पंढरपुरात शिवा संघटनेचा जिल्हाध्यक्ष राजू भिंगेची गोळ्या घालून हत्या; नंतर मोठा ट्विस्ट, पोलीस ठाण्यात...
पंढरपूरमध्ये मंगळवारी रात्री शिवा संघटनेचा जिल्हाध्यक्ष राजू भिंगेची गोळ्या घालून हत्या कऱण्यात आली. यानंतर एकच खळबळ उडाली आहे.
पंढरपूरमध्ये मंगळवारी रात्री शिवा संघटनेचा जिल्हाध्यक्ष राजू भिंगेची गोळ्या घालून हत्या कऱण्यात आली. यानंतर एकच खळबळ उडाली आहे. हत्येनंतर सोलापूर ग्रामीण पोलिसांनी तपासासाठी पथकं तयार केली आहेत. दरम्यान एक संशयित व्यक्तीला पंढरपूर पोलिसांनी ताब्यात घेतलं आहे. महत्त्वाचं म्हणजे, ही व्यक्ती स्वत:हून पोलीस ठाण्यात हजर झाली होती. ऐन कार्तिकी वारीच्या पार्श्वभूमीवर पंढरपूर मध्ये झालेली गोळीबाराची घटना यामुळे पंढरपूर हादरलं आहे.
शहराच्या उपनगरामध्ये सराईत गुन्हेगार आणि शिवा संघटनेचा जिल्हाध्यक्ष राजू भिंगे याची बंदुकीमधून गोळ्या झाडून हत्या करण्यात आली. राजू भिंगे हा पंढरपूरमधील नगरसेवक नामदेव भोईटे यांच्या हत्या प्रकरणांमध्ये सहभागी होता. 2017 साली मिरजजवळ ही घटना घडली होती. त्यामुळे पूर्व वैमान्यातून भिंगे याची हत्या झाल्याची शक्यता आहे.
पंढरपुरात इसबावी येथे राहत्या घरासमोरच गोळीबार झाल्याची घटना घडली. गोळीबारानंतर भिंगे याला तातडीने शहरातील लाईफ लाईन हॉस्पिटलमध्ये दाखल करण्यात आले होते. मात्र त्या र्वीच त्याचा मृत्यू झाला. राजू भिंगेवर गावठी पिस्तुलाने छातीत आणि पायात अशा दोन गोळ्या झाडल्याची माहिती मिळत आहे. पोलीस सीसीटीव्ही तपासत असून शहरात सर्वत्र कॉम्बिंग ऑपरेशनला सुरुवात झाली आहे.
राजू भिंगे याच्यावर पंढरपूर पोलीस स्टेशनमध्ये गंभीर स्वरूपाचे पाच गुन्हे दाखल होते. त्याच्या तडीपारचा प्रस्ताव सुद्धा पोलिसांनी पाठवला होता. घटना घडलेल्या परिसरातील सीसीटीव्ही फुटेज आणि पोलिसांनी नेमलेली पथके या मधून घटनेत सहभागी असलेल्या व्यक्तींचा शोध सुरू आहे. दरम्यान एका व्यक्तीला पोलिसांनी ताब्यात घेतलं असून त्याची चौकशी सुरू आहे.