प्रदीप पूर्णेकरांच्या हत्येशी रिक्षावाल्याचंही कनेक्शन, त्या पाच जणांनी...; SIT तपासात हादरवणारा खुलासा
मुंबईच्या उंबरठ्यावर असलेल्या ठाणे शहरामध्ये सप्टेंबर महिन्याच्या शेवटच्या आठवड्यात झालेल्या या धक्कादायक हत्येसंदर्भातील हादरवून टाकणारी माहिती एसआयटीच्या प्राथमिक तपासात समोर आली आहे. नेमकं काय कळालय या तपासात पाहूयात...
उद्धव ठाकरेंच्या शिवसेनेचे ठाण्यातील मानपाडा येथील विभागप्रमुख प्रदीप पूर्णेकर यांच्या हत्या प्रकरणात विशेष तपास पथक म्हणजेच एसआयटीला तपासात काही नवे धागेदोरे हाती लागले आहेत. हत्येप्रकरणी अटक केलेल्या पाचही हल्लेखोरांशी प्रदीप पूर्णेकरांचे वैर असल्याची माहिती पुढे आली आहे. तसेच, उत्तर प्रदेशातील प्रयागराजमधील व्हीव्हीआयपी घाटातून ताब्यात घेतलेला फरार आरोपी संतोष उर्फ टल्ली आणि अमित सिंग (रिक्षाचालक, रा. भाईंदर) यांना रविवारी एसआयटीने खंडणीविरोधी पथकाच्या ताब्यात दिले.
आरोपी खंडणीविरोधी पथकाच्या ताब्यात
दोघांनाही आज ठाणे न्यायालयात हजर करून पोलिस कोठडीची मागणी केली जाणार आहे. दहा दिवसांपासून पोलिसांना गुंगारा देणाऱ्या टल्ली व त्याचा साथीदार अमित यांना शुक्रवारी खंडणीविरोधी पथकाचे सहायक निरीक्षक भूषण कापडणीस आणि युनिट पाचचे सहायक शरद पाटील यांच्या पथकाने गोपनीय माहितीच्या आधारे सापळा रचून पकडले. त्यांची ट्रान्झिट रिमांड मिळाल्यानंतर त्यांना रविवारी सायंकाळी खंडणीविरोधी पथकाच्या ताब्यात देण्यात आले.
अमली पदार्थांमुळे मारहाण
टल्लीचा काही दिवसांपूर्वी ज्याच्याशी वाद झाला त्याचे समर्थन बाळू उर्फ प्रदीप यांनी केल्याचा दावा त्याने प्राथमिक चौकशीत केला. नितेश पवार हा टल्लीचाच मित्र असल्याने तो हत्येत सहभागी झाला. तर सुभाष उर्फ पप्या शिंदेचे पालिका निवडणुकीपासूनच पूर्णकर यांच्याबरोबर वैर होते. अमली पदार्थाच्या सेवनामुळे निखिल यादवलाही प्रदीप यांनी मारहाण केल्याचा दावा आहे. भाईंदरचा रिक्षाचालक अमित सिंग हा चौघांचाही मित्र असल्याने तो या हत्येमध्ये सहभागी झाला.
अजून अनेक प्रश्न अनुत्तरित
हत्येमध्ये वापरलेली हत्यारे कुठे लपविली? आणखी कोणी साथीदार आहेत का? या हत्येमागील काही राजकीय कनेक्शन आहे का? याचाही तपास सुरू आहे. आरोपींना वाहने व हत्यारे पुरविणाऱ्या पप्या शिंदे याची या हत्याकांडातील भूमिका तपासली जात आहे.
हे प्रकरण नेमकं काय? ते पाच जण कोण?
प्रदीप पूर्णेकर यांची 29 सप्टेंबर 2026 रोजी रात्री साडेनऊच्या सुमारास ठाण्यातील मानपाडा भागातील त्यांच्या कार्यालयाबाहेर काही मुखवटाधारी हल्लेखोरांनी त्यांच्यावर अंदाधुंद गोळीबार करून आणि धारदार शस्त्राने हल्ला करून त्यांची निर्घृण हत्या केली होती. सुरुवातीला या हत्येमागे राजकीय कारण असल्याचा संशय व्यक्त केला जात होता. मात्र, एसआयटीच्या प्राथमिक चौकशीनुसार, प्रदीप पूर्णेकर यांचे या हत्येत सामील असलेल्या पाचही हल्लेखोरांशी वेगवेगळे जुने वैयक्तिक वैर असल्याचं समोर आलं आहे. हत्येनंतर 10 दिवस फरार असलेला मुख्य सूत्रधार संतोष कनोजिया उर्फ टल्ली आणि त्याचा साथीदार रिक्षाचालक अमित सिंग या दोघांना ठाणे गुन्हे शाखेने उत्तर प्रदेशमधील प्रयागराज येथून अटक केली. संतोषनेच या सर्व आरोपींना हत्येसाठी एकत्र आणले होते. पोलिसांनी सुरुवातीलाच सुभाष उर्फ पप्या शिंदे (जो पूर्णेकर यांचा मित्र नाटक करत होता), गोळीबार करणारे नितेश पवार आणि निखिल यादव यांना अटक केली होती.
