'कोल्हापूर तडजोड न करता मस्ती उतरवतं, फक्त...'; 4 शासन नियुक्त सदस्यांच्या GR कॉपी शेअर करत सतेज पाटलांचा इशारा

कोल्हापूर जिल्हा सहकारी दूध उत्पादक संघ म्हणजेच 'गोकुळ'च्या अध्यक्षपदावरुन वाद सुरु असतानाच राज्य सरकारने घेतलेल्या एका निर्णयामुळे सत्ताधारी आणि विरोधक आमने-सामने आले आहेत. बुधवारी मुख्यमंत्री देवेंद्र फडणवीसांच्या नेतृत्वाखाली कॅबिनेट बैठकीदरम्यान, गोकुळवर चार शासन नियुक्त सदस्य नेमण्याच्या प्रस्तावाला मंजूरी देण्यात आली. या संदर्भातील शासन आदेशावर राज्यपालांनी स्वाक्षरी केल्याची माहिती शुक्रवारी रात्री समोर आल्यानंतर काँग्रेसचे आमदार सतेज पाटील यांनी स्वत: या जीआरची प्रत आपल्या एक्स अकाऊंटवरुन शेअर करत सरकारला थेट इशारा दिला आहे. 

गोकुळमध्ये झालंय काय?

काँग्रेस आमदार सतेज पाटील यांच्या नेतृत्वाखाली 'समविचारी आघाडी'ने गोकुळच्या निवडणुकीमध्ये 13 सदस्य निवडून आणले तर महायुतीचे 12 सदस्य निवडून आले. मात्र अध्यक्षनिवडीच्या वेळेस महायुतीचे सदस्य अनुपस्थित राहिल्याने 14 सदस्यांचा पाठींब्याने होणारी अध्यक्ष निवड झाली नाही. याचसंदर्भातील तिढा सोडवण्यासाठी उच्च न्यायालयाच्या आदेशानुसार 10 नोव्हेंबरला गोकुळच्या अध्यक्षपदाची निवडणूक घेण्याचं ठरलं.  या निवडणुकीसाठी 25 निवडून आलेल्या संचालकांना नोटिसा बजावण्याचे निर्देशही देण्यात आले. मात्र, या न्यायालयीन लढाईदरम्यान राज्य सरकारने अचानक गोकुळमध्ये शासन नियुक्त 4 सदस्य निवडण्याचा निर्णय घेतला. यामुळे सतेज पाटील आणि काँग्रेससहीत सर्वच विरोधी पक्षांनी संताप व्यक्त केला. मात्र या निर्णयावर आता राज्यपालांनी स्वाक्षरी केली आहे. 

सतेज पाटील संतापले

सन 2026 चा महाराष्ट्र अध्यादेश क्रमांक 16 अंतर्गत महाराष्ट्र सहकारी संस्था अधिनियम, 19960 मध्ये सुधारणा करत या चार शासन नियुक्त सदस्यांना मान्यता देण्यात आल्यानंतर सतेज पाटलांनी याच शासन आदेशाची प्रत शेअर करत, "तुम्ही कोल्हापूरकरांचा विश्वास जिंकून दाखवू शकला नाही! मग अध्यादेशाच्या आडून गोकुळमध्ये आपली माणसं घुसवून सभासदांचा कौल कशाला तुडवता?" असा सवाल सत्ताधाऱ्यांना विचारला आहे.

गोकुळ तुमची जहागीर नाही

"चार नियुक्त सदस्यांना मतदानाचा अधिकार देणं म्हणजे सभासदांच्या कौलावर सरकारी दरोडा आणि कोल्हापूरकरांच्या स्वाभिमानाचा अपमान ! घाम आमच्या दूध उत्पादकांचा, संस्था आमच्या सभासदांची आणि हुकूम तुमचा? गोकुळ तुमची जहागीर नाही! लक्षात ठेवा, कोल्हापूर स्वाभिमानाशी तडजोड करत नाही; अहंकाराची मस्ती उतरवतं. फक्त वेळ येण्याची वाट  पाहतं ! आता यायला लागतंय! कोल्हापूरचा संघर्ष मोर्चा.. 9 नोव्हेंबरला सकाळी 10 वाजता,दसरा चौक..." असं सतेज पाटलांनी पोस्टमध्ये नमूद केलं आहे. 

तुम्ही कोल्हापूरकरांचा विश्वास जिंकून दाखवू शकला नाही ! मग अध्यादेशाच्या आडून गोकुळमध्ये आपली माणसं घुसवून सभासदांचा कौल कशाला तुडवता ? चार नियुक्त सदस्यांना मतदानाचा अधिकार देणं म्हणजे सभासदांच्या कौलावर सरकारी दरोडा आणि कोल्हापूरकरांच्या स्वाभिमानाचा अपमान ! घाम आमच्या दूध उत्पादकांचा, संस्था आमच्या सभासदांची आणि हुकूम तुमचा? गोकुळ तुमची जहागीर नाही! लक्षात ठेवा, कोल्हापूर स्वाभिमानाशी तडजोड करत नाही; अहंकाराची मस्ती उतरवतं. फक्त वेळ येण्याची वाट पाहतं ! आता यायला लागतंय! कोल्हापूरचा संघर्ष मोर्चा.. 9 नोव्हेंबरला सकाळी 10 वाजता,दसरा चौक..

— Satej (Bunty) D. Patil (@satejp) November 6, 2026

रस्त्यावर उतरुन आंदोलन

सतेज पाटील यांनी गुरुवारी घेतलेल्या पत्रकार परिषदेमध्ये रस्त्यावर उतरुन आंदोलन करण्याचा इशारा दिला होता. त्याचसंदर्भात 9 नोव्हेंबर रोजी कोल्हापुरमध्ये मोर्चा काढण्यात येणार आहे.