मोठी बातमी! पुण्यात मेडिकल कॉलेजसाठी केंद्राकडून परवानगी; फडणवीसांनी केलं जाहीर

पुण्यात मेडिकल कॉलेजसाठी केंद्राकडून मान्यता मिळाल्याची माहिती मुख्यमंत्री देवेंद्र फडणवीस यांनी दिली आहे. पुण्यात बैठकीनंतर माध्यमांशी संवाद साधताना त्यांनी ही माहिती दिली. त्यांनी सांगितलं की, "आपल्या ESIC रुग्णालयाला मेडिकल कॉलेज करण्यासाठी एक प्रस्ताव सादर करण्यात आला होता. दोन वेळा हा प्रस्ताव नॅशनल मेडिलक काऊन्सिनलने तो नाकारला होता. आपण यासंदर्भात केंद्रीय मंत्र्यांकडे अपील केलं होतं. आजच त्यांनी ते अपील मान्य केलं असून, एमबीबीएसच्या 50 जागांकरिता मेडिकल कॉलेजला मान्यता दिली आहे. यामुळे पुणेकरांची मागणी पूर्ण झाली आहे. यासाठी त्यांनी भाजपाध्यक्ष जे पी नड्डा आणि पंतप्रधान नरेंद्र मोदींचे आभार मानले आहेत. 

यावेळी पुणे पदवीधर आणि शिक्षक मतदारसंघ निवडणुकीवरही त्यांनी भाष्य केलं. ते म्हणाले की, "आज यासंदर्भात आणि पश्चिम महाराष्ट्रातील आमदारांसोबत बैठक झाली. पुणे पदवीधरमधून डॉक्टर स्मिता जाधव आणि शिक्षक मतदारसंघात कौस्तुभ गावडे हे दोघे भाजपा आणि महायुतीच्या वतीने मैदानात आहेत. यासंदर्भात चांगली तयारी झाली आहे. शरद लाड आणि भैय्या माने यांनीही चांगली तयारी केली होती. दोघांनी आमच्या विनंतीला मान देत स्मिता पाटील यांच्या पाठीशी उभे राहण्याचा निर्णय घेतला. कोल्हापूरात भैय्या माने यांनी कमान सांभाळली आहे. शरद लाड यांनी सांगली जिल्ह्यापासून तयारी केली होती. त्यांनी ती कमान सांभाळली आहे. भाजपाचे सर्व आमदार, कार्यकर्ते, पदाधिकारी पश्चिम महाराष्ट्रातील सर्व जिल्ह्यात मतदारांपर्यंत पोहोचून जास्तीत जास्त मतदान कसं होईल यासाठी प्रयत्न करतील विधान परिषेदच्या पाचही जागांवर महायुतीचेच उमेदवार निवडून येतील". 

🕡 6.42pm | 14-10-2026📍Pune. LIVE | Media Interaction #Maharashtra #Pune https://t.co/Fb42ubRguZ

— Devendra Fadnavis (@Dev_Fadnavis) October 14, 2026

"नागपूर, पुणे पदवीधर आणि पुणे शिक्षक हे मतदारसंघ भाजपा लढवत आहे. भाजपा आणि महायुतीचे सर्व कार्यकर्ते त्यांना निवडून आणतील. अमरावती शिक्षकमध्ये शिवसेनेची जागा आहे. तिथे सर्व कार्यकर्ते शिवसेनेला निवडून आणतील. छत्रपती संभाजीनगरमध्ये राष्ट्रवादी काँग्रेसला जागा गेली आहे. तिथेही भाजपा, शिवसेना आणि महायुतीचे कार्यकर्ते मिळून राष्ट्रवादीला निवडून आणतील असा मला विश्वास आहे. पाचही जागा आमच्या निवडून येतील हा मला विश्वास आहे. त्यादृष्टीने आजच्या बैठकीत जी तयारी पाहिली ती समाधानकारक आहे," असंही त्यांनी सांगितलं. 

आंदोलकांनी सामंजस्याची भूमिका घ्यावी

"हे वर्ष फार अडचणीचं आहे. एकीकडे ऊस कमी आहे त्यामुळे साखर कारखान्यांचा हंगाम लहान होणार आहे. दुसरीकडे साखर कमी असल्याने हंगाम लवकर सुरु करायचा आहे. त्यासाठी कारखाने प्रयत्न करत आहे. तिसरीकडे मागील सगळ्या अडचणींमुळे कारखानेही अडचणीत आहेत. महाराष्ट्र एकमेव राज्य आहे जिथे 99 टक्क्यापेक्षा जास्त एफआरपीचं पेमेंट झालं आहे. देशात कुठेही इतकं पेमेंट होत नाही. सातत्याने केंद्रानेही एफआरपी वाढवली आहे. कारखाने अडचणीत असताना आणि ऊसही कमी आहे अशा स्थितीत अधिक अडवणूक न करता लवकरात ललकर काऱखाने सुरु झाले पाहिजेत. ऊसाचा गाळप सुरु झाला पाहिजे. आंदोलकांना माझी विनंती आहे की, महाराष्ट्रात आपण कारखाने बंद ठेवतो तेव्हा मोठ्या संख्येने कर्नाटकचे कारखाने महाराष्ट्रातून ऊस घेऊन जातात. यामुळे आपल्या कारखान्यांचा हंगाम कमी होतो. म्हणून या अडचणी त्यांनी समजून घेतलं पाहिजे. हे दुष्काळाचं वर्ष असून, शेतकरी होरपळला आहे. अशावेळी सर्वांनी सामंजस्याची भूमिका घेतली पाहिजे," असं आवाहन यावेळी त्यांनी केलं.