SOCIAL MEDIA

Newsletter

PARTNER SITES
Select Language Select State

लेकीच्या वाढदिवशीच आईची हत्या घडवून आणली, पुण्यातील घटनेने खळबळ, कारण संताप आणणारे

सासवड पांगारे येथे शिक्षिकेची निर्घृण हत्या करण्यात आल्याची घटना समोर आली आहे. पुरंदर तालुका हादरला मुलीच्या वाढदिवशीच आईचा दुर्दैवी मृत्यू झाल्याने हळहळ व्यक्त करण्यात येत आहे.

Written By Mansi Kshirsagar Edited By Mansi Kshirsagar
Published: Nov 20, 2026, 12:41 IST | Updated: Nov 20, 2026, 12:42 IST
Image Credit: pune crime news mother killed on daughter birthday over propert dispute
Join

पुरंदर तालुक्यातील मौजे पांगारे येथे एका शिक्षिकेची निर्घृण हत्या झाल्याची धक्कादायक घटना घडली. उज्वला रामदास काकडे (वय 47, रा. पांगारे) असे मृत शिक्षिकेचे नाव असून, त्या हडपसर येथील साधना विद्यालयात शिक्षिका म्हणून कार्यरत होत्या. या घटनेमुळे संपूर्ण पुरंदर तालुक्यात खळबळ उडाली आहे.

मिळालेल्या प्राथमिक माहितीनुसार, उज्वला काकडे या नेहमीप्रमाणे नोकरीनिमित्त पांगारे येथून हडपसरकडे जात असताना न्यू इंग्लिश स्कूल पंगारेच्या पुढील 50 मीटरवर संशयित आरोपीने मालवाहू कॅरी वाहनाने त्यांना पाठीमागून धडक दिली. त्यानंतर पाइपसदृश हत्याराने त्यांच्या चेहऱ्यावर व शरीराच्या इतर भागांवर हल्ला करण्यात आला. एवढ्यावरच न थांबता डोक्यात मोठा दगड घालून त्यांच्यावर प्राणघातक हल्ला करण्यात आल्याची प्राथमिक माहिती समोर आली आहे. या हल्ल्यात त्यांचा घटनास्थळीच मृत्यू झाला.

आर्थिक व्यवहार की जमिनीचा वाद?

या हत्येमागे आर्थिक देवाणघेवाण किंवा जमिनीच्या व्यवहारातून वाद असल्याची चर्चा काही ग्रामस्थांकडून व्यक्त करण्यात येत आहे. मात्र, हत्येचे नेमके कारण अद्याप स्पष्ट झालेले नसून पोलीस तपासातूनच सत्य समोर येणार आहे.

मुलीच्या वाढदिवशीच आईचा मृत्यू; गावावर शोककळा

या घटनेतील सर्वाधिक हृदयद्रावक बाब म्हणजे आज मृत उज्वला काकडे यांच्या मुलीचा वाढदिवस होता. मात्र, ज्या दिवशी मुलीच्या आयुष्यात आनंदाचा क्षण असायला हवा होता, त्याच दिवशी आईचा दुर्दैवी मृत्यू झाल्याने कुटुंबावर दुःखाचा डोंगर कोसळला आहे. उज्वला काकडे यांच्या पतीचे यापूर्वीच निधन झाले असून, त्यांच्या पश्चात एक मुलगी आहे. या घटनेने पांगारे गावात हळहळ व्यक्त होत आहे.

आरोपीच्या शोधासाठी पोलिसांची दोन पथके रवाना

याबाबत सासवड पोलीस स्टेशनचे वरिष्ठ पोलीस निरीक्षक संतोष घोळवे यांनी सांगितले की, सीसीटीव्ही फुटेज आणि इतर तांत्रिक स्रोतांच्या माध्यमातून आरोपीचा शोध घेण्यात येत आहे. आरोपीच्या शोधासाठी पोलिसांची दोन पथके रवाना करण्यात आली असून, लवकरच आरोपीला ताब्यात घेऊन या घटनेचा संपूर्ण उलगडा केला जाईल, असे त्यांनी सांगितले.

या अमानुष घटनेमुळे पांगारेसह संपूर्ण पुरंदर तालुक्यात संताप आणि शोककळा पसरली असून, या प्रकरणातील आरोपीला तातडीने अटक करून कठोर कारवाई करावी, अशी मागणी नागरिकांकडून होत आहे.
 

Add Zee News as a Preferred Source
TAGS:

About the Author

मानसी क्षीरसागर झी 24 डिजीटलमध्ये सब एडिटर म्हणून कार्यरत आहेत. त्यांन मीडिया क्षेत्राचा 10 वर्षांचा अनुभव आहे. महाराष्ट्र टाइम्स डिजीटल या वृत्तसंस्थेपासून कारकिर्दीची सुरुवात केली. राजकीय, मनोरंजन आणि जनरल बातम्यांमध्ये हातखंडा आहे. पायाभूत सुविधा म्हणजेच infrastructure, मुंबई लोकल संबंधित बातम्यांमध्ये विशेष रुची आहे. महाराष्ट्र व मुंबईतील महत्त्वाचे प्रकल्पाचे अपडेट वाचकापर्यंत पोहोचवतात.त्याचबरोबर, बातमीमागची बातमी म्हणजेच घडामोडींचा विश्लेषणात्मक कव्हरेज करण्याची विशेष आवड आहे.  गुन्हेविषयक बातम्या आणि त्याचे विश्लेषणात्मक लेख आणि त्याचा अभ्यासपूर्ण मसुदा वाचकांना समजेल अशा भाषेत लिहिण्याची विशेष आवड आहे. त्याचबरोबर, लाइफस्टाईल आणि हवामानासंदर्भातील बातम्यांमध्येसुद्धा त्यांचा विशेष हातखंडा आहे.डिजिटल मीडियातील कारकीर्दमानसी यांनी त्यांच्या कारकीर्दीची सुरुवात डिजीटल मीडियापासून केली. ग्रुम अँड ग्रो या अॅपसाठी कंटेट रायटर म्हणून काम करण्यास सुरुवात केली. त्यानंतर महाराष्ट्र टाइम्स ऑनलाइनमध्ये रुजू झाल्या.  मनोजरंन बातम्यांपासून सुरुवात केल्यानंतर जनरल बातम्या, अर्थविषयक बातम्या, क्राइम आणि लाइफस्टाईल विषयाशी निगडीत विषयांवर लिहिण्यास सुरुवात केली. मानसी या आता झी 24 तासमध्ये राजकीय, सामाजिक आणि इन्फ्रासंदर्भातील बातम्या प्रामुख्याने करतात.शैक्षणिक पात्रतामानसी क्षीरसागर यांची शैक्षणिक पात्रता पाहायची झाल्यास त्यांनी बॅचलर ऑफ मास मीडिया (BMM) मध्ये पदवी घेतली असून मास्टर ऑफ आर्ट्स इन कम्युनिकेशन अँड जर्नालिझम (MACJ) असे पदव्यूत्तर शिक्षण घेतलं आहे. शिवाय डिजिटल मार्केटिंग या विषयाचा सुद्धा त्यांचा अभ्यास आहे. डिजिटल मीडियातील बदलते ट्रेंड तसेच बदलती वाचकवृत्ती लक्षात घेऊन बातमी अथवा लेखांचे सादरीकरण कशा प्रकारे करू शकतो याचा अभ्यास करून त्या आपल्या कामात काळानुरुप बदल करतात.
Read More

ZEENEWS TRENDING STORIES