नाशिकमध्ये शेतकऱ्याने संपवलं जीवन, सुसाइट नोटमध्ये सांगितलं काय घडलं?

नाशिकच्या निफाड तालुक्यातील खडक माळेगाव येथील प्रगतशील शेतकरी संतू कचरू रायते यांनी विषारी औषध प्राशन करून आत्महत्या केल्याची दुर्दैवी घटना समोर आली आहे.

रायते हे खडक माळेगाव येथील विविध कार्यकारी सेवा सहकारी सोसायटीचे माजी चेअरमन होते. त्यांच्यावर पत्नीचे दोन तोळे सोना तारण तसेच एक लाख 78 हजार रुपयांचे बँकेचे कर्ज होते विशेष म्हणजे, मृत्यूपूर्वी लिहिलेल्या सुसाईड नोटमध्ये त्यांनी कर्जाचा उल्लेख केला असल्याची माहिती पोलिसांनी दिली आहे.

कर्जमाफी योजनेत नाव आलेले असतानाही शेतकऱ्याने आत्महत्येसारखे टोकाचे पाऊल का उचलले, याबाबत चर्चा सुरू झाली आहे. या घटनेची माहिती मिळताच लासलगाव पोलिसांनी घटनास्थळी धाव घेतली. सहाय्यक पोलीस निरीक्षक सागर कोते यांनी दिलेल्या माहितीनुसार, मृत शेतकऱ्याजवळ सुसाईड नोट आढळून आली असून त्यात कर्जामुळे आत्महत्या करत असल्याचा उल्लेख आहे. या प्रकरणी पोलीस पुढील तपास करत आहेत.

राज्य शासनाकडून 265 दुष्काळग्रस्त तालुक्यांची यादी जाहीर करण्यात आली आहे. यात नाशिकचाही समावेश आहे. पावसाने पाठ फिरवल्याने शेतकऱ्यांना मोठ्या संकटाचा सामना करावा लागत आहे. पावसाने पाठ फिरवल्याने खरीप हंगामातील कपाशी पिकाला मोठा फटका बसला आहे.

पावसाअभावी कपाशीची वाढ खुंटली असून बोंडधारणा अपेक्षेप्रमाणे झालेली नाही. त्यामुळे उत्पादनाची शक्यता कमी झाल्याने उत्पादनापेक्षा काढणीचा खर्चही अधिक होण्याची शक्यता असल्याने शेतकऱ्यांसमोर मोठा आर्थिक पेच निर्माण झाला मुळे काही मालेगाव तालुक्यातील देवारपाडे येथील शेतकऱ्यांनी नाईलाजास्तव उभे कपाशीचे पीक उपटून फेकल असून पिकावर ट्रॅक्टर फिरवलं. त्याचा हजारो रुपयांचा खर्च पाण्यात गेला असून सरकारकडून आता त्यांना मदतीची अपेक्षा आहे.

अकोल्यातही शेतकऱ्याची आत्महत्या

राज्यात दुष्काळ जाहीर झाल्यानंतरही अकोला जिल्ह्यात शेतकरी आत्महत्यांचे सत्र थांबताना दिसत नाही आहे. बार्शीटाकळी तालुक्यातील सिंदखेड मोरेश्वर येथील शेतकऱ्याच्या आत्महत्येची घटना ताजी असतानाच, आता मूर्तिजापूर तालुक्यातील गाजीपूर येथे ४५ वर्षीय शेतकरी पुत्राने आत्महत्या केल्याची धक्कादायक घटना समोर आली आहे. सततची नापिकी, कर्जबाजारीपणा आणि दुष्काळी परिस्थितीच्या पार्श्वभूमीवर ही घटना घडल्याने गावात हळहळ व्यक्त होत आहे