कृष्णा महाराज शास्त्री भगवान गडाचे चौथे मठाधिपती; डॉ. नामदेव महाराज शास्त्रींनी 2 वर्षांपूर्वीच घोषीत केला होता उत्तराधिकारी

अहिल्यानगर : अहिल्यानगरच्या श्री क्षेत्र भगवानगडाच्या अमृत महोत्सवी वर्षात दसऱ्याच्या शुभमुहूर्तावर ह.भ.प. न्यायाचार्य डॉ. श्री. नामदेव महाराज शास्त्री बाबांच्या हस्ते कृष्णा महाराज शास्त्री यांची भगवानगडाच्या चतुर्थ महंतपदी विधिवत नियुक्ती करण्यात आली. गडाच्या स्थापनेला 75 वर्षे पूर्ण होत असतानाच नवीन महंतांची नियुक्ती झाल्याने या सोहळ्याला विशेष महत्त्व प्राप्त झाले. संत भगवानबाबांनी 1951 मध्ये दसऱ्याच्या दिवशी श्री क्षेत्र भगवानगडाची स्थापना केली होती. 

यंदा गडाचे अमृत महोत्सवी वर्ष साजरे होत आहे. या ऐतिहासिक वर्षात कृष्णा महाराज शास्त्री यांना गादीवर विराजमान करण्याचा निर्णय विद्यमान मठाधिपती डॉ. नामदेव महाराज शास्त्री आणि श्री क्षेत्र भगवानगड ट्रस्टने घेतला होता. मात्र, दुष्काळी परिस्थिती लक्षात घेऊन नियोजित भव्य सोहळ्याऐवजी कार्यक्रम साधेपणाने पार पडला. तरीही या ऐतिहासिक क्षणाचे साक्षीदार होण्यासाठी हजारो भाविक गडावर उपस्थित होते.

कृष्णा महाराज शास्त्री हे मूळचे तेलंगणातील असून, 17 वर्षांपूर्वी ते भगवानगडावर आले. त्यांनी गडावरील ज्ञानेश्वरी विद्यापीठात सलग 12 वर्षे राहून डॉ. नामदेव महाराज शास्त्रीच्या मार्गदर्शनाखाली ज्ञानेश्वरी आणि अन्य धार्मिक ग्रंथांचे अध्ययन केले. एम.ए.पर्यंत शिक्षण घेतलेल्या कृष्णा महाराजांनी विद्या पारंगत झाल्यानंतर एकनाथवाडी येथील निरंजन संस्थानचे महंत म्हणून सुमारे तीन वर्षे कार्य केले.

डॉ. नामदेव महाराज शास्त्रींनी सुमारे दोन वर्षांपूर्वी कृष्णा महाराजांना आपला उत्तराधिकारी घोषित केले होते. त्यावेळी एकनाथवाडी येथील ग्रामस्थांनी त्यांना रथातून, ढोल-ताशांच्या गजरात, टाळ-मृदंगाच्या निनादात आणि हरिनामाच्या जयघोषात भगवानगडावर आणले होते. त्यांना निरोप देताना ग्रामस्थ भावूक झाले होते. त्यानंतर दसऱ्याच्या शुभमुहूर्तावर त्यांच्या नियुक्तीचा सोहळा संपन्न झाला.

कृष्णा महाराज शास्त्री यांना गादीवर विराजमान केल्यानंतर डॉ. नामदेव महाराज शास्त्री बाबांनी सामाजिक जीवनातून पूर्णपणे निवृत्ती घेतली आहे. यापुढील आयुष्य ज्ञानेश्वरीचा भावानुवाद लिहिण्यासाठी समर्पित करण्याचा त्यांचा संकल्प आहे. संत भगवानबाबांनी आयुष्यभर ज्ञानेश्वरीचे वाचन केले, तर नामदेव महाराज शास्त्री तिचा भावानुवाद लिहिण्याचे कार्य करीत आहेत. महाराष्ट्राच्या आध्यात्मिक आणि साहित्यिक क्षेत्रासाठी ही अभिमानाची बाब मानली जात आहे. यापुढेही त्यांचे ग्रंथलेखन आणि साहित्यनिर्मिती सुरू राहणार आहे.

दरम्यान, श्री क्षेत्र भगवानगडाच्या भक्तांनी यापुढे मठाधिपती म्हणून कृष्णा महाराज शास्त्री यांच्याशी संपर्क साधावा, असे आवाहन करण्यात आले आहे. अमृत महोत्सवी वर्षात झालेली ही नियुक्ती भगवानगडाच्या धार्मिक परंपरेतील महत्त्वाचा टप्पा ठरली आहे.