पुढच्या वर्षी हापूस आंबाच नाही? शेतकऱ्यांसमोर मोठं संकट, आंब्याचा मोहोरच...

एल निनो आणि त्याचा हवामानावर होत असलेला परिणाम ही चिंतेची स्थिती आहे. एल निनोच्या प्रभावामुळं हवामानात बदल होताना दिसत आहे. महाराष्ट्रावर दुष्काळाचं संकट गडद होतेय. धरणातील जल साठ्यांवरही परिणाम होतोय. पाणी कमी तर त्याचा फटका पिकांवरही होताना दिसतोय. फळांचा राजा आंबावर एल निनो आणि बदललेल्या वातावरणाचा परिणाम होतोय.

कोकणातील हापूस आंबा हा सातासमुद्रापार पोहोचवला जातो. खवय्य्यांचा जीव की प्राण असणाऱ्या हापूस आंब्याचे उत्पादन यंदा घटणार का? अशी भीती व्यक्त करण्यात येत आहे. त्याला कारणही तसेच आहे. कोकणातील हापूस आंब्यावर देखील यंदा अनिश्चिततेचं सावट आहे. एल निनोचा परिणाम मे महिन्यापर्यंत जाणवणार असून आत्तापासूनच आंबा हंगामावर त्याचा परिणाम होताना दिसतोय.

भारतमध्ये आंब्याच्या झाडाला प्रामुख्याने डिसेंबर ते फेब्रुवारी या कालावधीत मोहोर फुटतो. प्रामुख्याने थंडीचे हवामान मोहोर फुटण्यास पोषक असतो. आंब्याच्या झाडाला मोहराच्या प्रक्रियेऐवजी नवीन पालवी फुटण्यास सुरुवात झाली आहे. त्यामुळे या वेळचा हंगाम लांबण्याची आंबा बागायतदारांना भिती आहे.

हापूसचा हंगाम नेमका कधी सुरू होणार? यंदा उत्पादन किती असणार? मोहर प्रक्रिया नेमकी कधी सुरू होईल? बाजारात हापूस दाखल झाल्यावर दर काय असतील? याबाबत काहीही ठोस सांगता येत नसल्याचं सध्याचं चित्र आहे. एल निनोचा प्रभाव आणि पावसानं दिलेली ओढ यामुळे हापुस हंगामाच्या सुरुवातीलाच सर्व गणित बिघडली असल्याचे बागायतदारांनी म्हटलं आहे. आंबा किंवा त्यापासून तयार होणारे इतर उत्पादने याला देखील फटका बसणार असल्याचे  म्हटलं जात आहे.

तापमानाचा पारा चढला

रत्नागिरी जिल्ह्यात तापमानाचा पारा चांगलाच चढला आहे. चिपळूणमध्ये तापमान 35 अंश सेल्सिअसवर पोहोचल्याने उष्णतेची तीव्रता वाढली आहे. पावसाअभावी आधीच संकटात असलेल्या भातशेतीवर आता वाढत्या उष्णतेचा फटका बसत आहे. आंबा आणि काजू पिकांवरही परिणाम होण्याची भीती व्यक्त केली जात आहे. या पार्श्वभूमीवर शासनाने तातडीने पीक नुकसानीचे पंचनामे करून संपूर्ण कोकण सरसकट दुष्काळग्रस्त जाहीर करावा, अशी मागणी शेतकऱ्यांकडून होत आहे.