शिवा शर्मा मृत्यू प्रकरण: श्रद्धा दुबेला नागपुरातून अटक! पोलिसांनी ठेवलं होतं 50 हजारांचं बक्षीस

लखनऊमधील व्यावसायिक शिवा शर्माच्या संशयास्पद मृत्यू प्रकरणी अखेर पोलिसांना मोठे यश मिळाले आहे. पोलिसांनी मुख्य संशयित असणारी मॉडेल श्रद्धा दुबेला बेड्या ठोकल्या आहेत. पोलिसांनी नागपुरातून तिला अटक केली आहे. श्रद्धा दुबे मागील 11 दिवसांपासून फरार होती. उत्तर प्रदेश एसटीएफने तिला ताब्यात घेतले. श्रद्धा दुबेसोबतच एसटीएफने तिचा चालक आणि तिची बहीण रश्मी दुबे यांनाही अटक केली आहे. याआधी, ती लखनऊ आणि आग्रा परिसरात असल्याची माहिती समोर आली होती. तिला मदत करणाऱ्या व्यक्तींचा आणि ती ज्या विविध ठिकाणी वास्तव्यास होती, त्या ठिकाणांचाही पोलीस तपास करत आहेत.

नागपूर दंडाधिकारी न्यायालयासमोर केले हजर

मिळालेल्या माहितीनुसार, श्रद्धा दुबेला आज नागपूरमधील दंडाधिकारी न्यायालयासमोर हजर केले जाणार आहे. त्यानंतर, पोलीस श्रद्धा दुबे, तिची बहीण आणि त्यांच्या चालकासह लखनौच्या दिशेने रवाना होतील. जर त्यांनी रेल्वेने आल्यास उद्या, 21 ऑक्टोबर रोजी लखनौला पोहोचतील, त्यानंतर तिला थेट न्यायालयात हजर केले जाईल. लखनौ पोलीस उद्या तिच्या कोठडीची ) मागणी करू शकतात. विशेष म्हणजे, श्रद्धा दुबे अटकपूर्व जामीन मिळवण्याचा प्रयत्न करत होती, परंतु त्याआधीच तिला अटक करण्यात आली.

9 ऑक्टोबर रोजी चौथ्या मजल्यावरून पडला शिवा शर्मा
9 ऑक्टोबर रोजी हजरतगंज येथे एका चार मजली इमारतीवरून पडून शिवा शर्माचा संशयास्पद परिस्थितीत मृत्यू झाला. तो खाली पडल्याची घटना इमारतीबाहेर लावलेल्या सीसीटीव्ही कॅमेऱ्यात कैद झाली आहे. शिवा शर्माला केजीएमयू रुग्णालयात नेले असता, डॉक्टरांनी त्याला मृत घोषित केले. त्याच्या आईने श्रद्धा दुबेवर त्याच्या हत्येचा आरोप केला आहे.

पोलिसांनी ठेवले होते 50 हजारांचे बक्षीस

सुरुवातीला पोलिसांनी श्रद्धा दुबेबद्दल माहिती देणाऱ्यासाठी 25 हजार रुपयांचे बक्षीस जाहीर केले होते, जे नंतर वाढवून 50 हजार करण्यात आले. श्रद्धा दुबेने काही व्हिडिओ जारी करून असा दावा केला की, शिवा शर्माचा मृत्यू ही आत्महत्या होती. याव्यतिरिक्त, 'एएनआय' ला दिलेल्या मुलाखतीत तिने शिवा शर्मावर 16 ते 17 लाख रुपयांचे कर्ज होते आणि सावकार पैशांची मागणी करत होते असा दावा केला. श्रद्धाच्या म्हणण्यानुसार, ती शिवाला चार महिन्यांपासून ओळखत होती.

अनेक बड्या व्यक्तींशी संबंध असल्याचे समोर

श्रद्धा दुबेचे अनेक व्हीआयपींशी संबंध असल्याचेही समोर आले आहे. तिचे अनेक फोटोही समोर आले आहेत. श्रद्धा आणि शिवा एकत्र राहत होते. शिवाच्या मृत्यूनंतर, श्रद्धाने एक जुना व्हिडिओ शेअर केला, ज्यामध्ये शिवासारखा दिसणारा एक व्यक्ती दागिने चोरल्याची आणि ते विकल्याची कबुली देताना दिसत आहे. त्या व्हिडिओमध्ये तो व्यक्ती असेही म्हणतो की, तो लवकरच 6 लाख रुपयांचे देणे परत करेल.