फक्त अर्थखातं नको तर..., राष्ट्रवादी काँग्रेसमध्ये वेगवान हालचाली! मंत्रिमंडळ बदललं जाण्याची शक्यता

राष्ट्रवादी काँग्रेस पक्षाच्या (सुनेत्रा पवार) गोटात सध्या वेगवान हालचाली होताना दिसत आहेत. पक्षामध्ये पक्षात मंत्रिमंडळ बदलाचे संकेत मिळत आहे. राष्ट्रवादी काँग्रेस पक्षाच्या कोअर कमिटीची आज बैठक पार पडली असून, त्यात यासंदर्भात चर्चा झाली आहे. उपमुख्यमंत्री सुनेत्रा पवार यांच्या उपस्थितीत देवगिरी निवासस्थानी झालेल्या बैठकीत सुनील तटकरे, प्रफुल्ल पटेल, छगन भुजबळ, हसन मुश्रीफ, धनजय मुंडे उपस्थित होते.

दोन दिवसांपूर्वी दिल्तीत बैठक

केंद्रीय गृहमंत्री अमित शाह यांच्यासोबत पार्थ पवार, सुनेत्रा पवार यांची बुधवारी दिल्लीत बैठक पार पडल्यानंतर दुसऱ्याच दिवशी गुरुवारी अमित शाह यांच्यासोबत राज्याचे मुख्यमंत्री देवेंद्र फडणवीस, सुनेत्रा पवार यांची देखील बैठक पार पडली होती. बैठकीमधे राष्ट्रवादी काँग्रेस पक्षाच्या मंत्र्यांच्या खात्यात बदल करण्याबाबत चर्चा झाल्याची सूत्रांची माहिती आहे.

राष्ट्रवादी काँग्रेस पक्षात मंत्री बदलण्याच्या हालचाली सुरू असून, नव्या चेहऱ्यांना सुनेत्रा पवार संधी देणार का? याकडे राजकीय वर्तुळाचे लक्ष लागलं आहे. अर्थ खात्यासंदर्भात देखील चर्चा झाल्याची सूत्रांची माहिती आहे. अर्थ खात्याबाबत सकारात्मक चर्चा झाल्याची वरिष्ठ नेत्याची माहिती आहे.

महाराष्ट्राच्या मंत्रिमंडळात राष्ट्रवादी काँग्रेस पक्षाचे (अजित पवार गट) खालील 9 मंत्री समाविष्ट आहेत:

1. हसन मुश्रीफ
2. धनंजय मुंडे
3. आदिती तटकरे
4. दत्तात्रय भरणे
5. नरहरी झिरवाळ
6. माणिकराव कोकाटे
7. मकरंद जाधव पाटील
8. बाबासाहेब पाटील
9. इंद्रनील नाईक

छगन भुजबळ यांनी फेटाळलं वृत्त

दरम्यान छगन भुजबळ यांनी 5 मंत्री बदलणार असल्याचं वृत्त फेटाळून लावलं आहे. आपण अर्थखात्यासाठी आग्रही असून, तीच मागणी आपण मुख्यमंत्र्यांकडे केल्याची त्यांनी माध्यमांशी बोलताना सांगितलं आहे. तसंच सध्या दुष्काळ पडला असल्याने मदतीसंदर्भात निर्णय घेण्याचे असल्याने अर्थखातं लगेच मिळणार नाही असं स्पष्ट करताना त्यांनी मुख्यमंत्र्यांनी कोणतीही तारीख दिली नसल्याचं म्हटलं आहे. हे सांगताना त्यांनी आम्हाला अर्थखातं सोडून इतर कोणतंही नको यावर जोर दिला.

अर्थखात्यासंदर्भात आम्ही सुनेत्रा पवारांच्या नेतृत्वात मुख्यमंत्र्यांची भेट घेतली. इतर काही विषयांवरही चर्चा झाली. आमचं जे अर्थखातं ते लवकरात लवकर पुन्हा दिल जावं अशी मागणी केली आहे. यावेळी त्यांनी सकारात्मकता दर्शवली असून, तुम्हाला ते दिलं जाईल असं सांगितलं आहे. अर्थसंकल्प मांडण्याआधी ते दिलं जाण्याची शक्यता आहे असं छगन भुजबळ म्हणाले आहेत. यावेळी त्यांनी शरद पवारांच्या राष्ट्रवादी काँग्रेससोबत युती होण्याच्या चर्चा फेटाळून लावल्या. आमची युती फक्त महाराष्ट्रातील गोरगरिब जनतेशी असल्याचं त्यांनी सांगितलं आहे.