रस्त्याच्या मधोमध जाळपोळ, घोषणाबाजी अन्... घोडबंदर रोडवर रात्रभर राडा; टू व्हिलर हलवायलाही जागा नाही एवढं ट्रॅफिक; नेमकं झालं काय?

उद्धव ठाकरेंच्या शिवसेनेचे ठाण्यातील मानपाडा येथील पदाधिकारी प्रदीप पूर्णेकरांच्या हत्या प्रकरणाला जवळपास एक महिना होत आला आहे. या प्रकरणात पोलीस तपास सुरु असला तरी अद्याप कोणाच्या संगण्यावरुन ही हत्या करण्यात आली हे स्पष्ट झालेलं नाही. आरोपी ताब्यात असले तरी ठाण्याच्या माजी महापौर मिनाक्षी शिंदे आणि त्यांच्या पतीनेच हे घडवून आणल्याचा आरोप पूर्णेकरांच्या कुटुंबियांकडून केला जातोय. या प्रकरणामध्ये राजेंद्र शिंदेंसंदर्भातील काही पुरावे पुर्णेकरांचा मुलगा राम पुर्णेकरांनी पोलिसांन दिले असून या प्रकरणामध्ये मुख्य सूत्रधारांना अटक का केली जात नाही असा सवाल विचारला जातोय. याच संतापाचा कडेलोट काल मुंबई आणि गुजरातला जोडणाऱ्या घोडबंदर रोडवर दिसून आला. पूर्णेकरांच्या कुटुंबाला न्याय द्यावा या मागणीसाठी पूर्णेकर समर्थक घोडबंदर रोडवर उतरले. 

घोडबंदरवर रात्रभर वाहतूक कोंडी

मंगळवारी रात्री संतप्त पूर्णेकर समर्थकांनी घोडबंदर रोडवरील मानपाडा परिसरात तीव्र रास्ता रोको आंदोलन केले. या आंदोलनामुळे घोडबंदर रोडवर दोन्ही बाजूंनी वाहनांच्या लांबच लांब रांगा लागून वाहतूक पूर्णपणे ठप्प झाल्याचं दिसून आलं. या प्रकरणातील मुख्य सूत्रधार असल्याचा आरोप करत राजेंद्र शिंदे व माजी नगरसेविका मीनाक्षी शिंदे यांच्या तात्काळ अटकेची मागणी पूर्णेकर समर्थकांकडून केली जात आहे. पहाटे अडीच ते तीननंतरही अनेक ठिकाणी या आंदोलनामुळे वाहनं अडकून असल्याचे व्हिडीओ सोशल मीडियावर व्हायरल होत आहे. अनेक ठिकाणी रस्त्यावर टायर जाळून वाहतूक रोखून धरण्यात आली. पूर्णेकरांना न्याय देण्याची मागणी करत समर्थक घोषणाबाजी करत होते.

अनेक ठिकाणी साधी दुचाकी बाजूला घेण्यासाठीही जागा नव्हती एवढी वाहतूक कोंडी होती. कोलशेत गाव आणि इतर आतील भागामध्येही जागोजागी पूर्णेकर समर्थकांनी रस्ते अडवून धरले. या आंदोलनामुळे वाहतूककोंडीत अडकलेल्यांना पूर्णकर समर्थकांनीच पाण्याच्या बाटल्या वगैरे वाटल्याचा दावा करणारे व्हिडीओही सोशल मीडियावर व्हायरल झाले आहेत. 

उद्या ठाण्यात सर्वपक्षीय आंदोलन

दरम्यान, याच प्रकरणामध्ये पूर्णेकरांच्या कुटुंबियांना न्याय मिळून द्या या मागणीसाठी उद्या म्हणजेच 29 ऑक्टोबर रोजी सायंकाळी पाच वाजता ठाण्याच्या जांभळी नाका येथे सर्वपक्षीय 'भयमुक्त ठाणे' ना मथळ्याखाली आंदोलन केलं जाणार आहे. या आंदोलनाला आदित्य ठाकरे स्वत: उपस्थित राहणार आहेत. यावेळी आदित्य ठाकरे स्वत: ठाणे पोलीस आयुक्तांना भेटून पूर्णेकर कुटुंबियांना न्याय मिळवून देण्याची मागणी करणार आहेत. प्रदीप पूर्णेकरांना न्याय द्यावा, सूत्रधार असलेल्या शिंदे दांपत्यावर कारवाई करावी तसेच उपमुख्यमंत्री एकनाथ शिंदेंच्या राजीनाम्याची मागणी करण्यासाठी हे आंदोलन केलं जाणार आहे.

ठाण्यातील वाढती गुन्हेदारी, ड्रग माफियांचा विखळ्यात सापडपेलं ठाणे शहर भयमुक्त करण्याच्या मागणीसाठी सर्व पक्षीय नेते रस्त्यावर उतरणार आहेत. आदित्य ठाकरेंसोबत खासदार संजय राऊत देखील या आंदोलनात सहभागी होणार आहेत. या कार्यक्रमाला ठाण्यातील सर्वपक्षीय नेते उपस्थित असतील असं सांगण्यात आलं आहे. यापूर्वी सर्व पक्षांनी एकत्रितपणे ठाण्यातील कायदा आणि सुव्यवस्था सुरळीत रहावी आणि गुन्हेगारीवर आळा घालण्यात यावा या मागणीसाठी संयुक्त मोर्चा काढला होता.

29 सप्टेंबर रोजी मानपाडा भागातील प्रदीप पूर्णेकर यांच्या कार्यालयात त्यांची धारदार शस्त्रांनी आणि गोळ्या झाडून निर्घृण हत्या करण्यात आली होती. या प्रकरणात पोलिसांनी आतापर्यंत 5 मुख्य आरोपींना अटक केली आहे.