'होय, मी प्रदीप पूर्णेकरांच्या पाचही मारेकरांना ओळखतो...', मीनाक्षी शिंदेंच्या पतीचा मोठा खुलासा! 'माझी पत्नी नगरसेविका...'

शिवसेना ठाकरे गटाचे विभागप्रमुख प्रदीप पूर्णेकर यांच्या हत्येमुळे महाराष्ट्रातील राजकारणात खळबळ माजली आहे. पोलिसांचा तपास जसा जसा पुढे जातोय यात अनेक धक्कादायक खुलासे समोर येत आहे. प्रदीप पूर्णेकर यांच्या हत्या प्रकरणात पाचही मारेकरांना अटक करण्यात आली आहे. तर दुसरीकडे प्रदीप पूर्णेकर यांचा मुलगा राम पूर्णेकर याने वेगळाच संशय बोलून दाखल्यामुळे या प्रकरणाला वेगळेच वळण आले आहे. या प्रकरणातील बाइकवरील मारेकरी आणि पकडलेला मारेकरी यामध्ये साम्य नसल्याचा राम पूर्णेकर यांच्या संशय आहे. ते दोन्ही आरोपी एकच नाही असं राम पूर्णेकरला संशय आहे.

त्यात पोलिसांनी आता शिवसेना शिंदे गटाच्या नेत्या आणि माजी महापौर मीनाक्षी शिंदे यांच्या पती राजेंद्र शिंदेंची चौकशी करण्यात आली. महत्त्वाचे म्हणजे पोलिसांनी राजेंद्र शिंदे आणि मारेकरी यांची समोरासमोर चौकशी केल्याची माहिती सूत्रांनी दिली आहे. या चौकशीदरम्यान राजेंद्र शिंदे यांनी मोठा खुलासा केला आहे. त्यामुळे आता या प्रकरणाला अधिक मजबूती आली आहे, असं पोलिसांचं मत आहे.

राजेंद्र शिंदे यांचा मोठा खुलासा!

पोलिसांनी सलग दोन दिवस राजेंद्र शिंदे यांची प्रदीप पूर्णेकर यांच्या हत्येसंदर्भात चौकशी केली. पहिल्या दिवशी नऊ तास आणि दुसऱ्या दिवशी आठ तास चौकशी करण्यात आल्याची माहिती पोलीस सूत्रांनी दिली आहे. चौकशीदरम्यान प्रदीप पूर्णेकर यांच्या पाचही आरोपीला आपण ओळखतो अशी कबुली राजेंद्र शिंदे यांनी पोलिसांनी दिली आहे. ते म्हणाले की, माझी पत्नी मीनाक्षी शिंदे त्या परिसराच्या दोन तीन वेळा नगरसेविका राहिल्या आहेत. त्यामुळे आरोपींचे त्यांच्या घरी किंवा त्यांच्याकडे येणे-जाणे होते, याच कारणाने मी त्यांना ओळखतो. पण माझा प्रदीप पूर्णेकर हत्याकांडाशी काहीही संबंध नाही.

राजेंद्र शिंदे यांच्या जबाबामुळे राम पूर्णेकर यांनी केलेल्या आरोपात तथ्य आहे, असं पोलिसांना वाटतंय. राम पूर्णेकर यांनी म्हटलं होतं की, हत्येच्या आदल्या दिवशी मारेकरी हे राजेंद्र शिंदे आणि मीनाक्षी शिंदे यांच्या घरी निळकंठ इमारती बाहेर दिसले होते.