दरोड्यातील संशयित आरोपीचा मृत्यू, जमावाच्या मारहाणीनंतर मृत्यू झाला आरोप, पोलिसांनी सांगितलं काय घडलं?

नागपूरमध्ये एक धक्कादायक घटना समोर आली आहे. दरोडा टाकणाऱ्या चोरट्याचा जमावाच्या मारहाणीत मृत्यू झाला आहे. या घटनेने परिसरात एकच खळबळ उडाली आहे. बेलतरोडी पोलीस स्टेशन हद्दीत ही घटना घडली आहे.

दुपारी अडीच ते तीनच्या सुमारास घरात डिलिव्हरी बॉयच्या रूपात दोन चोरटे घुसले. त्यांनी चाकूचा धाक दाखवत 62 वर्षीय वृद्ध महिलेला गळ्यातील दीड तोळ्याचे मंगळसुत्र हिसकावणाऱ्या त्या चोराला जमावाने शोधले आणि पोलिसात स्वाधीन केले. दरम्यान चोरट्यांनी पोलीसांना छातीत दुखत असल्याची तक्रार केली. तेव्हा त्याला मेडिकलमध्ये आणण्यात आले. दरम्यान डॉक्टरांनी मृत्यू झाल्याचे निदान केले. तर दुसरा चोरटा मात्र फरार झाला आहे.

बेलतरोडी परिसरात न्यू मनीष नगर मॉडेल कॉलनी परिसरातील न्यू मनीष नगर येथे उषा धार्मिक नावाच्या 62 वर्षीय वृद्ध महिला घरी होत्या. त्यावेळी दुपारी अडीच ते तीनच्या सुमारास चोरटा सुमेध आणि त्याचा साथिदार हे दोघे डिलिव्हरी बॉय म्हणून त्यांचा घरात घुसले. या दोघांनी वृद्ध महिलेला चाकूचा धाक दाखवत तिच्या गळ्यातील दिड तोळ्याचे मंगळसुत्र हिसकावत पळ काढला.

दरम्यान महिलेने आरडाओरड केली. परिसरातील लोकांनी या चोरट्यांचा शोध घेत एका संशयिताला पकडले. त्यांनी झोमॅटो डिलिव्हरी बॉयचा ड्रेसही बदललेला होता. त्यांनी चोरटा सुमेधला पकडून पुन्हा कॉलनीत आणले. इथे ज्यांच्याकडे लूट झाली होती त्या कुटुंबाने त्याला ओळखले.

संतप्त नागरिकांना त्याला चोप दिल्याचे बोलले जाते आहे. दरम्यान परिसरात तणाव पाहता कोणीतरी बेलतरोडी पोलिसांना माहिती दिली. बीट मार्शल घटनास्थळी पोहतच त्याला ठाण्यात आणले. पोलीस त्याची चौकशी करत असतानाच सुमेधने छातीत दुखत असल्याची तक्रार केली. पोलिसांनी त्याला मेडिकलमध्ये नेले. तिथे डॉक्टर तपासत त्याचा मृत्यू झाल्याचे निदान झाले.

पोलिस काय म्हणाले?

जमावाच्या मारहाणीत मृत्यू झाल्याच अद्याप दिसून आले नाही. त्या चोरट्याच्या मृत्यूचे कारण अजून स्पष्ट नाही. एक्सीडेंटल डेट अननॅचरल डेथ म्हणून केस दाखल केली आहे. शवविच्छेदनाच्या अहवालानंतरच मृत्यूचे कारण स्पष्ट होईल मात्र सध्या तरी मोबलिंचिंगमुळे मृत्यू झाल्याचा समोर आलेल नाही. आम्ही सीसीटीव्ही फुटेज वगैरे सगळे तपासत असल्याचे पोलीस उपायुक्तांनी म्हटलं आहे. शवविच्छेदनाच्या अहवालानंतर या सगळ्या प्रकरणावर कारवाई केली जाईल, असंही त्यांनी म्हटलं आहे.