील मुलाखतीत सांगितले.
चाकणकर यांचे खरातसोबतचे फोटो आणि पाद्यपूजा करतानाचा व्हिडीओ समोर आल्यानंतर मोठा राजकीय वाद निर्माण झाला होता.
मार्च 2026 मध्ये अशोक खरातला अटक करण्यात आली. एका 27 वर्षीय तरुणीने खरातविरोधात लैंगिक अत्याचाराची तक्रार दिल्यानंतर पोलिसांनी त्याला अटक केली. संबंधित तरुणीने दोन वर्षांच्या काळात वारंवार लैंगिक अत्याचार झाल्याचा आरोप केला होता. या प्रकरणात भारतीय न्याय संहिता आणि जादूटोणाविरोधी कायद्यांतर्गत गुन्हे दाखल झाले.
खरातसोबत रुपाली चाकणकर यांचे फोटो आणि पाद्यपूजेचा व्हिडीओ चर्चेत आला. चाकणकर या त्यावेळी महाराष्ट्र राज्य महिला आयोगाच्या अध्यक्षा होत्या. महिलांच्या शोषणाविरोधात काम करणाऱ्या आयोगाच्या अध्यक्षांचे खरातशी असलेले संबंध काय, असा विरोधकांनी सवाल केला. त्यांच्या राजीनाम्याची मागणी जोर धरू लागली.
रुपाली चाकणकर यांचे राजीनामे
20 मार्च 2026 रोजी रुपाली चाकणकर यांनी राज्य महिला आयोगाच्या अध्यक्षपदाचा राजीनामा दिला. निष्पक्ष तपास व्हावा यासाठी नैतिक जबाबदारी स्वीकारत असल्याचे त्यांनी सांगितले. 27 मार्च 2026 रोजी त्यांनी राष्ट्रवादी काँग्रेसच्या महिला प्रदेशाध्यक्षपदाचाही राजीनामा दिला.