झोपलेल्या महिलेवर पेट्रोल टाकून पेटवणाऱ्या आरोपीचाच होरपळून मृत्यू; मालेगाव तालुक्यातील घटना; महिलेची मृत्यूशी झुंज

मालेगावात एका महिलेला अंगावर पेट्रोल टाकून पेटवून दिल्याची धक्कादायक घटना समोर आली आहे. आर्थिक देवाण-घेवाणीतून त्यांची ओळख निर्माण झाली होती. यानंतर चरित्राच्या संशयावरून वाद निर्माण झाल्याने महिला झोपेत असतानाच त्याने अंगावर पेट्रोल टाकून आग लावली. मालेगाव तालुक्यातील देवघट या गावी ही घटना घडली. यावेळी लागलेल्या आगीत संशयितदेखील भाजला गेल्याने त्याचा मृत्यू झाला. दुसरीकडे महिलेची मृत्यूशी झुंज सुरू आहे.

संशयित अनिल बंडू सोनवणे (50) असे मृत व्यक्तीचे नाव असून सुनंदा देवसिंग मोरे (45) असे महिलेचे नाव आहे. बुधवारी रात्री देवघट गावाजवळील इंदिरानगर वस्तीवर हा प्रकार घडला. पीडित महिला आई, बहीण व मुलांसह झोपडीबाहेर अंगणात झोपलेली होती. या ठिकाणी संशयित अनिल सोनवणे हा पेट्रोलने भरलेली डबा घेऊन आला. त्याने झोपलेल्या सुनंदा यांच्या अंगावर पेट्रोल टाकून पेटवून दिले. महिला आगीत होरपळू लागल्याने तिने आरडाओरड केली. यावेळी झालेल्या झटापटीत संशयित अनिलदेखील गंभीर भाजला गेला. मात्र त्याने घटनास्थळावरून पळ काढत बाजूलाच असलेल्या एका पाण्याच्या डबक्यात स्वतःला झोकून दिले.
पहाटे पावणेतीनच्या सुमारास झालेल्या या धक्कादायक प्रकारानंतर संपूर्ण वस्तीवर नागरिकांची गर्दी झाली होती. भाजलेल्या दोघांना तत्काळ मालेगाव व त्यानंतर धुळे येथील शासकीय रुग्णालयात उपचारासाठी दाखल करण्यात आले. या घटनेची माहिती मिळताच मालेगाव तालुका पोलीस ठाण्याचे पोलीस निरीक्षक शेगर यांनी पथकासह घटनास्थळी जाऊन पाहणी केली.

दरम्यान, संशयित अनिलचा गुरुवारी मृत्यू झाला. तर सुनंदा यांची प्रकृतीही गंभीर असून त्या मृत्यूशी झुंज देत आहेत. या घटनेमागील नेमके कारण, पैशांचा व्यवहार आणि घटनेची पार्श्वभूमी याबाबत पोलिसांकडून तपास सुरू आहे. या प्रकरणावरून पीडित महिलेचा मुलगा सोमनाथ मोरे याने दिलेल्या फिर्यादीवरून मालेगाव तालुका पोलीस ठाण्यात गुन्हा दाखल करण्यात आला आहे.