उद्धव ठाकरे- एकनाथ शिंदे एकत्र येणार? संजय राऊतांनी एका वाक्यात संपवला विषय; म्हणाले, 'आम्ही दूर आहोत ते...'

भविष्यात शिवसेना पक्षप्रमुख उद्धव ठाकरे आणि उपमुख्यमंत्री एकनाथ शिंदे हे एकत्र येऊ शकतात, असं वक्तव्य शिंदेसेनेचे नेते रवींद्र धंगेकर यांनी केलं आहे. रवींद्र धंगेकरांच्या या विधानावर शिवसेनेचे खासदार संजय राऊत यांनी स्पष्ट उत्तर दिलं आहे. तसंच, ते बाळासाहेबांच्या विचारांचे द्रोही आहेत, असं राऊतांनी म्हटलं आहे.

एकनाथ शिंदे हे विचारांचे वारसदार आहेत. तर शिवसेनाप्रमुख उद्धव ठाकरे रक्ताचा वारसदार आहेत, असं वक्तव्य धंगेकर यांनी केलं होतं. त्यावर राऊतांनी महाराष्ट्र लुटणाऱ्या शहांचा उदोउदो हा काही बाळासाहेबांचा विचार आहे का? असा सवाल केला आहे. तसंच,  ज्या प्रकारे अमित शहा आणि त्यांची लोक महाराष्ट्र मुंबई लुटताहेत. मराठी माणसाविरोधात भूमिका घेतात. कदाचित ते मुंबई वेगळं करण्याची योजना आखताहेत. हा काय बाळासाहेबाचा विचार आहे? हे बाळासाहेबांच्या विचारांचे द्रोही आहेत आणि असे लोक फडणवीसांच्या सरकारमध्ये असतील तर आम्ही दूर आहोत ते बरं आहोत, असं म्हणत फटकारलं आहे.  

एकनाथ शिंदे आणि अमित शाह यांनी महाराष्ट्रांच्या भल्याचा विचार केला असता. तर त्यांनी शिवसेनेचे पक्ष आणि चिन्ह अशा ऐरागैराच्या हातात दिलं नसतं, असा टोलाही राऊतांनी लगावला आहे.

'पूर्णेकर प्रकरणात गृहमंत्र्यांचा बळी जाईल'

मीनाक्षी शिंदे यांनी त्यांच्या पक्षातील पदाचा राजीनामा दिला हा त्यांचा अंतर्गंत प्रश्न. प्रदीप पूर्पणेकर यांच्या हत्येचा कट रचण्यामागे मीनाक्षी व राजेंद्र शिंदे दोघांचा समावेश आहे. याचे पुरावे आहेत. सर्व आरोपी एकत्र बसले आहेत हत्येच्या एक तास आधी. त्यात राजेंद्र शिंदे आहेत. मुख्य सूत्रधार मिनाक्षी शिंदे आहे. त्यांनी राजेंद्र शिंदेला सुपारी दिली आणि राजेंद्र शिंदेंनी त्याच्या खालच्या लोकांना सूपारी दिली. हे ठाणे पोलिसांना, ठाणे एसआयटीला माहितीय ठाण्याच्या पालकमंत्र्यांना माहितीये. मग पोलिस का वाचवताहेत? हा प्रश्न आहे. आम्ही जे पुरावे पाहिलेत आयुक्तांनी ते देखील मान्य केले आहेत. की ते दोघेच सूत्रधार आहेत. तरी जर अटक होत नसेल तर राज्याला दुर्बळ आणि हतबल गृहंमत्री लाभला आहे.  या प्रकरणात पोलीस आयुक्त आणि गृहमंत्र्यांचा बळी जाईल. पूर्णेकर प्रकरण ठाण्याच्या पालकमंत्र्यांना आणि गृहमंत्र्यांना महागात पडेल, असा इशारा संजय राऊत यांनी दिला आहे.

पुढे ते म्हणाले, तुम्ही कोणाला वाचवताहेत. बाळासाहेब ठाकरेंची शिवसेना इतकी अमानुष नव्हती. पण तुम्ही ड्युप्लिकेट आहात. त्यांच्यामुळं तुम्हाला ज्याची हत्या झालीये त्याचं दुखः कळणार नाही. पूर्णेकरांचा मुलगा पालकमंत्र्याना निवेदन जायला जात होता. त्याला फरफटत रिक्षात कोंबलं. का कशासाठी? त्यामुळं पूर्णेकर प्रकरण ठाण्याच्या पालकमंत्र्यांना आणि गृहमंत्र्यांना महाग पडल्याशिवाय राहणार नाही, असंही राऊतांनी म्हटलं आहे.

महायुतीतील वादावरही राऊतांची प्रतिक्रिया

दोन्ही केस गॉन आहेत. आपल्या मराठी आणि गल्लीतल्या आणि शिवसेनेच्या भाषेत गॉन केस. त्याच्याविषयी न बोललेलं बरं.  यांचे केस इतके काही मोठे नाही आणि धारदार नाहीत. त्यामुळं शब्दांचे धार फक्त आणि ती पण नाही, अशी मिश्किल प्रतिक्रिया राऊतांनी दिली आहे.