कोल्हापूर हादरले! एरणमुंगलीच्या बिया खाल्ल्याने ऊसतोड मजुरांच्या 9 मुलांना विषबाधा, गर्भवती महिलेचा समावेश
कोल्हापुरात नऊ उसतोड कामगारांच्या मुलांना विषबाधा झाल्याची माहिती समोर येतेय. यात एक गर्भवती महिलेचाही समावेश आहे
कोल्हापुरात एक भीषण दुर्घटना घडली आहे. कोल्हापुरात ऊसतोड मजुरांच्या नऊ मुलांसह गर्भवती महिलेला विषबाधा झाल्याची घटना घडली आहे. हातकणंगले तालुक्यातील अंबप मधील घटना असून एरणमुंगलीच्या बिया खाल्ल्याने विषबाधा झाल्याचा प्राथमिक संशय व्यक्त करण्यात येत आहे.
ऊसतोडसाठी बीड जिल्ह्यातून ही मजुरांची टोळी आलेली. या टोळीतील एकूण दहा जणांना अचानक उलट्या, चक्कर आणि मळमळ सुरू झाली.. त्रास होऊ लागल्याने सर्वांना प्राथमिक उपचारासाठी अंबप इथल्या प्राथमिक आरोग्य केंद्रात दाखल करण्यात आले. त्यानंतर पुढील उपचारासाठी कोल्हापूरातील सी पी आर रुग्णालयात हलविण्यात आले.
एरणमुंगलीच्या बिया खाल्ल्याने विषबाधा झाली असावी असा संशय व्यक्त होत आहे. बिया खाल्ल्यानंतर काही वेळातच संबंधितांना चक्कर येणे, मळमळ आणि उलट्यांचा त्रास सुरू झाला. ही बाब ऊसतोड मजुरांसह शेतमालक आशिष पाटील यांच्या निदर्शनास येताच त्यांनी तत्काळ सर्वांना अंबप प्राथमिक आरोग्य केंद्रात दाखल केले.
सध्या सीपीआर रुग्णालयात 9 मुले आणि गर्भवती महिलेवर तज्ज्ञ डॉक्टरांच्या देखरेखीखाली उपचार सुरू आहेत. या घटनेमुळं ऊसतोड मजुरांच्या वस्तीवर आणि परिसरात चिंताजनक वतावरण निर्माण झाले आहे.
दरम्यान, काही दिवसांपूर्वी कोल्हापूर अशीच एक घटना घडली होती. कोल्हापूर जिल्ह्यातील हातकणंगले तालुक्यातील रेंदाळ येथील सम्राट अशोक नगर वसाहतीत अन्नातून विषबाधा झाल्याच्या संशयाने एकाच कुटुंबातील दोन चिमुकल्या भावा-बहिणीचा मृत्यू झाला आहे. अवघ्या दोन दिवसांच्या अंतराने या दोन्ही मुलांचा मृत्यू झाल्याने संपूर्ण रेंदाळ परिसरात आणि गावावर मोठी शोककळा पसरली आहे. वरद वैभव शिंगे (वय 4 वर्षे) आणि राही विनोद शिंगे (वय 2 वर्षे) अशी या दोघांची नावे आहेत. या दुर्दैवी घटनेमुळे शिंगे कुटुंबासह संपूर्ण गावावर दुःखाचा डोंगर कोसळला आहे.