महिला संरपंचांना टार्गेट करायचे अन्...; फडणवीसांनी आदेश देताच नागपूर पोलिसांची कारवाई, दोन महिलाच चालवत होत्या रॅकेट
महाराष्ट्रातसह देशभरातील महिला सरपंच आणि ग्रामसेवकांना टार्गेट करून खंडणी उकळणार्या एका आंतरराज्य टोळीचा पर्दाफाश. मुख्यमंत्र्याच्या आदेशानंतर कारवाई.
महाराष्ट्रासह देशभरातील महिला सरपंच आणि ग्रामसेवकांना टार्गेट करून खंडणी उकळणार्या एका आंतरराज्य टोळीचा पर्दाफाश नागपूर ग्रामीण पोलिसांनी केला आहे. विशेष बाब म्हणजे काही दिवसांपूर्वी नागपुरातील "लोहारी सावंगा" गावात मुख्यमंत्री देवेंद्र फडणवीस यांनी अनेक गावातील सरपंचांसोबत दुष्काळाच्या पार्श्वभूमीवर संवाद साधला होता. तेव्हा काही महिला सरपंचांनी "श्रेष्ठ न्यूज" या नावाने परिसरातील अनेक महिला सरपंच आणि ग्रामसेवकांना फोन करून पैसे मागितले जात असल्याची तक्रार मुख्यमंत्र्यांसमोर केली होती. पहिला फोन आल्यानंतर महिला सरपंच आणि ग्रामसेवकांनी मागितलेले पैसे ऑनलाइन न पाठवल्यास ग्रामपंचायतीच्या कामात तुम्ही भ्रष्टाचार केला आहे, निधीची अफरातफर केली आहे, असे खोटे आरोप करत खंडणी उकळली जात असल्याचे ही महिला सरपंचांनी मुख्यमंत्र्यांना सांगितले होते.
महिला सरपंचांच्या तक्रारीनंतर मुख्यमंत्र्यांनी नागपूर ग्रामीण पोलिसांना यासंदर्भात गुन्हा दाखल करून तपास करण्याचे निर्देश दिले होते. नागपूर ग्रामीण पोलिसांनी सर्व प्रकरणाचा तपास करून मध्य प्रदेशातील भोपाळ मधून 35 महिलांना ताब्यात घेतले आहे. या महिलाच्या टोळीचे म्होरक्या मोनिका सूर्यवंशी आणि तिची बहीण नेहा सूर्यवंशी होत्या. दोघींनी भोपाळमध्ये परिसरात तीन कॉल सेंटर उभारून तिथून महाराष्ट्रातील महिला सरपंच आणि ग्रामसेवकांना फोन करून आधी जाहिरातीसाठी पैसे मागण्याचा, त्यानंतर गावातील विकास कामात भ्रष्टाचार केल्याचा खोटा आरोप करत खंडणी उकळण्याचा सपाटा लावला होता. त्यांची कार्यपद्धती अत्यंत धक्कादायक होती. महाराष्ट्रातील कोणत्या महिला सरपंच आणि ग्रामसेवकांना फोन करून खंडणी मागायची हे ठरवण्यासाठी ही टोळी महाराष्ट्र सरकारच्या "महापंचायत" पोर्टलचा वापर करून तिथून मोबाईल नंबर मिळवत होती.
महिल सरपंचांनी तक्रार केल्यानंतर थेट मुख्यमंत्र्यांकडून कारवाईचे आदेश मिळाल्यानंतर तांत्रिक तपासाच्या आधारे नागपूर ग्रामीण पोलिसांनी ही टोळी भोपाळ मधून कार्यरत असल्याचे शोधून काढले. मंगळवारी भोपाळ मधील तिन्ही कॉल सेंटर मधून 35 तरुणींना ताब्यात घेतले आहे. त्यांच्याकडे तब्बल 618 रजिस्टर सापडले असून त्यामध्ये भारतातील तब्बल 8 राज्यातील 50 हजार पेक्षा जास्त महिला सरपंच आणि ग्रामसेवकांचे नंबर व त्यांच्या ग्रामपंचायतीत कोणते विकास काम सुरू आहे. याचा मोठा डेटाबेस ही मिळाला आहे. पोलिसांनी तिन्ही कॉल सेंटर मधून 54 मोबाईल फोन, 2 लॅपटॉप, 2 कम्प्युटर, अनेक प्रिंटर यासह देशभरातील महिला सरपंच आणि ग्रामसेवकांचे नंबर आणि माहिती असलेले 618 रजिस्टर जप्त केले आहे.